Məhərrəm ayının başlanması ilə əlaqədar Qafqaz Müsəlmanları İdarəsinin müraciəti

Bakı/29.07.22/Turan: Qafqaz Müsəlmanları İdarəsi Məhərrəm ayının başlanması və bu ayda Aşura mərasiminin keçirilməsilə bağlı müraciət yayıb.

Sənəddə bilduirlir ki, Hicri-qəməri təqvimi ilə 1443-cü il başa çatır, yeni 1444-cü ilin başlanğıcı – Məhərrəm ayının 1-i, Miladi təqvimilə 2022-ci il iyul ayının 30-na, Aşura günü isə avqust ayının 8-nə təsadüf edir.

Müraciətdə deyilir ki, Mühəmməd Peyğəmbərin (ə.s) nəvəsi Həzrət Hüseynin (ə) Aşura günü Kərbəlada fədakarlığı, şəhidliyi zülm və haqsızlığa qarşı mübarizənin bariz nümunəsidir.”Bu mənada İmam Hüseyn məktəbi - Allah, Vətən və xalq naminə şəhadətin nümunəvi göstəricisi, mənəvi-əxlaqi dəyərlər müstəvisində danılmaz yeri olan dini-tarixi örnəkdir”, - müraciətdə vurğulanır.

Sənəddə Aşura mərasiminin  keçirilməsinə də yer verilir, bu mərasimlər zamanı müxtəlif alətlərlə bədənə xəsarət yetirməyin, qan çıxarmağın və s. şəriətə görə icazəli olmadığı bildirlir.

Müraciətdə xatırladılır ki, son illər məhərrəmlik dönəmində qan verilməsi  aksiyası ən münasib əzadarlıq nümunəsidir və həmin ənənə bu il də davam etdirilməlidir.

Sənəddə son günlər pandemiyanın artım tendensiyasının nəzərə alınması, məhərrəmlik ayinlərinin tibbi-profilaktik qaydalara uyğun olması xüsusi qeyd edilir.

Xatirladaq ki, Məhəmməd Peyğmbərin (ə.s) nəvəsi, Həzrəti Əlinin oğlu İmam Hüseyn miladi tarixilə 680-ci il oktyabrın 10-da Kərbəlada yaxın tərəfdarları ilə birgə qətlə yetilrib. Həmin tarixdən bu yana  keçirilən Aşura mərasimlərində İmam Hüseynin və yaxınlarının şəhadəti yad edilir.-05D-