Məhkəmə fəal İ.Quliyevi 4 ay müddətinə həbs edib

Bakı/06.12.23/Turan: Dekabrın 6-da Yasamal rayon məhkəməsi ictimai fəal İlhamiz Quliyev barəsində 4 ay müddətinə həbs qətimkan tədbiri seçib.

Bu barədə Turana onun vəkili Zibeydə Sadıqova məlumat verib.

Vəkilin sözlərinə görə, İ.Quliyev Cinayət Məcəlləsinin 234.4.3-cü maddəsi ilə ittiham olunur: "Ona 5,92 qram narkotik vasitənin satışı ilə bağlı ittiham verilib". 

Z.Sadıqova qeyd edib ki, İ.Quliyev özünü təqsirli bilmir və həbsini "Abzas Media"ya verdiyi müsahibə ilə əlaqələndirir. 

Vəkil bildirdi ki, İlhamiz Quliyevin bədənində xəsarət izləri var: "O, məhkəmədə onları göstərib və bildirdi ki, bu xəsarət ona polislər tərəfindən yetirilib. Məhkəmə bu məsələni araşdırmaq üçün prokurorluğa göndərdi". 

Müdafiə tərəfi həbsdən apellyasiya şikayəti vermək niyyətindədir.

Qeyd edək ki, Quliyev dekabrın 4-də saxlanılıb. Yaxınlarının sözlərinə görə, saxlama zorakılıqla həyata keçirilib. Hüquq müdafiəçilərinin fikrincə, həbsin səbəbi Quliyevin “Abzas Media” nəşrinə verdiyi müsahibədir.  O, siyasi fəalları təqib etmək üçün polisin “sənədləşdirilməmiş narkotik maddələrdən” istifadə etməsindən danışıb.

Quliyev anonim olaraq təqdim edilib, onun səsi isə xüsusi proqramla dəyişdirilib.

Öz növbəsində DİN-in mətbuat xidməti İ.Quliyevin əvvəllər polis orqanlarında xidmət etməsi ilə bağlı yayılan məlumatları təkzib edib. Quliyev “bir qrup şəxs tərəfindən narkotik vasitələrin qanunsuz dövriyyəsində” şübhəli şəxs qismində saxlanılıb.

"O, istintaqa məlum olan şəxsləri narkotik vasitələrlə təmin edib", - Daxili İşlər Nazirliyindən bildiriblər.—06B.