Bakı/05.03.19/Turan: Bloger Mehman Hüseynov bugünkü mətbuat konfransında koloniyada ona qarşı törədilmiş təxribatın təfərrüatları haqda danışıb. Onun sözlərinə görə, yeni cinayət işini gözləyirdi, ancaq bu cür "çirkin" formada olacağını düşünmürdü. "Cəza müddətinin başa çatmasına iki ay qalmış məni koloniya polisini döyməkdə ittiham etdilər", - bloger bildirib. Onun sözlərinə görə, əslində heç bur insident olmamışdı.
M.Hüseynovu karserə salıblar, prokurorluq nümayəndələri bildiriblər ki, ona qarşı yeni iş açılır və onu 7 ildən 12 ilədək həbs cəzası gözləyir.
"Bilirdim ki, əvvəllər də digər siyasi məhbuslara qarşı belə təxribatlar olub. Həbs müddəti başa çatmazdan öncə yeni ittihamlar irəli sürüblər və onları yenidən mühakimə ediblər. Odur ki, mən dərhal bildirdim ki, quru aclığa başlayıram. Ya ittiham götürüləcək, ya da öləcəyəm", - M.Hüseynov deyib.
Aclıq dekabrın 26-da başlayıb. Dekabrın 30-da blogerin halı pisləşib və o, az qala huşunu itirib. "Bildirdilər ki, mənə məcbur yemək verəcəklər. Ancaq o vaxta qədər mənim aksiyam ilkin nəticəsini vermişdi. Ona görə də su qəbul etməklə aksiyanı davam etdrdim", - bloger bildirib. Yanvarın 7-dək bu cür davam edib. Bundan sonra ancaq maye süd məhsulları qəbul edib.
Penitensiar Xidmətin onun adından yaydığı müraciətə toxunan bloger deyib ki, müraciətin birində Mehman bildirib ki, siyasi mühacirətdə olan qardaşının hərəkətinə görə məsuliyyət daşımır. "Biz eyni prinsipləri paylaşa bilərik, bir-birimizi müdafiə edə bilərik, ancaq hər kəs öz hərəkətinə görə məsuliyyət daşıyır", - o deyib.
Prezident İlham Əliyevin adına olan ikinci müraciətə gəlincə, Mehmana təklif edilib ki, nəzarətçi ilə insident baş verdiyini yazsın, peşman olduğunu, barışmaq istədiyini bildirisn. "Mən belə müraciəti imzalamaqdan imtina etdim", - bloger qeyd edib.
Sonda hazırlanan müraciətdə onun günahsız olduğu bildirilib və işə obyektiv baxılması xahiş edilib.
Bir qrup hökumətyönlü fəalın Mehmana baş çəkməsinə və blogerin şikayətinin olmaması barədə informasiyaya gəlincə, M.Hüseynov deyib ki, bu görüşdə o, ittihamın saxtalaşdırılmasından, onun və digər siyasi məhbusların azadlığa buraxılmasının vacibliyindən danışıb.
O qeyd edib ki, yeni cinayət işilə bağlı ittihamın onun üzərindən götürülməsi Azərbaycan xalqının, vətəndaş cəmiyyəti fəallarının, müxalifətin, etiraz aksiyaları və sosial şəbəkələrdə kampaniya iştirakçılarının fəal mövqeyi sayəsində mümkün olub.
Eyni zamanda o, dəstəyə görə beynəlxalq ictimaiyyətə, ABŞ Konqresi üzvlərinə, Avropa Parlamentinə və digər qurumlara öz təşəkkürünü bildirib.
M.Hüseynov qeyd edib ki, bloger işini, jurnalistlərin və media hüquqların müdafiəsi ilə bağlı fəaliyyətini davam etdirəcək.
* Mehman Hüseynov 2017-ci il martın 3-də polisə böhtan atmaq ittihamı ilə həbs olunub. Buna Nəsimi polisində işgəncələrə dair bəyanatı əsas olub.
Amnesty İnternational beynəlxaq hüquq-müdafiə təşkilatı onu "vicdan məhbusu" kimi tanıyıb. Dekabrın sonlarında blogerə qarşı koloniya əməkdaşını döyməsilə bağlı yeni ittiham irəli sürülüb. M.Hüseynov saxtalaşdırmaya etiraz olaraq quru aclıq elan edib. Yeni həbs təhlükəsi yerli ictimaiyyətin etirazına və xaricdə tənqidlərə səbəb olub. Avropa Parlamenti Azərbaycan hakimiyyətini blogeri və digər siyasi məhbusları azad etməyə çağırıb. Bundan sonra prokurorluq blogerə qarşı cinayət işinə xitam verib.-06D--
Cəmiyyət
-
Lider mobil operator milli mətbuatın inkişafına töhfə verməyə davam edir “Azercell Telekom” MMC jurnalistikanın inkişafına, mətbuat nümayəndələrinin peşəkar bacarıqlarının artırılmasına yönəlmiş təşəbbüslərini davam edir. Lider mobil operator 6 dekabr rabitə və informasiya texnologiyaları işçilərinin peşə bayramında bu sahə üzrə yazan jurnalistlər üçün xüsusi təlim təşkil edəcək. Beynəlxalq təlim mərkəzi tərəfindən “Media texnologiyaları: yeniliklər və trendlər” mövzusunda həyata keçiriləcək təlim jurnalistlərə yeni media tendensiyaları və qabaqcıl texnologiyalar haqqında biliklərini dərinləşdirmək imkanı verəcək.
-
Azərbaycanın quru sərhədlərinin bağlı saxlanmasından Milli Məclisin noyabrın 25-də keçirilən iclasında da bəhs edilib. Nazirlər Kabinetinin qərarında bu hal artıq ötən ildən Ümumdünya Səhiyyə Təşkilatının başa çatdığını elan etdiyi koronovirus pandemiyası ilə izah olunsa da, Milli Məclisin İnsan hüquqları komitəsinin sədri Zahid Oruc başqa səbəb göstərib. "Sərhədlərin açılması Rusiya-Ukrayna müharibəsindən 100 minlərlə qeyri-azərbaycanlı qaçqınların ölkəmizə axını ilə nəticələnəcək. O cümlədən, İranda hərbi zərbələrdən canını və sərvətlərini qorumaq üçün 100 minlərlə insan Azərbaycana keçməyə hazırdır. Belə qaçqın dalğasının gətirdiyi humanitar, sosial, mədəni fərqlərin toqquşması siyasi sabitliyi təhdid edə bilər", - o vurğulayıb.
-
Çərşənbə axşamı Baş Prokurorluq xaricdəki gəlirlərini gizlədən kənd təsərrüfatı məhsulları ixracçıları barəsində açılan yeni cinayət işləri haqqında məlumat yayıb.
-
Noyabrın 27-də Bakının və Abşeron yarımadasının bəzi yerlərində arabir leysan xarakterli yağış yağacağı gözlənilir, bu barədə sinoptiklər məlumat yayıb. Yarımadanın ayrı-ayrı yerlərində intensivləşəcəyi, şimşək çaxacağı ehtimalı var. Mülayim şimal-qərb küləyi əsəcək. Havanın temperaturu gecə 7-9 dərəcə, gündüz 9-12 dərəcə isti olacaq. Nisbi rütubət 80-90 faiz təşkil edəcək.
Rəy yaz