Media-icmal 10.05.2016

Dövlət başçısı İlham Əliyevin ölkədəki sosial-iqtisadi durumu dəyərləndirməsi, 23 illik mövcud hakimiyyətin fəaliyyəti, İlqar Məmmədov və Xədicə İsmayılın həbsdə saxlanmaları fonunda Qərb-Azərbaycan münasibətləri bugünkü medianın aparıcı mövzusudur

Böhrandan şərəflə çıxmışıq?

“Bu gün siyasətimizin mərkəzində Azərbaycan vətəndaşı, onun problemləri, qayğıları, təhlükəsizliyi dayanır”.  Dövlət başçısı İlham Əliyev bunu Hitler faşizmi üzərində qələbənin 72-ci, keçmiş president Heydər Əliyevin anadan olmasının 93-cü ildönümü ilə bağlı Heydər Əliyev Mərkəzində düzənlənən qəbul mərasimində söyləyib.

İ.Əliyev ölkədə təhlükəsizlik məsələlərinin lazımi səviyyədə təmin edildiyini, ictimai-siyasi sabitliyin mövcud olduğunu, insanların rifah halının yaxşılaşdığını vurğulayıb: “Baxmayaraq, bu gün hələ ki davam edən dünya iqtisadi və maliyyə böhranı bizə də təsirini göstərir, ancaq hesab edirəm ki, biz bu böhrandan şərəflə çıxa bilmişik və bu gün iqtisadi sahədə heç bir problem yaşanmır. Maliyyə vəziyyətimiz sabitdir, iqtisadi inkişaf davam edir, neftin qiymətinin 3-4 dəfə aşağı düşməsi ilə əlaqədar problemlər olsa da ancaq biz bu problemlərin öhdəsindən şərəflə gəlirik”.

Dövlət başçısı 2016-cı ilin sosial-iqtisadi baxımdan uğurla başa vurulacağı barədə proqnoz da verib və bunun səbəblərini belə izah edib. “Nəyə görə? Ona görə ki, əvvəlki illərdə dayanıqlı iqtisadi inkişaf təmin edilmişdir, iqtisadiyyatın şaxələndirilməsi istiqamətində çox ciddi addımlar atılmışdır. Bununla bərabər Heydər Əliyevin neft strategiyası Azərbaycanda uğurla icra edilmişdir”.

İ.Əliyevə görə, bu strategiya 1994-cü ildən icra edilməyə başlanıb. O 1994-cü ildə “Əsrin kontraktı”nın imzalanmasını tarixi hadisə adlandırıb. Hazırda “Əsrin kontraktı” çərçivəsində aparılan işlərin ölkənin iqtisadi gücünü artırdığını qeyd edib. Onun düşüncəsinə görə, 1996-cı ildə “Şahdəniz” qaz yatağının işlənməsi ilə bağlı imzalanan kontrakt bu gün nəinki Azərbaycanın, bir çox ölkələrin enerji təhlükəsizliyini təmin edir, Azərbaycanın geosiyasi imkan və vəziyyətini böyük dərəcədə möhkəmləndirir.

Əgər milli hökumət olsaydı…

“Azadlıq” qəzeti Hitler faşizmi üzərində qələbənin 72-ci və məhrum prezident Heydər Əliyevin anadan olmasının 93-cü illiyi ilə bağlı Heydər Əliyev Mərkəzində düzənlənən qəbulda dövlət başçısı İham Əiyevin bəzi iddialarını əsassız sayan məqalə dərc edib. Belə ki, adı çəkilən tədbirdə İ.Əliyev “XX əsrin 90-cı illərində H.Əliyev hakimiyyətdə olsaydı Qarabağ problemi həllini tapacaqdı” mövqeyini ifadə edib.  “Heydər Əliyev Qarabağ düyününü aça bilirdisə” sərlövhəli məqalədə bu iddialara cavab verilir.

Məqalədə məhz H.Əliyevin hakimiyyəti dövründə 6 rayonun işğal olunduğu vurğulanır. H.Əliyevin döyüşən batalyonları ləğv etməsi yada salınır: “Cəbhə hakimiyyəti dövründə 33 batalyon fəaliyyət göstərirdi ki, H.Əliyev bu batalyonları ləğv etdi. H.Əliyev hakimiyyəti dövründə bir qarşı torpaq belə azad edilmədi”.

Daha sonra İ.Əliyevin hakimiyyəti dövründə də uğursuzluq zolağının davam etməsi qeyd olunur və Qarabağ məsələsinə görə İ.Əliyevin birillik (1992-93-cü illər )  Cəbhə hakimiyyətini tənqid etməyə haqqı olmadığı nəzərə çatdırılır. Müəllif birillik Cəbhə hakimiyyətinin fəaliyyətini yada salır: “Yaxşı ki, birillk cəbhə hakimiyyəti dövründə rus qoşunları Azərbaycandan çıxarıldı, yoxsa 23 illik YAP hakimiyyəti dövründə milli ordu ruslardan ibarət olacaqdı. Bəli, YAP hakimiyyətinin səcdə etdiyi Rusiyaya Cəbhə hakimiyyəti qapını göstərdi”.

Eyni zamanda məqalədə Cəbhə hakimiyyəti dövründə torpaqların əsas hissəsinin qaytarıldığı qeyd edilir. H.Əliyev hakimiyyətinin Ermənistanla “atəşkəs” imzalaması torpaqların qurban verilməsi kimi dəyərləndirilir.

Son olaraq məqalədə indiki hakimiyyətə mahiyyətinini milli yox, talançı olduğu xatırladılır: “Əgər bu 23 ildə ölkədə milli hökumət olsa idi Qarabağ münaqişəsi həll edilmişdi və dövlətin büdcəsi 100 milyardlarla ölçülürdü”.

Avropa Şurasının narahatlığı: Xədicə İsmayıl, İlqar Məmmədov

“Yeni Müsavat” qəzeti həbsdə oaln REAL Hərəkatının sədri İlqar Məmmədovun həbsdən azad olunmamasının Qərblə gərginliyə yol aça bilməsini araşdırır. Ekspertlər buna birmənalı cavab verə bilmirlər.

Ekspert Natiq Miri belə hesab edir ki, durum gərginləşməsə də İ.Məmmədovun azad edilməsi üçün səylər azalmayacaq. “Sadəcə olaraq, bu proses davam etdiriləcək. Nə qədər mümkünsə ora qədər danışıqlar gedəcək. İ.Məmmədovun azad edilməsi üçün bütün mümkün variantlardan istifadə olunacaq”.

Hüquq müdafiəçisi Səidə Qocamanlı isə İ.Məmmədovun qısa müddətdə azad olunacağına ümidlidir. “İ.Məmmədov qısa müddətdə azad olunacaq. Bu gərginliyin aradan qaldırılacağını düşünürəm. İ.Məmmədov Avropa Şurası tərəfindən maliyyələşdirilən layihənin direktoru idi. Ona görə Avropa Şurasında narahatlıq var. Amma İ.Məmmədov azad olunmaqla bu məsələ gündəmdən çıxarılacaq. İ.Məmmədovdan əlavə, Xədicə İsmayıl başda olmaqla bir sıra məhbuslar var ki, onların da taleyi Avropa Şurasını narahat edir. Bu məhbuslar da qısa zamanda azadlıqlarına qovuşacaqlar”.