Media-icmal 11.03.2016

Rəsmi qəzetlər dünəndən Bakıda start götürən və bu gün başa çatacaq İV Bakı Qlobal Forum barədə yazırlar.

Ölkənin müxtəlifyönlü problemləri isə müstəqil medıanın aparıcı mövzusu kimi qalmaqda davam edir

Dövlət başçısı İlham Əliyev: “Təəssüf ki, dəyişikliklər müsbət məcrada deyil”

Rəsmi “Azərbaycan” qəzeti əsas diqqəti Bakıda keçirilən “Çox qütblü dünyaya doğru” IV Bakı Qlobal Forumuna yönəldir. Bu mənada qəzet Forumda dövlət başçısı İlham Əliyevin çıxışını ilk səhifədə yerləşdirib. Dövlət başçısı Forumun əhəmiyyətindən danışmaqla yanaş indiki beynəlxalq durumu da dəyərləndirir. Sitat: “Sonuncu dəfə ötən ilin yazında görüşümüzdən bu günədək dünyada vəziyyət dəyişmişdir. Hamımız bunun şahidiyik və təəssüf ki, dəyişikliklər müsbət məcrada olmamışdır. Dünya daha da sakit və təhlükəsiz olması əvəzinə daha da təhlükəli olmuşdur. Bizim regionda da vəziyyət kəskin şəkildə dəyişmişdir. Mövcud münaqişələr həll edilməmiş qalır, yeni təhlükə bölgələri yaranır.” Dövlət başçısı İlham Əliyev mövcud durumu belə dəyərləndirib.

Keçmiş səfir Arif Məmmədov: “Daha dəhşətli xəyanətlər üzə çıxacaq”

“Azadlıq” qəzeti maliyyə naziri Samir Şərifovun barəsində səslənən “üçqat agent” iddiasına Azərbaycanın Avropa Şurasındakı keçmiş səfiri, ictimaiyyətin tanıdığı Arif Məmmədovun münasibətini önə çəkib. A.Məımmədov Facebook səhifəsində bunun mümkünlüyünü təsdiqləyir.

“Rusiya kəşfiyyatının yüksək rütbəli və çox məlumatlı agenti Yuri Şvets tərəfindən yayılmış məlumat ölkəmizin dəhşətli təhlükə qarşısında olduğunun göstəricisidir”. A. Məmmədov Rusiya kəşfiyyatının agenti Yuri Şvetsin S.Şərifov haqqında “üçqat agent” deyimini belə dəyərləndirib.

Eyni zamanda diplomat ictimaiyyətə xəbərdarlıq da edir. “Yaxınlarda daha dəhşətli xəyanətlərlə bağlı faktlar üzə çıxacaq, ölkəmiz dəhşətli təhlükə qarşısındadır, ayılmaq vaxtı gəlib”. Keçmiş səfirə görə, Dağlıq Qarabağ məsələsinin indiki şəkildə olması belə xəyanətlərin nəticəsidir.

“Sizi əmin edirəm ki, ölkə daxilində dövlətçilik əleyhinə işləyən çox nüfuzlu şəbəkə mövcuddur və bu şəbəkəyə hakimiyyətin ən nüfuzlu simaları daxildir. Bu şəbəkəyə olkənin nazirləri və nazir müavinləri, PA (Prezident Administrasiyası – red.) bir çox yüksək vəzifəli şəxsləri, səfirlər daxildir. Bu faktlar barədə keçmiş MTN naziri Eldar Mahmudov da bilirdi və rəhbərliyə müvafiq məruzə etmişdi”. Keçmiş səfir A.Məmmədov bunu yazır.

V.Bayramlı: “Etimadsılzıq buna səbəb oldu”

Yaxın günlərə qədər dövlət orqanı olan Mərkəzi Bankın “publik hüquqi şəxs”ə dönməsi barədə ekspertlər “Yeni Müsavat” qəzetinə şərhlər veriblər. Ekspert V.Bayramlıya görə, bu  iki devalvasiyadan sonra xalqın Mərkəzi Banka etimadsızlığının nəticəsidir. “Mərkəzi Bankın səlahiyyətlərinin Maliyyə Bazarlarına nəzarət Palatasına verilməsi doğru addımdır”. V.Bayramlı bank sektorunu qorumaq üçün institusional islahatlara ehtiyac var idi və ona görə də Maliyyə Bazarlarına Nəzarət Palatası yaradıldı. Ekspertə görə, Palatanın yaranmasına daha bir səbəb Mərkəzi Banka olan etumadsızlığı qısa müddətdə aradan qaldırmağın mümkünsüzlüyüdür. Onun fikrincə, manata inamın artırılması  belə Mərkəzi Banka etimadın formalaşmasına bağlıdır. “Mərkəzi Banka cəmiyyətin, bankların, xüsusən də vətəndaşların etimadı formalaşmayacaqsa, o zaman manata inamı bərpa etmək çox çətin olacaq”. V.Bayramlı Mərkəzi Bank barədə bu qənaətdədir.

Bu adda şirkət yoxdur

“AzTV”yə ayrılan milyonlar necə xərclənib?” adlı məqalə dərc edilib “Bizim Yol” qəzetində. “Azərbaycan Televiziya və Radio Verilişləri” QSC-də dövlət vəsaitlərinin necə xərclənməsi araşdırma mövzusudur.

Qəzet yazır: “2010-cu ildə QSC üzrə 8 tender barədə məlumat istənilib. Həmin il “Broadcast Premier Solitions” şirkətindən tender yolu ilə 3 milyon 400 min manata yaxın avadanlıq alınıb. Amma alınan avadanlıqların qiymətlərinin reallığa nə dərəcədə uyğun olmasının belə araşdırılması lazım gəlir. Qəzet qeyd edir ki, məsələnin maraqlı tərəfi aşağıdakıdır. “Şirkətə gəlincə, nə qədər axtarış versək də “Broadcast Premier Solitions” adlı şirkət Azərbaycanda üzə çıxmadı, xarici saytlarda buna bənzər adlar var, amma tam olaraq bu adda şirkət yoxdur. Kimdir, bizim ölkəyə necə gəlib, tenderi necə qazanıb, bu məlum deyil, QSC-dən 2 milyon manatlıq sifariş alan da onun kimi”. Bununla qəzet bu məsələdə şəffaflıq olmadığını ortaya qoyur. Daha sonra qeyd edilir ki. QSC-də bəzi məsrəflər hər il təkrarlanır, qalib şirkətlər isə dəyişməz olaraq qalır. Hıəm də “Az.TV” ayrılan vəsaitin çox cüzi hissəsinin tender yolu ilə xərcləndiyinə diqqət çəkilir.