Məhkəmə ADP sədrinin müavinini işə bərpa etməyib

Bakı/23.11.17/Turan: Noyabrın 22-də Nəsimi Rayon Məhkəməsi Azərbaycan Demokrat Partiyasının (ADP) sədr müavini Həsrət Rüstəmovun işə bərpa olunması ilə bağlı iddiasının təmin etməyib.

"İddia ərizəsində işə bərpa olunmağım ilə bağlı qərarın verilməsi, məcburi əmək buraxmalara görə əmək haqlarının ödənilməsi, dəyən mənəvi ziyana görə cərimə, işdən çıxaırlmağım barədə qanunsuz qərar vermiş şəxslərin cəzalandırılması tələb edilirdi", - H.Rüstəmov bildirib.

H.Rüstəmov deyib ki, hakim Pərviz Hüseynovun iddianı təmin etməməsi bir yana, üstəlik işdən çıxarılmasına əsaslı "səbəb" də tapıb. "Qərara görə, hansısa xəstənin yanında 1 saat oturmaq əvəzinə, 1saat 15 dəqiqə oturmaqla qanunu pozmuşam və buna görə işdən çıxarılmağım barədə verilən qərar əsaslıdır", - o bildirib.

H.Rüstəmov barəsindəki iddianı əsassız sayaraq elə bir faktın olmadığını deyib, digər tərəfdən, onun fikrincə, hətta belə olsa belə, bu, işdən çıxaırlması ilə yox, hansısa xəbərdarlığı alması ilə yekunlaşa bilərdi.

H.Rüstəmov işdən azad olunması ilə bağlı qərarın əmək fəaliyyətində pozuntuya yol verməsi ilə

bağlı olmadığını və siyasi mahiyyət daşıdığını deyib.

O, məhkəmə qərarından apellyasiya şikayəti verəcəyini söyləyib.

Xatırladaq ki, H.Rüstəmov Milli Şuranın bu il sentyabrın 23-də Bakıda "Talana yox!" şüarı ilə keçirdiyi mitinqdə iştirak edib. Oktyabrın 4-də çalışdığı təcili yardım stansiyası rəhbərliyinin qərarı ilə işdən azad edilib.-06D-