Mehdi İbrahimov beşinci gündür aclıq edir

Bakı/14.08.20/Turan:  15 iyul aksiyasından sonra həbs edilmiş Mehdi İbrahimov beşinci gündür ki, aclıq aksiyası keçirir. Bu barədə Turan-a onun qardaşı Turan İbrahim bildirib.

M. İbrahimov CM-in 139-1.1-ci maddəsi (karantin rejiminin pozulması, xəstəliyin yayılmasına və ya təhlükəyə səbəb olduqda) ilə ittiham olunur. Məhkəmə onu üç ay müddətinə həbs edib.

M.İbrahimov Penitensiar xidmətin vərəm xəstələri üçün 3 saylı ixtisaslaşdırılmış müəssisəsində saxlanılır. O, vəkil ilə görüş və həbsdən azad olunmasını tələb edir.

“Mehdi üç həftədən çoxdur ki, nə vəkillə, nə də yaxınları ilə görüşür. Yalnız bir dəfə anası ilə telefonla bir dəqiqədən az danışa bilib. O, qanunsuz həbsinə etiraz olaraq beşinci gündür ki,  acllıq edir”, - qardaşı bildirib.

Vəkil Aqil Layıc Turan-a bildirib ki, avqustun 13-də müdafiə etdiyi şəxslə yenə də görüşə bilməyib. “Mənə bildirdilər ki, İbrahimov xəstədir və onunla görüşlər qadağan edilib. Bu, onunla görüşdən ikinci imtinadır”, - vəkil qeyd edib.

Öz növbəsində Penitensiar Xidmətin ictimai əlaqələr şöbəsinin rəhbəri Mehman Sadıqov Turan-a bildirib ki, məhbuslardan heç biri aclıq etmir.

Lakin bu gün Ombudsman Aparatının mətbuat xidməti bildirib ki, onun nümayəndələri Mehdi İbrahimovla görüşüblər. O, istintaqın gedişi ilə razılaşmadığına görə qidadan imtina etdiyini bildirib.

Mehdi İbrahimov AXCP Rəyasət Heyətinin üzvü Məmməd İbrahimovun oğludur. O da iştişaşların təşkili, hakimiyyətin ələ keçirilməsinə cəhd və digər cinayətlərdə ittiham olunur.06D-