Məhkəmə jurnalistin şikayətini təmin etməyib

Bu gün Yasamal Rayon Məhkəməsində Turan agentliyi və “Amerikanın səsi” radiosunun müxbiri Tapdıq Fərhadoğlunun  Yasamal prokurorluğunun müstəntiqi Mübariz Əsədova qarşı işi üzrə qərar açıqlanıb.

Jurnalist BDU tələbələrinin etiraz aksiyasının işıqlandırılması zamanı ona fiziki təzyiqlərlə bağlı cinayət işinin qaldırılmasından imtinadan şikayət edib.

Xatırladaq ki, fevralın 20-də BDU mühafizə xidmətinin rəhbəri Mahir Höcətov tələbələrin etiraz aksiyasını çəkən jurnalistin kürəyinə və başına dəfələrlə yumruq və təpik vurub.

Jurnalist xəsarət alıb və əməliyyat olunub. Nəticədə qismən əmək qabiliyyətini itirib.

Lakin hakim Azər Tağıyev şikayəti təmin etməyib. Vəkil Samirə Ağayevanın sözlərinə görə, məhkəmə imtinanı iş üzrə hadisə şahidlərinin olmaması ilə izah edib.

Vəkil qərarı əsassız adlandırıb, məhkəmənin dəlillərinin tutarlı olmadığını bildirib.

Belə ki, məhkəmə zamanı təkcə şahidlərin yox, aksiya zamanı xəsarət alan digər jurnalistlərin adları açıqlanıb. Cinayət materiallarında sonuncuların da şikayətləri olub.

Videoyazıya baxış zamanı hakim Xocatov tərəfindən T.Fərhadoğluna xəsarət yetirildiyini təsdiqləyib, faktiki olaraq CM-in 163-cü maddəsində nəzərdə tutulan cinayət (jurnalistin qanuni fəaliyyətinə maneçilik törədilməsi) tərkibini etiraf edib.

T.Fərhadoğlu məhkəmənin qərarı ilə razılaşmadığını və apellyasiya vermək niyyətində olduğunu bildirib. “Mənə zərbələrin endirilməsi və jurnalist fəaliyyətimə əngəllərin törədilməsi barədə açıq- aşkar video sübutların olmasına baxmayaraq, məhkəmə şikayətimi təmin etmədi. Mən apellyasiya vermək niyyətindəyəm, lazım gələrsə Avropa İnsan Hüquqları Məhkəməsinə çıxacağam”, - o bildirib.

Bundan əvvəl jurnalist prezident İlham Əliyevə, Baş Prokurorluğa və insan hüquqları üzrə İşçi Qrupuna müraciət edərək ona hücumun obyektiv araşdırılmasına yardım göstərilməsini xahiş edib.—06В-