Məhkəmə binası önündə NİDA fəallarına dəstək aksiyası

Polis NİDA fəallarının növbəti məhkəmə prosesi ilə əlaqədar təhlükəsizlik tədbirlərini gücləndirib. Cümə axşamı məhkəmə iclasında müttəhimlər son sözlə çıxış edəcəklər.

Məhkəmə binası əhatəyə alınıb. Məhkəmə binasının qarşısına vətəndaşlar toplaşıb. İctimai marağın artmasına baxmayaraq, məhkəmə administrasiyası zalda çoxsaylı insanın iştirakı üçün şərait yaratmayıb. Jurnalistlərin çoxu zala keçə bilməyib.

Məhkəmə icraçıları bildiriblər ki, zalda yer yoxdur, jurnalistlər döşəmədə oturmaq istədiklərini söylədikdə məhkəmə icraçısı “biz 15-ci əsrdə yaşamırıq” deyib. “O zaman audioyayımı təmin edin”, jurnalistlər söyləyib. Lakin polis “belə imkan yoxdur” cavabını verib.

Sonradan jurnalistləri məhkəmə pilləkənində sıxışdırıblar.

Bütün müttəhimlərin adından Rəşadət Axundov çıxış edib. O, bütün ittihamları rədd edərək onları siyasi motivli adlandırıb. Hakim hökmün mayın 6-da oxunacağını bildirib.

Xatırladaq ki, bundan əvvəl prokuror NİDA fəallarına 6,5 ildən 8,5 ilədək həbs cəzası istəyib. Onlar 2013-cü il martın 10-da əsgər ölümlərinə etiraz aksiyası zamanı kütləvi iğtişaşların planlaşdırılmasında ittiham olunurlar. Amnesty İnternational onları “vicdan məhbusu” adlandırıb.—06C--