Media-icmal 04.04.2016

Beynəlxalq münasibətlər, Qarabağ cəbhəsində baş  verən hadisələrə rəylər, ölkədə islahat problemləri medianın aparıcı mövzusudur.

Bu, yeni mərhələyə qədəm qoymaqdır

“Xalq Qəzeti” dövlət başçısı İlham Əliyevin artıq başa çatmış ABŞ səfəri fonunda iki ölkə arasında əlaqələrə dair “ABŞ-Azərbaycan əməkdaşlığı yeni mərhələyə qədəm qoyur” adlı məqalə dərc edib. Məqalədə Azərbaycanın Vaşinqtonda keçirilən nüvə təhlükəsizliyi sammitində iştirakı ölkənin dünya birliyi ölkələri sırasında təsirli yer alması kimi dəyərləndirilir.

Məqalədə bu əlaqələrin müsbət dinamika ilə inkişaf edəcəyi kimi nikbin qənaət ifadə edilir və yekun olaraq deyilir: “Prezident İlham Əliyevin nüvə təhülkəsizliyi sammitinə dəvət olunması eyni zamanda ABŞ ilə Azərbaycan arasında inkişaf edən dostluq və tərəfdaşlığın təzahürü, iki ölkə arasında əməkdaşlığın yeni mərhələyə qədəm qoyduğunu təsdiqləyir”.   

Vətən ədalət istəyir

“Azərbaycan əsgərinə də inanıram, Azərbaycan xalqına da. Azərbaycanın gələcəyinə də. Amma müharibə aparacaq orduya rəhbərlik edənlərə inanmıram”.

Bu cümlə tanınmış jurnalist Şahvələd Çobanoğlunun Facebook” səhifəsində paylaşdığı “Vətən necə sağ olsun?” yazısından götürülüb.

Daha sonra müəllif inanmama siyahısını davam etdirir: “ Ali baş komandana inanmıram. Onun yaxası rus medallı komandasına inanmıram. Vətənpərvərliyi yaltaqlığa çevirənlərə inanmıram”. Müəllif inamsızlığının səbəblərinə də aydınlıq gətirir. “Bilirəm ki, ölkəmiz yalanın işğalından azad olunsa torpaqları daha asan qaytara bilərik. Ölkə bütün hallarda müdafiə olunmalıdır, amma öz ölkəsinin və xalqının sərvətlərini oğurlayanların bunun üçün fədakarlıq edəcəyinə və doğru yol tutacağına inanmıram”.

Müəllif hakimiyyətə inanmamasını belə arqumentləşdirir: “Azərbaycanı neft ölkəsindən səfalət səltənətinə çevirən bir rejimin ölkəyə uğurlar gətirəcəyinə inanmış olduğumu desəm riyakarlıq etmiş olaram. Öz xalqıma yalan danışmış olaram”.

Ş. Çobanoğlu məşhur “Vətən sağ olsun” deyimini xatırladır və bir neçə sualı gündəmə gətirir: “Bəli, bütün acılarda, bütün hallarda bir deyimimiz var – Vətən sağ olsun! Amma Vətəndə niyə ədalət və haqq olmasın? Vətəndə niyə ən adi işlər yolunda olmasın? Vətəndə niyə bərabərlik olmasın? Vətən və vətəndaş niyə bu gündə olmalıdır?

Son olaraq müəllif Vətənin də nə istədiyini bəyan edir. “Vətən ədalət istəyir. İstəyir ki, güclü olsun! O qədər güclü və ədalətli olsun ki, arxasında Rusiyanın namərd barmağı dayanan mənfur erməni işğalı bitsin”.

Qarabağ cəbhəsi olaylarına rəy: Burada Rusiya izi var

“Azadlıq” qəzetində dərc edilən “Atəşkəs niyə pozuldu?” məqaləsində son iki-üç gündə Qarabağ cəbhəsində döyüş əməliyyatları başlamasına dair ekspert rəyləri yer alır.

