Media-icmal 15.08.2016

Ölkədə iqtisadi inkişaf və siyasi sabitlik, hökumət şiddətinə münasibət, mülkiyyət hüququnun tapdanması bugünkü medianın aparıcı mövzusudur.       

İqtisadi inkişaf və siyasi sabitlik adası

“Azərbaycan” qəzeti Azərbaycanın yerləşdiyi regionda yerini və rolunu dəyərlərndirən “Cənubi Qafqazın logistik mərkəzi” sərlövhəli məqalə ilə çıxış edib.

(http://www.azerbaijan-news.az/index.php?mod=3&id=103012)

Müəllif bu gün dünyada tüğyan edən terrorizm, ekstremizm, islamofobiya kimi təhlükəli amillərin bəşəriyyəti ciddi təhlükələr qarşısında qoyduğunu bildirir. 

Müəllifin ikrincə, belə gərgin durumun yaranmasına səbəb dünyanın bəzi dövlətlərinin beynəlxalq hüququn norma və prinsipləri ilə açıq-aşkar hesablaşmadan öz maraqlarını reallaşdırmağa cəhd göstərmələridir. Müəllif deyir ki, Yaxın Şərq və Avropada son zamanlar baş verən terror hadisələri bir daha sübut edir ki, bu gün terrorizm qeyri-rasional mübarizə vasitəsinə çevrilib və demək olar ki, nəzarətsizdir.

Müəllif Azərbaycanın Cənubi Qafqazda əlverişli coğrafi məkanda yerləşməsini əsas gətirərək ölkəni regionun logistik mərkəzi adlandırır: “Avrasiya məkanında Qərblə Şərqi, Cənubla Şimalı birləşdirən ənənəvi və yeni kommunikasiya, nəqliyyat, enerji dəhlizləri bu mərkəzdən keçir. Strateji əhəmiyyətli layihələrin reallaşdırılması nəticəsində ölkəmiz Avropanın enerji təhlükəsizliyinin arxitekturasında mühüm yer tutur”.

Müəllifə görə, bu baxımdan Azərbaycan lideridir və “Azərbaycan 2020: Gələcəyə baxış” konsepsiyasında ölkənin statusunun artırılması, onun regional lider dövlətdən beynəlxalq iqtisadi əlaqələr sistemində rəqabətə davamlı iştirakçı səviyyəsinə çevrilməsi hədəf götürülüb.

Məqalədə Azərbaycanın beynəlxalq layihələri öz hesabına maliyyələşdirdiyi, regionun etibarlı və güclü dövlətinə çevrildiyi, öz mültikultural dövlət modelini dünyaya təqdim etdiyi, sabit iqtisadi inkişafa malik olduğu xüsusi vurğulanır. Müəllif ölkədə siyasi sabitliyin olmasını xalqla iqtidarın monolit birliyinin nəticəsi kimi dəyərləndirir və dövlət başçısı İlam Əliyevdən sitat gətirməklə deyir: “Ölkə qarşısında duran bütün əsas vəzifələr uğurla icra edilir. Bunun təməlində düşünülmüş siyasət, apardığımız islahatlar və ölkəmizin gələcəyi ilə bağlı olan proqramlarımız dayanır”.

Təsirin əks-təsiri

“Azadlıq” qəzeti “Siz repressiyanı artırdıqca daha çox adam mübarizəyə qoşulacaq” sərlövhəli məqalədə (http://www.azadliq.info/152021.html)  AXCP sədri Əli Kərimlinin siyasi həbslərə etiraz mövqeyini nəzərə çatdırır.

