Media-icmal 25.01.20

Davos görüşlərinin dəyərləndirilməsi, neftin qiyməti ətrafında müzakirələr, mənzil bazarındakı vəziyyət və s. məsələlər medianın aparıcı mövzuları sırasındadır.

Davos görüşləri-nəticələr

“Azərbaycan” qəzeti “İlham Əliyev diplomatiyasının növbəti təntənəsi sərlövhəli məqalədə dövlət başçısının Davos Dünya İqtisadi Forumundakı görüşlərini dəyərləndirir. 

Müəllif Forum barədə statistik göstəricilər səsləndirərək bu il yanvarın 21-dən 24-nə kimi davam etməsi, 117 ölkənin nümayəndələri, o cümlədən 53 ölkənin dövlət və hökumət başçılarının iştirak etməsini, 400-dən çox açıq və qapalı görüşlərin keçirilməsini, sayca 50-ci olan bu Forimun   “Birgə və davamlı dünyanın maraqlı tərəfləri” adlanmasını diqqətə çatdırır.

Müəllif yada salır ki, bu, həm də 2007-ci ildən bütün iclaslara dəvət edilən prezident İlham Əliyevin sayca 14-cü dəfə Forumda iştirak etməsi demək idi.

Müəllifin sözlərinə görə, Forum Azərbaycanın dünyanın inkişaf etmiş ölkələri və şirkətləri ilə daha yaxından əməkdaşlığına real zəmin yaradır.

Yazı müəllifi deyir ki, dünyanın ekoloji problemləri, dördüncü sənaye inqilabı ilə bağlı müzakirələr gedib və Forumla Azərbaycan arasında imzalanan sənəd də dördüncü sənaye inqilabının inkişafı istiqamətində birgə əməkdaşlığı şərtləndirir.

Müəllifə görə, Azərbaycanın beynəlxalq nəqliyyat dəhlizlərinin reallaşmasındakı rolunu görən bir çox dövlətlər əməkdaşlıqda çox maraqlıdırlar, bu isə ölkə iqtisadiyyatına yatırılan investisiyaların hər il artmasına səbəb olur.

Daha sonra müəllif yanvarın 22-də “Strateji baxış: Avrasiya” mövzusunda keçirilmiş panel iclasında dövlət başçısının moderatorun suallarını cavablandırmasını diqqət mərkəzinə çkir.

Müəllifin deməsinə görə dövlət başçısı müstəqillik illəri ərzində əldə edilən bütün uğurları xalqın müstəqilliyə sadiq olmasının nəticəsi kimi dəyərləndirib.  

Müəllifin fikrincə, bu cavabla dövlət başçısı Azərbaycanın müstəqil, milli maraqlarını ən uca tutan siyasət yürütməsini, qonşu ölkələrlə dostluq, qarşılıqlı faydalı əməkdaşlıq, mehriban qonşuluq prinsiplərinə əsaslanmasını, bu uğurların Forumun  illik hesabatlarında yüksək qiymətləndirilməsini vurğulamış olub.

Müəllif deyir ki, dövlət başçısı ölkədə kadr dəyişikliklərini “İyirmi birinci əsrdə iyirminci əsrin baxışı ilə uğur qazanmaq olmaz” baxışı ilə əsaslandırıb və  seçkilərdən sonra parlamentin də islahatların mühüm hissəsi olacağını söyləyib.

Yazının sonunda isə oxuyuruq: “Heç vaxt Azərbaycan indiki qədər güclü olmayıb. Həyata keçirilən məqsədyönlü siyasət, iqtisadi, siyasi islahatların uğurları isə onu deməyə əsas verir ki, Azərbaycan 2020-ci ildə də prezidentin söylədiyi kimi, uğurla inkişaf edəcək və daha güclü dövlətə çevriləcək”.

Ən yaxşı halda 52-53 dollara satılar

“Müsavat.com” da “Neftin qiyməti 50 dollara düşə bilər- proqnoz” sərlövhəli məqalə oxumaq olar.

Müəllif 2020-ci ildə neftin qiymətinin dünya bazarında enə biləcəyi mümkünlüyü ilə bağlı iqtisadçı-ekspert Fikrət Yusifovla söhbətləşir.

Müəllif  deyir ki, 2020-ci ildə dünya bazarlarında neftin qiymətinin 50 dollara, hətta ondan aşağı düşəcəyi barədə proqnozlar meydana çıxıb.

Müəllif əlavə edir ki, ekspertlər buna əsas kimi Amerikanın İranla yaşadığı gərginliyi və Çinlə apardığı ticarət müharibəsini göstərirlər.

