Media-icmal 25.08.20

COVİD-19 pandemiyasına qarşı mübarizə, distant təhsilin mahiyyətinə baxış, bir toy ətrafında müzakirələr və s. medianın aparıcı mövzuları sırasındadır...

Hər kəs məsuliyyətini dərk etsə...

"Azərbaycan" qəzeti "Hər kəs məsuliyyətli olmalı, qanunlara riayət etməlidir" sərlövhəli məqalədə müəllif pandemiyaya qarşı mübarizəni dəyərləndirir.

Müəllif deyir ki, Azərbaycanda fevralda qabaqlayıcı tədbirlərin həyata keçirilməsinə başlanıldı, martın 14-dən sosial izolyasiya qaydaları tətbiq olundu, aprelin 5-dən isə xüsusi karantin rejimi elan edildi.

Müəllifə görə, ən əsası odur ki, pandemiya ilə mübarizə ilk gündən dövlətin diqqət mərkəzində dayandı, koronavirusla mübarizə dövlət siyasətinin prioritetlərindən biridir və bu istiqamətdə ən vacib məsələ, vətəndaşların sağlamlığıdır.

Yazı müəllifi hesab edir ki, koronavirusla mübarizədə müsbət nəticənin əldə olunması təkcə hökumətin yox, hər bir vətəndaşın bilavasitə borcudur: "Hər bir vətəndaş özünü qorusa, yoluxma da olmaz və beləliklə, koronavirus təhlükəsi bir o qədər tez aradan qaldırılar".

Təəssüf ki, hələ də karantin rejiminin qaydalarının pozulması ilə bağlı xoşagəlməz hadisələr baş verməkdədir: "...təhlükəli olması nəzərə alınaraq kütləvi tədbirlərin, o cümlədən toy və yas mərasimlərinin keçirilməsi ilə bağlı qadağa qüvvədədir. Bu qadağanın aradan qaldırılmaması tamamilə doğru və məntiqlidir.

Çünki reallıq və aparılan təhlillər göstərir ki, virusun sürətli yayılmasına yol açan səbəblərdən biri insanların kütləvi şəkildə iştirak etdiyi müxtəlif tədbirlər, o cümlədən toy və yas mərasimləridir. Çünki belə tədbirlərdə sosial məsafə tələblərinə riayət etmək mümkün deyil".

Distant təhsilin sonu necə görünür?

"Yenisabah.az" saytı "Distant dərslər təhsil prosesinin tənəzzülü ilə nəticələnə bilər" sərlövhəli məqalədə distant dərslərin mahiyyəti barədə Təhsil Nazirliyi yanında İctimai Şuranın sədr müavini, təhsil eksperti Nadir İsrafilovla söhbətləşir.  

Onun fikrincə, orta məktəblərdə distant dərslər təhsil prosesinin tənəzzülü ilə nəticələnə bilər.

N.İsrafilov hesab edir ki, məktəbdən uzun müddət uzaq düşmək şagirdlərin məktəb mühitindəki vərdişlərinin itirilməsinə səbəb ola bilər və ənənəvi metoda uyğun dərslər davam etdiriləndə uyğunlaşma ilə bağlı problemlər yaradar.

Ekspertə dərs formatı kimi ən pis halda onlayn və ənənəvi dərslərin qarışıq sistemini uyğun sayır, bunu ən real proqnoz hesab edir: "Ancaq son nəticə ölkədəki epidemioloji vəziyyətdən asılı olacaq".

N.İsrafilov hesab edir ki, hətta epidemioloji vəziyyət məktəblərdə ənənəvi tədrisin bərpa olunmasına imkan versə belə, "Virtual məktəb" layihəsi və televiziyada yayımlanan teledərslər də davam etdirilməlidir.

Ona görə bütün bu məsafəli modellər təhsilin gələcəkdə yeni çağırışlara hazır ola bilməsi üçün lazımdır.

Heç kim alçaldılmayıb - deputatdan iddia

"Azpolitika.info" saytı "Ramiz Mehdiyevi heç kim alçaltmayıb –" İlham Əliyev klanlara müharibə elan edibsə…" sərlövhəli məqalədə deputat Qüdrət Həsənquliyev Milli Elmlər Akademiyasının prezidenti Ramiz Mehdiyevin nəvəsinin toyu ətrafında görülən tədbirləri qiymətləndirir.   

COVİD-19 Pandemiyası ilə əlaqədar karantin davranışlarının pozulması ilə bağlı keçirilən bu toya görə inzibati həbsləri və pul cərimələrinin tətbiq olunmasını deputat qanunların hamıya eyni dərəcədə şamil olunması kimi dəyərləndirir.

Bəzilərinin bəy və gəlinin atalarının qandallanaraq inzibati həbsə aparılmalarını kimisə alçaltmaq kimi şərh etməsinə cavab olaraq deputat deyir: "...İndi hökumət xalqa necə izah etsin ki, vəzifəli şəxslər toy edə, karantin reimini poza bilər, digərləri yox? İlham Əliyev heç kimi alçaltmayıb, əksinə, onun və iqtidarın nüfuzuna olan zərbənin qarşısını almağa, karantin rejimini təmin edən dövlət qurumunun  nüfuzunu qorumağa, sosial ədaləti bərpa və qanunun aliliyini təmin etməyə doğru qətiyyətli addım atıb. 

Kimlərinsə bunu İlham Əliyevin Naxçıvan və Qərbi Azərbaycan kökənli klana qarşı mübarizəsi kimi dəyərləndirməsinə gəlincə, Q.Həsənquliyev deyir ki, əgər prezident hansısa klana müharibə elan edibsə, bunu alqışlamaq və Prezidenti müdafiə etmək lazımdır, xüsusilə bunu həmin bölgənin insanları etməlidir.