Media-icmal 21.02.20

Növbədənkənar parlament seçkiləri, Dövlət Təhlükəsizliyi Xidmətinin Neftçalada keçirdiyi əməliyyat, ictimai-iaşə sistemindəki problemlər və s. medianın aparıcı mövzuları sırasındadır.

“Moderator.az”da “Hərə bir himayəçiyə arxayın olub, dalğanın özündən yan keçəcəyini düşünürsə, yanılır...”  sərlövhəli yazıda  müəllif Dövlət Təhlükəsizlik Xidmətinin Neftçalada keçirdiyi əməliyyat nəticəsində rayon icra başçısı İsmayıl Vəliyevin həbsilə nəticələnən əməliyyat barədə danışılır.

Müəllif məsələ ilə bağlı lider namizədlərdən biri, Böyük Quruluş Partiyasının sədri Fazil Mustafa ilə şöhbətləşir.

F.Mustafa əməliyyat nəticəsində həbslərlə bağlı deyir ki, heç kim himayəçisinə  arxayın olub at oynatmasın: “Ağstafada icra başçısının qandallanmasından da nəticə çıxarmırlarsa, o zaman "balaca padşahlar"la necə davranılmalıdır?” sualını gündəmə gətirir”.

Partiya sədri vurğulayır ki, bu, ilk presedent deyil və öncəki icra başçılarının bu motivlə həbsləri göstərdi ki, bu proses davam edəcək. Ancaq nədənsə çevrəsində baş verənlərdən nəticə çıxarmayan vəzifəli şəxslər var”, - F.Mustafa bildirir.

F.Mustafa hesab edir ki, digər vəzifəli şəxslər bu həbslərdən dərs götürməlidir: “Hərə bir himayəçiyə arxayın olub, dalğanın özündən yan keçəcəyini düşünürsə, əlbəttə ki, yanılır. Xalqın ən alt təbəqələrinin maaşına göz tikənlərin tamahı öz başlarına bəla olur. Cəmiyyətimiz bu cür vəzifəsindən sui-istifadə edənlərə qarşı həyata keçirilən tədbirləri dəstəkləyir”, - o vurğulayıb.

Xatırladaq ki, analoji əməliyyat 2019-cu il dekabrın 19-da Ağstafa rayonunda keçirilmişdi və icra başçısı Nizaməddin Quliyev həbs olunmuşdu.

“Azadlıqinfo”isə “Bu da Azərbaycan adlı ölkədə daha bir “ədalət” nümunəsi” sərlövhəli məqalədə keçirilmiş növbədənkənar parlament seçkilərinin gedişindəki pozuntulara diqqət çəkir.

Müəllif seçkilərdə Lənkəran-Astara seçki dairəsində müşahidəçi olmuş Jalə Bayramovaya qarşı Mərkəzi Seçki Komissiyasının fevralın 20-də ifadə etdiyi mövqeyə münasibət bildirir.

Müəllif deyir ki, J.Byaramovanı seçki məntəqəsində döyüb, sürüyüblər, buna isə MSK belə münasibət bildirir: “...digər xanım müşahidəçiyə xəbərdarlıq edir ki, onu çəkməsin, bu xanım isə çəkməyə davam edib. Belə olan halda mübahisə düşüb və həmin görüntü yayılıb. Sonra bütün dünyaya yayıblar ki, həmin xanımı döyüblər, şikayət ediblər. Bu da bütün dünyaya dezinformasiya yaymaqdır...Çəkilən qadın hüquq-mühafizə orqanlarına müraciət edib. Onu çəkən xanımı qanunla cəzalandıracaqlar”.

Müəllif isə vurğulayır ki, əvvəla, MSK sədri prokuror, məhkəmə deyil ki, kiminsə cəzalandırılacağını bəyan etsin, J.Bayramovaya əl qaldıran Azadə Kərimova seçici, məntəqə üzvü, müşahidəçi deyil, onun məntəqədə mövcudluğu faktı qanunsuzdur.