AXCP sədri hakimiyyətin son günlərdə yeni həbslərə başlamasına münasibət ifadə edərək bu addımın hakimiyyətə qarşı etirazları azaltmayacağını, əksinə artıracağını bildirir. O, hakimiyyət rəsmilərinə yeni repressiya dalğası ilə cəmiyyətdə qorxu yaradacaqlarını düşünmələrinin əbəs olduğunu vurğulayır. Müəllif deyir ki, “Nardaran işi” üzrə məhkəməni izləyir və qəti əminliklə deyə bilər ki, son illərdə ən çox və daha şiddətli işgəncə məhz Tale Bağırzadə və onun əqidədaşlarına verilib. Məqalədə vurğulanır ki, Tale Bağırzadə ilə birlikdə həbs edilənlərin xeyli hissəsi sadə insanlardır, baxmayaraq ki, o insanları bu gedişlə uzunmüddətli cəzalar gözləyir. AXCP sədri bu qədər dəhşətli işgəncələrə məruz  qalan bu insanlar arasında qorxan, əqidə və mübarizəsindən imtina edən bir nəfəri belə görmədiyini söyləyir. O, hakimiyyət rəsmilərini artıq nəinki həbslərin, hətta işgəncələrin belə əvvəlki zamanlardakı effekti vermədiyini dərk etməyə çağırır: “Siz qanunsuz həbsləri, repressiyaları, haqsızlığı artırdıqca daha çox adam öz daxili qərarını verir ki, ölkə belə davam edə bilməz və şəxsən o, imkan düşən kimi bu tiranlıqla mübarizəyə qoşulacaq”.

Xatırladaq ki, avqustun 12-də gecə saatlarında REAL hərəkatının icra katibi Natiq Cəfərli həbs edilib, ona qarşı qanunsuz sahibkarlıq, veridən yayınma kimi ittihamlar irəli sürülüb. Demokratik ictimaiyyət bütün bu ittihamları rədd edərək N.Cəfərlinin siyasi fəaliyyətinə görə həbsə alındığını bildirirlər. 

Ayaq altında olan hüquq

“Yeni Müsavat” qəzeti “Bakıda daha bir bina sakinlərin razılığı olmadan sökülür” (http://musavat.com/news/reportaj/bakida-bina-sakinlerin-raziligi-olmadan-sokulur-sakinler-evden-chixmir-fotolar_370353.html) sərlövhəli məqalədə paytaxtda mülkiyyət hüququna münasibətdə növbəti özbaşınalığı müzakirə edir. Bakıda yaşayış binası sakinlərin razılığı olmadan sökülür.

Müəllif deyir ki, tikinti şirkəti uyğun qurumlardan razılıq aldığını bildirir, sakinlər isə təklif edilən şərtlərlə razılaşmırlar. Hadisə isə Yasamal rayonu, Abbas Mirzə Şərifzadə, 86 ünvanda baş verir. Söküntü işini “İnşaat konstruksiyalar” MMC aparır.

Sakinlər deyir ki, binaya təbii qazın verilməsi də dayandırılıb. Məqalədə deyilir ki, bina sakini Meriban Vəliyeva onlarda olan məlumata örə,  2014-cü ildə bu şirkətin tikinti işləri aparmaq səlahiyyəti əlindən alınıb. Buna da səbəb şirkətin paytaxtın bir neçə yerində tikintisinə başladıqları binaları başa çatdırmamasıdır.  Bu şirkətin 2003-cü ildə təhvil verməli olduğu 16 mərtəbli bina hələ də yarımçıq olaraq qalır.

Müəllif sakinlərə istinadən deyir ki, tikinti şirkəti binanın qəzalı durumda olması barədə FHN-dən sənəd alıb, amma həmin sənəddə möhür belə yoxdur. Sakinlər binadakı şəraitdən və yaşayışlarından narazı olmadıqlarını deyirlər. Köçürülmə şərtləri ilə razılaşmadıqları üçün dəfələrlə  Nazirlər Kabinetinə və Prezident Administrasiyasına da üz tutublar.

Müəllif deyir ki, şirkət sakinlərə müvəqqəti olaraq kirayəyə köçməyi təklif edərək bina hazır olanda onlara ev veriləcəyini, indiki mənzil sahəsindən 25 faiz artıq olacağı vədi verir. Sakinlərin sözlərinə görə, Nazirlər Kabinetində onlara deyilib ki, şirkət qarşısında ya sakinlərə əvvəlcədən kirayə haqqı ödəmək, yeni bina tikiləndə evlə təmin olunmaq,  ya yeni tikilən başqa binalarda təmirli mənzillərlə təmin olunsunlar, ya da kvadratmetri 2500 manatdan hesablanaraq sakinlərə mənzillərin pulu ödənilsin”.