Media-icmal 19.02.20

“Sədərək” Ticarət Mərkəzində baş vermiş yanğının sürətlə genişlənməsinin səbəbləri, vətəndaşa kommunal borc iddiası, siqaretlərin təkrar bahalaşa bilməsinin mümkünlüyü və s. məsələlər medianın aparıcı mövzuları sırasındadır.

 “Marja.az”da  “FHN rəsmisi “Sədərək”in rəhbərini ittiham etdi” sərlövhəli məqalə oxumaq olar.

Müəllif  Fövqəladə Hallar Nazirliyi (FHN) Dövlət Yanğın Nəzarəti Xidmətinin (DYNX) şöbə rəisi Elnur Babayevə istinadən Bakıda yerləşən “Sədərək” Ticarət Mərkəzində fevralın 18-də baş vermiş yanğının sürətlə genişlənməsinin səbəbləri barədə bildirir.

E.Babayevin deməsinə görə, “Sədərək” Ticarət Mərkəzində baş verən yanğının genişlənməsinə səbəb mağazalar arasında arakəsmələrin olmamasıdır”.

E.Babayev iddia edir ki, tikinti zamanı Ticarət Mərkəzi yanğına qarşı tələblərə əməl etməyib.

FHN rəsmisinə görə, belə yanğınların əsas səbəbi elektrik qurğularının düzgün quraşdırılmaması, avtomatik yanğın xəbərverici siqnalizasiyanın tələb olunan bütün sahələri əhatə etməməsidir.

E.Babayevin deməsinə görə, Ticarət Mərkəzinə məxsus yanğınsöndürmə xidmətinin fəaliyyəti yarıtmaz səviyyədədir, Ticarət Mərkəzinə məxsus Yanğından Mühafizə Hissəsi 2 yanğınsöndürmə maşını ilə təchiz edilib və bu yanğın bir daha göstərdi ki, həmin idarənin əməkdaşları qeyri-peşəkardırlar. 

FHN rəsmisi deyir ki, hələ 2019-cu ildə mərkəzə nazirlik tərəfindən dəfələrlə xəbərdarlıq olunub, amma buna məhəl qoyulmyıb.

Onun sözlərinə görə, belə iri Ticarət mərkəzlərində tikinti zamanı bina yanğına qarşı sədlərə bölünməlidir: “Mağazalar bir-birindən arakəsmə sədlərlə, divarlarla ayrılmalıdır. Mağazaların böyük əksəriyyətinin divarları bitişikdir. Bu da yanğının tez bir zamanda yayılmasına təkan verir”.

E.Babayevin deməsinə görə, dəfələrlə edilən xəbərdalığa baxmayaraq, “Sədərək” Ticarət Mərkəzində müvafiq tdbirlər həyata keçirilməyib”.

Xatırladaq ki, 2019-cu ilin martında “Diglas”, eləcə “EuroHome” Ticarət mərkəzlərində baş vermiş yanğınların sürətlə yayılmasını  FHN dükanlar arasında yanğına qarşı arakəsmələrin olmaması ilə izah edirdi.

“Yeniavaz.com” "Azərsu" yaşayış olmayan ünvana 1 116 manat borc yazıb – məhkəmə qərarı” sərlövhəli məqalədə vətəndaşa qarşı haqsızlıq barədə yazır.

Müəllifin deməsinə görə, “Azərsu” ASC Sumqayıt sakini Malik Hacızadəyə 1 116 manat məbləğində borc yazıb.

Yazı müəllifi əlavə edir ki, bu borcla bağlı Sumqayıt Şəhər Məhkəməsinə müraciət edən vətəndaşın iddiası təmin edilib: “Qətnaməyə əsasən iddiaçı Malik Hacızadənin yaşadığı Sumqayıt şəhəri, 9-cu mikrorayon, ev 72, mənzil 68 ünvanına hesablanmış 1 116 manat məbləğində borcun silinməsi qət edilib”.

Məqalə müəllifi vurğulayır ki, “Azərsu” ASC-nin qərardan verdiyi apellyasiya şikayətinə Sumqayıt Apellyasiya Məhkəməsində baxılıb, şikayət təmin olunmayıb.

Müəllif xatırladır ki, “Azərsu” ASC-nin “Sumqayıt Sukanal” İdarəsi tərəfindən borc yazılan ünvana 7 nəfər ailə tərkibinə görə hesabat aparılıb.

İddiaçı isə bildirib ki, həmin mənzildə yaşayış olmayıb və o, ailə üzvləri ilə birlikdə xarici ölkədə yaşayıb.

Sumqayıt Şəhər İcra Hakimiyyəti Mənzil Kommunal Təsərrüfatı İstehsalat Birliyinin 14 saylı Mənzil Kommunal Sahəsi tərəfindən tərtib edilmiş aktdan görünür ki, ona məxsus mənzildə yaşayış olmayıb. Bu səbəbdən də yazılan borc əsassız hesab edilib.

“Sfera.az” “Siqaretlər nə qədər bahalaşacaq?-ekspertdən gözlənilən qiymət artımı ilə bağlı açıqlama” məqalədə siqaretlərin bahala biləcəyinin mümkünlüyündən yazır.

Müəllif bahalaşmanın mümkünlüyü barədə “İqtisadi və Sosial İnkişaf” Mərkəzinin sədri Vüqar Bayramovla söhbətləşir: “Aksiz dərəcəsinin artımından sonra siqaretin də qiyməti bahalaşacaq. Ancaq bu bahalaşmanın nə qədər olacağını proqnozlaşdırmaq çətindir”, - iqtisadçı-ekspert V.Bayramov belə bildirib.

V.Bayramov “Sfera.az”-a  bildirir ki, aksiz vergisi siqaretin xərcinin müəyyən hissəsini təşkil edir. Düzdür, xərc yalnız aksiz vergisindən ibarət deyil. Siqaretin istehsalı prosesində digər xərclər də yaranır. Amma sözsüz ki, aksiz dərəcələrinin artırılması siqaretin maya dəyərinə mənfi təsir edir”.

Ekspert deyir ki, maya dəyəri artdığından siqaretin qiymətində də artımlar baş verir və bu baxımdan aksiz vergisinin artması ölkədə siqaretin qiymətinin bahalaşmasına gətirib çıxaracaq.

Onun deməsinə görə, hər halda bu qiymət artımının hansı intervalda olduğunu sahibkarlar müəyyənləşdirəcək.

V. Bayramoov bu məsələ ətrafında müəyyən təkliflərlə çıxış etdiklərini dedi: “Təklif edirik ki, prosesin ailə büdcəsinə mənfi təsir etməməsi üçün yerli siqaret istehsalı üzrə qiymətlər optimallaşdırılsın. Yerli siqaretlər aşağı qiymətlərlə təklif olunmalıdır ki, aksiz vergisinin artımı vətəndaşların büdcəsinə ziyan vurmasın”.

Xatırladaq ki, bu ilin əvvəlində Azərbaycanda siqaretlərin qiyməti 30 qəpik bahalaşdı və bu, aksiz markalarına görə ödənişlərin bahalaşması ilə izah edilidi.