Politoloq Zərdüşt Əliazadəyə görə, atəşkəsin pozulmasının arxasında Rusiya dayanır və bunun da səbəbi Azərbaycanın Qərbə yaxınlaşmasıdır. “Azərbaycan Qərblə yaxınlaşmağa bir addım atırsa Moskva və oyuncaq Ermənistan hökuməti xəbərdarlıq kimi cəbhədə böyük təxribat törədir”.  Z.Əlizadəyə görə, bunu Azərbaycanın üstünə atmaq ağılsızlıqdan başqa bir şey deyil.

Müdafiə Nazirliyinin mətbuat xidmətinin keçmiş rəhbəri Eldar Sabiroğlu da Z.Əlizadənin mövqeyini bölüşür. “Cəbhədə vəziyyətin gərginləşməsi və döyüş əməliyyatlarına gətirib çıxarması təsadüfi sayıla bilməz və açıq demək lazımdır ki, burada Rusiyanın müəyyən izləri görünür”.

E.Sabiroğlu Ermənistan ordusunun qəfil hücumunu şərtləndirən amillər daxilində Rusiya faktorunu diqqətdən kənarda qoymağı mümkün saymır.

“Əks təqdirdə Erməni tərəf müstəqil şəkildə belə təhlükəli riskə getmək imkanını nümayiş etdirə bilməzdi.  Cavab qəti və kəskin olmalıdır. Zərurət yaranarsa ölkədə səfərbərliyə start verilməlidir.

E.Sabiroğlu deyir ki, Rusiyanın belə metoda əl atması ilk dəfə deyil, ayrı-ayrı vaxtlarda Kreml belə pozuculuq hallarına yol verib.

“Bu hücumun Rusiyanın təxribatı olması birmənalıdır. Bu da təsadüfi deyil ki, hadisə baş verən kimi ekspert və politoloqlar bir yana, sosial şəbəkə istifadəçiləri belə tərəddüdsüz bunu Rusiyanın təxribatı kimi dəyərləndirdi”. Bu isə Milli Şuranın Koordinasiya Mərkəzinin üzvü keçmiş deputat Gültəkin Hacıbəylinin mövqeyidir. Onun fikrincə, həqiqət bu dəfə o qədər üzdədir ki, onu görməmək mümkün deyil.  “Bu, Azərbaycanın Vaşinqtonda keçirilən nüvə təhlükəsizliyi sammitində iştirakına cavab idi”.

Fazil Mustafa: “İnhisarçılıq aradan qalxmayınca”

Deputat Fazil Mustafa “Yeni Müsavat” qəzetinə müsahibəsində ölkədə islahatlara məsələsini təhlil edir. Onun fikrincə, islahatlara obyektiv zərurət yaranıb.“İslahatlar aparılmasının zəruriliyi bilavasitə Qərblə münasibətlərin yaxşılaşdırılmasından asılı deyil, daha çox  dövlətin gələcəyinin necə olmasını şərtləndirən düşüncənin diqtəsindən asılıdır”.

F.Mustafa neftin dəyərdən düşməsinin islahatlara səbəb olduğunu deyir: “Ancaq neftin qiymətinin aşağı düşməsi yeni iqtisadi münasibətlərin formalaşmasını tələb edir. Hər halda Azərbaycanda əsas problem inhisarçılığın buxovundan iqtisadiyyatın azad olunmasıdır”.

Fazil Mustafaya görə, bu, islahat məsələsinin “olmasa olmaz”ıdır. “İlk addım olaraq islahatlar bu hədəfə yönəlmədikcə devalvasiyadan sonra yaranmış vəziyyəti müsbətə doğru dəyişmək asan olmayacaq. Hökumətin son aylarda aldığı müsbət qərarlar var. Amma vergi siyasətində sahibkarlığın inkişafı üçün stimullaşdırıcı əsaslı dəyişikliklər baş verməyincə bu müsbət qərarların bəhrəsini görmək hələ ki çətin olacaq”.