Məhkəmə Faiq Əmirovun vəkilinin vəsatətlərini təmin etməyib

Bakı/31.08.17/Turan: Bu gün Bakı Apellyasiya Məhkəməsində (BAM) 3,5 il müddətinə azadlıqdan məhrum edilmiş "Azadlıq" qəzetinin maliyyə direktoru Faiq Əmirovun işi üzrə hazırlıq iclası keçirilib.

İclas hakim Vaqif Mursaqulovun sədrliyi ilə keçirilib.

İlk gündən Əmirovun müdafiəsində iştirak edən vəkil Aqil Layıcovun iclasda iştirakına icazə verilməyib. Məhkəmə bunu vəkilin məhkəməyə ayrıca order təqdim etməməsi ilə əsaslandırıb.

Amma, vəkilin sözlərinə görə, iş materiallarında onun orderi var və bu sənəd bütün instansiyalar üçün etibarlıdır. Qanunda apellyasiya instansiyası üçün ayrıca sənəd təqdim etmək tələbi yoxdur.

Vəkil Fəxrəddin Mehdiyev hazırlıq iclasında bir sıra vəsatətlər qaldırıb.

Xüsusən, o, qətimkan tədbirinin dəyişdirilməsi barədə vəsatət qaldırıb.

Vəkil qeyd edib ki, Əmirovun xasiyyətnaməsi müsbətdir, cəmiyyətdə nüfuza sahibdir, himayəsində iki azyaşlı uşağı var, daimi yaşayış yeri var.

"Amma ən əsası, onun səhhətində ciddi problemlər var. Faiq qara ciyər və öd kisəsi xəstəliklərindən əziyyət çəkir. Həbsdə saxlanması onun xroniki xəstəliyini ağırlaşdırıb. Bundan başqa, Əmirovun ittiham olunduğu cinayətlər az ağır cinayətlərə aiddir və ittihamların onunla heç bir əlaqəsi yoxdur. Bu, sifarişli, qərəzli işdir. Əmirov siyasi motivlərlə həbs olunub", deyə Mehdiyev bildirib.

İkinci vəsatət şikayətə istintaq aparılmaqla - şahidlərin dindirilməsi, dəlillərin araşdırılması ilə baxılması zərurəti ilə bağlı idi, deyə vəkil bildirib.

Daha sonra o qeyd edib ki, Əmirovun maşınında onun iştirakı olmadan axtarış aparılıb və Fətullah Gülənlə bağlı disklər və kitablar aşkarlanıb. Amma axtarış protokolunda hal şahidi kimi göstərilmiş şəxslər məhkəmədə dindirilməyib.

Hakimlər vəsatətləri təmin etməyiblər və mahiyyəti üzrə dinləmələri sentyabrın 14-nə təyin ediblər.

Xatırladaq ki, Əmirov 2016-cı il avqustun 20-də dini və milli ədavət salmaq ittihamı ilə saxlanılıb.

2017-ci il aprelin 17-də ona qarşı yeni vergidən yayınma və sui-istifadə ittihamları irəli sürülüb.

Amma ibtidai istintaqın yekunlarına görə 168.1 və 308-ci maddələr üzrə ittihamlar ləğv edilib.

İyulun 24-də Əmirov Səbail rayon məhkəməsinin qərarı ilə 3,3 il müddətinə azadlıqdan məhrumetmə cəzasına və 39 min manat cəriməyə məhkum edilib. Hüquq müdafiəçiləri Əmirovu siyasi məhbus kimi tanıyıb. "Sərhədsiz Reportyorlar" beynəlxalq jurnalistləri müdafiə təşkilatı Əmirovun həbsini pisləyib və ona qarşı "cəfəng ittihamları" ləğv etməyə çağırıb. -03B06-