Media-icmal 20.01.16

Ölkədə yaşanan ağır böhran və Milli Məclisin növbədənkənar iclası medianın əsas mövzusudur.

Rəsmi qəzetlər dövlət başçısı İlham Əliyevin müxtəlif fəaliyyət sahələrində çalışan insanların əmək haqlarının artırılması haqda sərəncamlarının mətnlərini ilk səhifələrdə yerləşdiriblər. Bu qəzetlər parlamentin dünənki iclasına təqdim edilən qanunlara dəyişiklikləri “yeni siyasətin yürüdülməsi,” “insanların sosial müdafiəsinin gücləndirilməsi” kimi şərh edirlər.

Dövlət idarələrində kütləvi ixtisarlara start verildiyini, iri ticarət mərkəzləri və bazarlarda erirazların başladığını yazan “Azadlıq” qəzeti “bunu ölkənin ağır böhran məngənəsində” olması kimi dəyərləndirir.

“Repressiyaları durdurun, tutulanları azad edin, xalqı dinləyin və problemlərin həllli üçün təcili tədbirlər görün” deyə Milli Şura rəsmi Bakıya bahalığa qarşı etiraz edərək həbs olunanlarla bağlı bəyanat yayıb.

Milli Məclisdə dollarla kreditlərin ödənilməsi ilə bağlı qərarın təxirə salınmasını qəzet “oliqarxların vətəndaşlara güzəşt etmək istəməməsi” adlandırır. Böhranla bağlı 100 minə kimi iş yerinin ixtisar edildiyi halda nazir Şahin Mustafayevin 15 min iş yerinin açılması bəyanatını qəzet “nazirin gülməli optimizmi” hesab edir.

Böhrandan çıxış yolu kimi hökumətin geniş özəlləşdirmə aparmaq bəyanatlarına ekspertlər “öncə biznes mühitini asanlaşdıran qanunvericilik islahatları aparılmalıdır” şərhini veriblər.

“Eksperss”   5 min dollara qədər kredit götürənlərə güzəşt olacağı haqda Mərkəzi Bankın açıqlamasını “bankın ümid verməsi” kimi dəyərləndirir.

Milli Məclisin sədri Oqtay Əsədovun “heç kəsi krediti dollarla götürməyə məcbur etmirlər. İş adamlarına kredit dollarla ona görə verilir ki, xarici tərəfdaşlarla ticari münasibətlərdə istifadə etsinlər. Xalq üçün ağlayanda banklar üçün də ağlayın” bəyanatını “Novoe Vremya” qəzeti “spikerin kredit götürənləri məyus etməsi” adlandırır.

“Bizim yol” qəzeti Milli Məclisdə bəzi qanunlara dəyişiklikləri “parlamentin antiböhran dəyişikliklərini qəbul etməsi, sahibkarlara geniş imkanlar açılması” kimi dəyərləndirir. Ekspertlər isə bu addıma “qanunların qəbul olunması hələ problemlərin həlli demək deyil” şərhini verirlər.

Milli Məclisin dünənki iclasına dövlət başçısı İlham Əliyevin qanunlara dəyişikliklərlə bağlı təqdim etdiyi təklifləri “Yeni Müsavat” “inqilabi dəyişikliklər” adlandırır.

Rəsmi Bakının böhrandan irəli gələrək ölkədə biznes mühitini yaxşılaşdırmaq bəyanatlarına cavab olaraq illər öncə poladəritmə zavodları əllərindən zorla alınan Zülfüqarlı qardaşları ölkəyə qayıdaraq bu zavodları işlətməyə hazır olduqlarını bildiriblər.