Mətbuat icmali

Rəsmi qəzetlər prezident İlham Əliyevin Gəncə şəhərində məcburi köçkünlər üçün salınmış yeni qəsəbənin açılışında iştirakı barədə geniş hesabatlar, prezidentin sərəncamlarını baş məqalə yerində dərc edib. Digər qəzetlər isə Azərbaycanın rüşvət reytinqində yüksək yer tutması, vətəndaşların evlərin satışı zamanı aldadılması, Azərbaycanın Xəzərdə keçirdiyi hərbi təlim, Azərbaycan banklarında çirkli pulların yuyulması, Beynəlxalq bankın “AST Telman” kimi tanınan biznesmen Telman İsmayılovun mülkünü girovu ödəməməsi səbəbi ilə əlindən alması və başqa mövzuda məqalələri baş məqalə kimi dərc edib.

“Azadlıq”

Trace İnternational təşkilatının reytinq cədvəlinə görə, Azərbaycan rüşvət riskinə görə 197 ölkə arasında 140-cı yeri tutur.

“Sevil” yaşayış massivinin aldadılmış mülkiyyətçiləri Abşeron rayon İcra Hakimiyyətinin binası qarşısında etiraz piketi keçirib. Belə ki, “Sevil” MTK-nin təsisçisi və direktoru qanunsuz torpaq satmaq ittihamı ilə həbs edilib. Torpaqları alan sakinlər isə mülkiyyətlərindən narahatdır.

Dini Qurumlarla İş üzrə Dövlət Komitəsinin sədri Mübariz Qurbanlı bildirib ki, Daxili İşlər Nazirliyinin bu günlərdə Sumqayıtda keçirdiyi əməliyyat tamamilə qanunidir və belə əməliyyatlar başqa yerlərdə aparılacaq. Polis bu günlərdə Sumqayıtda vəhabilərin lideri hesab edilən Zöhrab Şıxəliyevi saxlayıb.  

Azərbaycanın Rusiyada keçmiş səfiri Hikmət Hacızadə qəzetə müsahibəsində deyib ki, Azərbaycanda vətəndaş cəmiyyətinə, QHT-lərə hücum Rusiyanın tapşırığı ilə başlayıb. Onun fikrincə, Azərbaycana qərbin sanksiyalarının tətbiqi yaxınlaşır.

Bakı meriyası ilə Nəqliyyat Nazirliyi arasında “parkomat savaşı” başlayıb. Nəqliyyat Nazirliyi Bakı meriyasının küçələrdə qoyduğu parkomatların bəzi hallarda avtobus və taksi dayanacaqlarını da əhatə etdiyini bildirir. Bakı meriyası isə küçələrdə 800 metr uzunluğunda taksi dayanacaqlarının olmasını qəbul etmir.  

Bakı sakini Nina Baskakova aldadılaraq Adıgey Respublikasına aparılıb və bundan sonra fırıldaqçılar onun evini satıb. Hazırda bu fakt araşdırlmamış qalır. O, polisə və prokurorluğa şikayət edəndən sonra vəkili və tələbəsi naməlum şəxslər tərəfindən hədələnir.

“Əliyevlər Amerika mətbuatında” yazısında deylir ki, amerikalı ekspertlər Əliyevlərin “Dubay mülkləri”ni və “ilin korrupsioneri” məsələsini yenidən gündəmə gətirib.

“Azərbaycan banklarına “çirkli pul” ittihamı” məqaləsində ölkənin çoxsaylı banklarının “çirkli pulların” yuyulmasında adı hallanır. Bunlar “Beynəlxalq bank”, “Azəriqazbank”, “Bank Standart” və başqalarıdır.

“Bizim Yol”

“İri vergi ödəyicilərinin büdcədən aldığı verdiklərindən çoxdur” məqaləsində deyilir ki, vergi yığımında problemlər yaşanır. Büdcə gəlirlərinin 80 faizi Dövlət Neft Fondu hesabına formalaşdırılır. Qəzet yazır ki, “Azərenrji”, “Azərbaycan Dəmir Yolları”, Rabitə və Yüksək Texnologiyalar Nazirliyi, “Azərsu”, AZAL, “Xəzər Dəniz  Gəmiçiliyi”, “Bakıelektrikşəbəkə” kimi böyük qurumlar dövlət büdcəsindən ödədiyi vergidən daha çox vəsait alır. Haklbuki adları formal olaraq böyük vergi ödəyicisi hesab edilir.

“Qanun” Nəşriyyatının rəhbəri Şahbaz Xuduoğlu Türkiyədə kitab satışının artdığını bildirib. Amma Azərbaycanda bir milyon insana cəmi bir kitab evi düşür.

Azərbaycanda 197 min şəkər xəstəsi var.

Ölkədə hazırda doğulan hər 100 qıza 116 oğlan düşür.

Azərbaycanda rus rublundan imtina edilir. Bəzi valyutadəyişmə məntəqələri rus rublunu qəbul etmir. Rusiya rublunun dollara nisbətindəki ciddi dəyişikliklər valyutadəyişmə məntəqələrində narahatlığa səbəb olub.

“Amerikalı vəkil “Amerika möcüzəsi”ni izah edir” adlı müsahibədə Amerikada yaşayan vəkil İsmayıl Şahtaxtinski bu ölkədə insanlara göstərilən qayğı, biznes, təhsil mühitindən danışır. “Rusiya xarici işlər naziri Sergey Lavrovun qızı da Amerikada oxuyur”, deyə o qeyd edib.

“Yeni Müsavat”

Beynəlxalq Bank Telman İsmayılovun krediti qaytara bilmədiyi üçün Moskvada ümumi dəyəri 140 milyon olan tikintisi yarımçıq qalmış mehmanxanasını əlindən alıb. Bu ərazidə torpağın bir sotu bir milyon dollardan yuxarıdır.

Qəzetin analitik xidməti “Siyahılı parlament təcrübəsindən imtina ediləcəkmi?” yazısı ilə çıxış edib. “Artıq hakimiyyət də anlayır ki, indiki taleyüklü mərhələdə Azərbaycana daha təmsilçi Milli Məclis lazımdır. Deputat korpusunun ənənəvi formalaşma prinsipi dəyişməsə, itirən həm də iqtidarın özü olacaq”.

“Ekspress”

Ermənilər ABŞ-da minatəmizləmə adı altında ianə toplayır. Ermənistan Ordusu isə 4700 şəxsi heyət, 2100 artilleriya qurğusu, 850 zirehli texnika, 450 hava hücumundan müdafiə vasitəsi, 1600 tank əleyhinə vasitə, 260 xüsusi texnika və 4200 avtomobillə Azərbaycanın suverenliyində olan Dağlıq Qarabağda hərbi təlim keçir. Ermənistan prezidenti Serj Sarkisyan da Dağlıq Qarabağdadır.

Qarabağ Azadlıq Təşkilatının üzvləri Ermənistanın girovkuğunda olan Dilqəm Əsgərov və Şahbaz Quliyevin azad edilməsi tələbi ilə aclığa başlayıb.