Müəllif əlavə edir ki, seçki məntəqəsi ictimai yerdir, seçki gedir, çəkiliş də seçki məntəqəsində olub: “Nəhayət, Jalə vəhşicəsinə döyülüb, fiziki zor faktı göz qabağındadır. Bu, videoları izləyənləri də hiddətləndirib, amma döyənə qarşı işi bağlayıb, döyülənə qarşı iş açmaq onu göstərir ki, bu, siyasi sifarişlidir. Odur ki, bu iş qanunla deyil, şəxsi göstərişlə icra olunur. MSK sədri də bunu öz məsuliyyətsiz çıxışı ilə təsdiq etdi”,- müəllif bildirir.

Sonda isə müəllif J.Bayramovaya qarşı edilənləri müstəqil fikirli Azərbaycan gəncliyinə, ölkənin gələcəyinə təhdid və təhqir sayır.

“Oxu.az” isə “Restoranların yeni fırıldağı: Şişirdilmiş menyular, “sürpriz” hesablar, pozulan hüquqlar...” sərlövhəli məqalədə ictimai-iaşə sistemindəki problemlərə işıq salır.

Müəllif bu sahədəki problemlərlə bağlı Azad İstehlakçılar Birliyinin (AİB) sədri Eyyub Hüseynovla danışır.

Müəllifin deməsinə görə, Azərbaycanda bəzi restoran sahibləri əcnəbi müştərilər üçün əlavə menyular hazırlayır və bu məsələ müxtəlif sferalarda dəfələrlə müzakirə mövzusu olub. 

Yazı müəllifinin iddiasına görə, sahibkarlar bir çox hallarda nəinki əcnəbi müştərilərin, eləcə də yerli vətəndaşların da “cibinə girməyə” çalışırlar, bununla bağlı bəzi müştərilər sosial şəbəkədə paylaşım ediblər, amma belə faktlar müxtəlif restoranlarda hələ də baş verir.

Müəllif deyir ki, müştərilər restoranlarda seçmədikləri əlavə xidmətlərə görə ödəniş tələb edirlər: “Belə ki, sifariş götürərkən müştəriyə təklif etmədən menyuya əlavələr edib, yekunda müştəriyə “sürpriz” hesab təqdim edilir. Bəzi hallarda isə müştəridən canlı musiqinin hesabını da ödəməsi tələb edilir. Bu isə bir çox hallarda mübahisəyə səbəb olur”, - müəllif vurğulayır.

E.Hüseynov deyir ki, bu problem nəinki turistləri, yerli camaatı da narahat edir, sahibkarlar başa düşmürlər ki, bu, birinci növbədə elə turizm sektoruna zərbədir: “Problem xüsusilə bulvarda fəaliyyət göstərən restoranlarda müşahidə edilir. Aparılan monitorinqlər, ictimai qınaq müəyyən qədər bu problemlərin aradan qaldırılmasına kömək etsə də paytaxtın mərkəzində fəaliyyət göstərən restoranların 60 faizində hələ də eyni problem qalır”, - AİB sədri bildirir,

Onun iddiasına görə, vətəndaş şişirdilmiş qiymətlərdən narazılıq edir,  iş o yerə çatıb ki, restoran sahibləri dəniz mənzərəsində içildikdə adi çayın qiyməti 20 manat olur: “Restoran var ki, müştərinin görünüşünə baxır, xoşu gəlirsə içəri buraxır, əks təqdirdə “yer yoxdur” deyərək içəri buraxmır. Yaxud yanında xanım olmadan bəzi restoranlara girişi qadağan ediblər. Bunlar istehlakçının hüququnun pozulmasıdır.

E.Hüseynovun fikrincə, bu problemin qarşısının alınması üçün tədbir görülməsə, vətəndaşların hüquqları pozulmağa davam edəcək və bu gün onların başına gələn haqsızlıq sabah hər kəsin başına gələ bilər.