F.Yusifov da hesab edir ki, indi dünyada hər şey Amerika-Çin münasibətlərinin necəliyindən asılıdır. “Bu, daha çox Amerika-Çin münasibətlərinin bundan sonrakı inkişafından asılı olacaq. Çünki dünya iqtisadiyyatının 40%-ə qədərini bu iki ölkə verir. Amma burada bir məsələ var. Son zamanlarda müəyyən bir sənəd imzalayıblar. Nəticədə münasibətlərdə müəyyən yumşalma əmələ gəlib. Ancaq bu aysberqin görünən hissəsidir”. İqtisadçı hesab edir ki, ABŞ güzəştə getmədiyi halda dünya iqtisadiyyatına ciddi təhdid yaranacaq və bu təhdidin nəticəsi olaraq, neftin qiymətlərinin kəskin şəkildə aşağı düşməsi baş verə bilər: “Real görə bildiyim, dəyərləndirdiyim budur. Bunlar təkcə mənim fikirlərim deyil, Vəziyyəti real şəkildə qiymətləndirən hər kəs bu cür düşünür”deyə F.Yusifov söyləyib.

İqtisadçı hesab edir ki, Amerika-İran münasibətləri də neftin qiymətinə təsir edə bilər, bunlar dünya iqtisadiyyatını təhdid edən məqamlardır və əgər iqtisadiyyata təhdid varsa, orada istər-istəməz artım tempi yerinə azalma baş verir.

F.Yusifov Azərbaycan neftinin taleyilə bağlı deyir ki, dünya bazarında neftin qiyməti aşağı düşəcəksə, Azərbaycan neftinin bir qiymətdə qalması mümkün deyil: “Sadəcə olaraq, bizim neft keyfiyyət baxımından digər ölkələrdə istehsal olunan neftdən daha yüksək olduğu üçün qiymət fərqi bir neçə dollardır. Burada başqa heç bir fərq yoxdur. Əgər bu gün dünya bazarında Səudiyyə Ərəbistanı, İraqın nefti 64 dollara satılırsa, bizim neft 67-68 dollara satılır. Amma neftin qiyməti 50 dollara və ya ondan aşağı düşəcəksə, bizim neft 64 dollara satılan deyil, Ən yaxşı halda 52-53 dollara satılacaq. Əsas fərqlər bundan ibarətdir”.

Bakının ən bahalı mənzilləri harada?

“Modern.az”da isə “Bakıda ən bahalı mənzillər bu ünvanlarda yerləşir”  sərlövhəli məqalə diqqət çəkir.

Müəllif Bakıda ən bahalı mənzillərin yerləşdiyi ərazilər barədə daşınmaz əmlak üzrə ekspert, “Property" Qiymətləndirmə şirkətinin direktoru Pərviz Qulami ilə söhbətləşir.

  P.Qulami İpoteka və Kredit Zəmanət Fondu tərəfindən satışı barədə elan verilən kirayə mənzillərin daşınmaz əmlak bazarına təsirinin mümkünlüyü barədə deyib: “Fond tərəfindən təklif edilən kirayə mənzillərin sayının məhdud olduğu üşün bazara ciddi təsiri olmayacaq. Çünki Bakıda cəmi iki nöqtədədir”,- ekspert bildirib.

Əksinə, P.Qulami mənzil bazarında durğunluğun növbəti aylarda da davam edəcəyinin proqnozlaşdırıldığını deyib:“Hazırda bazarda passiv durğunluqdur. Bazarda canlanma əhalinin əlində nağd pul olduqda, ya da hansısa ərazidə söküntü işlərinə start verildikdə müşahidə edilir. Keçən ilin son 6-7 ayında bazarda sakitlik idi, çünki Fond vəsaitin hamısını kirayə mənzillərin alışına yönəltmişdi. Buna görə ipotekaya ayrılan vəsaitlər az oldu və mənzil bazarında durğunluq yaratdı”.

P.Qulami deyir ki, bu yaxınlarda ipoteka kreditləşməsi üçün vəsait ayrılacağı gözlənilir: “Bundan sonra müəyyən ərazilərdə bazarda canlanma yaranacaq ki, bu qiymətlərin nisbətən yüksəlməsinə səbəb olacaq. Onu da bildirim ki, qiymət artımı tələbat artan ərazilərdə alıcı aktivliyi olduğu təqdirdə baş verəcək”.

Ekspert Bakıda bahalı mənzillərin təklif edildiyi ərazilərin adlarını da açıqlayıb: “Ən bahalı mənzillər şəhərin mərkəzində yerləşir. Metronun “28 May”, “Sahil”, “İçərişəhər”, “Gənclik”, Nəriman Nərimanov stansiyalarının ətrafındakı mənzillərin qiyməti kifayət qədər yüksəkdir”.

P.Qulaminin deməsinə görə, “Azadlıq”, Həzi Aslanov metrostansiyalarının yaxınlığında, “Xırdalan” ərazisində nisbətən əlverişli qiymətlərə mənzil almaq mümkündür. Şəhərin mərkəzində mənzillərin 1 kvadratmetri 2 min manatdan yuxarı, 2500-2700 manatadır. Bunlar bahalı mənzillər hesab edilir”.