Media-icmal 14.02.20

Parlament seçkiləri - gündəmin prioriteti

2020-ci il fevralın 9-da keçirilmiş parlament seçkilərinin nəticələri ətrafında müzakirələr ölkə medasının prioritet mövzusu kimi qalmaqda davam edir.

Belə ki, bu seçkilərdə nəticələrə təsir edən pozuntular olması iddiası ilə bir qrup deputatlığa namizəd fevralın 12-də Mərkəzi Seçki Komissiyasının (MSK) binası önündə aksiya keçirdi.

Aksiya müdaxilə nəticəsində dayandırıldı, amma bundan sonra MSK ayrı-ayrı dairələr üzrə seçkilərin nəticələrinə dair sosial şəbəkələrdə yayılmış videomateriallar əsasında araşdırmalara başladı.

Həmin araşdırmaların nəticəsi olaraq 80 saylı İmişli-Beyləqan seçki dairəsi  (lider namizəd Çingiz Qənizadə), 74 saylı Lənkəran kənd seçki dairəsi (lider namizəd Hadı Rəcəbli), 35 saylı Xətai üçüncü seçki dairəsi (lider namizəd Rauf Arifoğlu), 33 saylı Xətai birinci seçki dairəsi (lider namizəd Hüseynbala Mirələmov) üzrə nəticələr ləğv edildi.    

Amma ölkənin internet resurslarında yayılan məlumata görə, MSK-nın iclasında daha 20 seçki dairəsi üzrə araşdırmalar gözlənilir.

Eyni zamanda, internet resurslar seçki pozuntuları ilə bağlı dövlət başçısı İlham Əliyevin fevralın 12-də Kürdəmir rayonunda “ASAN-xidmət” Mərkəzinin açılışında seçkilərə münasibətini ifadə edən çıxışından sitat da verir: 

“Biz də bəyan etmişik ki, mövcud olan pozuntular ciddi araşdırılacaq, pozuntulara yol vermiş şəxslər cəzalandırılacaq və bundan sonra da biz bütün beynəlxalq təşkilatlarla bu istiqamətdə fəaliyyətimizi və əməkdaşlığımızı davam etdirəcəyik”, - deyə İlham Əliyev həmin görüşdə bildirib.

Bununla yanaşı, ayrı-ayrı peşə sahibləri də bu nəticələrə münasibət ifadə edərək, seçki saxtakarlığını pisləyirlər.

Münasibət ifadə edənlər vurğulayırlar ki, Milli Məclisdə elə adamlar var ki, 25-30 ildir deputatdırlar, amma xalqın mənafeyi naminə danışmayıblar.

Fikir müəllifləri hesab edirlər ki, bəzi vəzifəli şəxslərə görə xalq da dövlətdən narazı salınır: “Həmin deputatları xalq istəmir, seçicilərin əksəriyyəti həmin namizədlərdən narazıdırlar, ona səs vermirlər. Ötən gün cənab Prezident çox haqlı olaraq bildirdi ki, seçkilərdə qanunsuz hərəkətlərə yol verən şəxslər cəzalandırılacaq. Qoyun onlar cəzalandırılsın, xalq da həqiqəti görsün”, deyə müəlliflər bildirirlər.

Müəlliflər deyirlər ki, həmin deputatları dəfələrlə qovurlar, fitə basırlar, amma bu şəxslər bunun səbəbləri barədə düşünmürlər: “Onlar özlərinə sual verməlidir ki, əgər məni buradan qovurlarsa, mən niyə deputat olmalıyam?”.

“Azərbaycan” qəzeti isə əvvəlcə dövlət başçısının Kürdmirədki məlum çıxışından sitatlar gətirir, daha sonra isə seçkilərdə müşahidəçi kimi iştirak etmiş bəzi xarici təşkilatların rəylərinə əsaslanaraq seçkilərin yüksək dəyərləndirildiyini bildirir.

Yazı müəllifi hesab edir ki, 1300-dən çox namizədin prosesə qatılması seçkinin rəqabətli şəkildə keçirilməsinin göstəricisi olub.

O, Türkiyədən, MDB ölkələrindən olan beynəlxalq müşahidəçilərin fikirlərinə əsasən seçkilərin şəffaf, sakit qaydada keçdiyini bəyan edir.