BQXK Qarabağ münaqişəsinin eskalasiyası nəticəsində zərərçəkənlərə yardım göstərməyə hazırdır

Bakı/03.10.20/Turan: Beynəlxalq Qızıl Xaç Komitəsi (BQXK) Qarabağ münaqişəsinin gərginləşməsi nəticəsində zərər çəkmiş əhaliyə yardım göstərməyə hazır olduğunu bildirib.   

“Mülki şəxslər son günlərdə Dağlıq-Qarabağ münaqişəsinin alovlanmasından əziyyət çəkirlər”, - BQXK Bakı nümayəndəliyindən “Kafkazskiy uzel”in müxbirinə daxil olan bəyanatda deyilir. 

Təmas xəttinin hər iki tərəfində, eləcə də Ermənistanda uşaqlar da daxil olmaqla, mülki şəxslər arasında ölənlər və yaralananlar var.

“Gərginlik başladığı vaxtdan BQXK Dağlıq-Qarabağdakı xəstəxanaları təcili tibbi yardım ləvazimatları, məhkəmə-tibbi ekspertiza bürosunu isə meyit kisələri ilə təmin edib. Hazırda biz evlərini tərk etmək məcburiyyətində qalan şəxslərin düşdüyü vəziyyət, səhiyyə və digər humanitar məsələrlə bağlı, humanitar ehtiyacları qiymətləndirməyə çalışırıq. Vəziyyətin qeyri-müəyyənliyi ilə əlaqədar bizim ərazidə hərəkət etmək imkanlarımız məhduddur”, - BQXK-nın Dağlıq Qarabağdakı missiyasının rəhbəri Bertrand Lamon bildirib.

 “Biz artıq münaqişənin alovlanmasının mülki şəxslərə təsir edən dəhşətli nəticələrini görürük. BQXK şərait imkan verən kimi ehtiyac olan sahələrdə öz köməyini göstərməyə hazırdır. Buraya icmalarda işləyən Azərbaycan Qızıl Aypara Cəmiyyətinin yerli şöbələrinə dəstək göstərilməsi də daxildir”, - CQXK Bərdə nümayəndəliyinin rəhbəri Gerardo Moloeznik deyib.

BQXK ailələri ilə birlikdə təhlükəsiz əraziyə keçməyə çalışan insanlar barədə məlumatlar alır. Aralarında körpələr və azyaşlı uşaqlar da olan bir çox ailələr, münaqişənin təsirinə məruz qalmamaq üçün gecə-gündüz yaşadıqları binaların isitmə sistemi olmayan zirzəmilərinə sığınmaq məcburiyyətində qalırlar.

Həmçinin ağır artilleriyanın dağıtdığı yüzlərlə ev, eləcə də məktəb və xəstəxanalar kimi mülki infrastruktur barədə məlumat verilir. Zədələnmiş binalar insanların partlamamış sursatlar təhlükəsi ilə üz-üzə qalmasına da səbəb olur.

Bütün bu sarsıntılar qış gəlməsinə az qalmış bir vaxtda, uşaqların cəmi bir neçə həftə bundan əvvəl dərslərə başladığı və insanların özlərini və ailələrini koronavirus pandemiyası təhlükəsindən qorumağa çalışdığı zamanda baş verir.

“İnsanlar təhlükədən uzaq qalmaq üçün nə edəcəklərini və hara gedəcəklərini bilməmənin çaşqınlığı ilə özləri və ailələri üçün narahatlıq içərisində BQXK ilə əlaqə saxlayırlar. Onlar atışmanın mərkəzində qalıb və təhlükəsizlikləri və aqibətləri üçün qorxu içərisindədirlər. Biz münaqişənin zorakı təsirlərinə məruz qalan hər kəsə yardım etməyə hazırıq. Biz tərəfləri mülki şəxsləri və onların sağ qalması üçün zəruri olan infrastruktur və xidmətləri qorumağa, həmçinin, beynəlxalq humanitar hüquqla bağlı öhdəliklərinə riayət etməyə çağırırıq”, - BQXK-nın Avrasiya üzrə regional direktoru Martin Şüepp bildirib.

BQXK hazırki qarışıq vəziyyətin və köçkünlüyün COVİD-19 virusu ilə bağlı situasiyanı kəskinləşdirəcəyindən çox narahatdır, çünki sığınacaqlara üz tutan insanlar saatlarla kommunal binalarda, ya da müvafiq sanitariya şəraiti olmayan yerlərdə qalmalı olurlar.

Bundan əlavə, bu eskalasiya onsuz da 30 ilə yaxın müddətdə münaqişənin təsirləri altında yaşayan və indi həm də COVID-19 pandemiyasına ilə əlaqədar sağlamlıqlarına görə əlavə narahatlıq keçirən insanların psixi sağlamlığına öz təsirini göstərəcək.

BQXK Dağlıq Qarabağ münaqişəsi ilə əlaqədar 1992-ci ildən regionda humanitar fəaliyyət həyata keçirir. BQXK Bakı və Yerevandakı nümayəndəlikləri və Dağlıq Qarabağdakı missiyası vasitəsilə təmas xətti və Ermənistanla Azərbaycan arasındakı beynəlxalq sərhəd zonasında yaşayan icmalara yardım edir.

BQXK həmçinin itkin düşmüş şəxslərin taleyinin aydınlaşdırılması və onların ailələrinə dəstək göstərilməsi, saxlanılan şəxslərə baş çəkilməsi sahəsində fəaliyyət göstərir və azad olunan şəxslərin və ya həlak olan hərbiçilərin cənazələrinin qaytarılması əməliyyatlarında neytral vasitəçi qismində çıxış edir.

“Biz, Azərbaycan Qızıl Aypara və Ermənistan Qızıl Xaç Cəmiyyətləri ilə sıx əməkdaşlıq edirik və region üzrə Dağlıq Qarabağ münaqişəsinin təsirlərinə məruz qalan insanlara dəstək göstərilməsi sahəsində əlaqəli şəkildə fəaliyyət göstəririk”, - BQXK-nın bəyanatında qeyd olunur. 0-