Mətbuat icmalı

Rəsmi qəzetlər prezident İlham Əliyevin Şəmkir rayonuna səfəri və oradakı görüşləri barədə geniş reportajları baş məqalə yerində dərc ediblər.

Bununla yanaşı rəsmi “Azərbaycan” qəzeti bazar günü sayında oxucu məktublarına da yer ayırıb. Dərc edilən məktublarda uğurlu işlərin tərifi  yer alsa da “Mərasimlər sadə olmalıdır”, “SMS spam biabırçılığı...”, “Zeytun palçığı göz yaşları” kimi sosial məsələlərə dair tənqidi yazılar var. 

Digər qəzetlər isə Vaşinqtonun Azərbaycana münasibəti, yerli  hakimiyyət orqanları ilə əhali arasında yaranmış problemlərdən bəhs edən məqalələri birinci səhifəsində dərc ediblər.

Azadlıq 

Keçmiş iqtisadi inkişaf naziri Fərhad Əliyevin səhhətində problemlər yarandığından Almaniyaya aparılıb. Onun ürək-damar sistemində problemlər yaranıb.

Həbsdə olan Müsavat Partiyası başqanının müavini Tofiq Yaqublunun səhhəti ağırlaşıb. O, astma xəstəliyindən əziyyət çəkir.

İqtisadçı Natiq Cəfərli bildirib ki, iri vergiödəyiciləri dövlət büdcəsinə borclu qalmaqda davam edirlər. Belə ki, iri hökumət və dövlət məmurlarına bağlı şirkətlər həmin məmurların siyasi əlaqələri və  mövqelərindən istifadə edərək vergi öhdəliklərini düzgün yerinə yetirmir.

Noyabrın 19-da ABŞ Konqresində Azərbaycan və ATƏT üzvü olan digər dövlətlərdə korrupsiya ilə bağlı dinləmələr keçiriləcək. 

Yeni Müsavat 

“Xaləddin İsgəndərov İcra Hakimiyyətini ailə şirkətinə çevirib” məqaləsində deyilir ki, Binəqədi rayonunun icra başçısı X.İsgəndərov rayonda bütün qara işləri bacısı oğlanlarının əli ilə gördürür.

Bakının Səbayel rayonunda 20-ci sahə deyilən ərazidə 3 minə yaxın evin sökülməsi planlaşdırılır. Qanunsuz tikililərə kompensasiya verilməyəcək. Bu isə 10 min insanın evsiz qalması  deməkdir.