Mətbuat-Monitorinq 01.04.14

Rəsmi qəzetlər dövlət başçısı İlham Əliyevin Gədəbəy rayonunun Qarıkənd-Miskinli-Çalburun və Qızıltorpaq-Ağbaşlar avtomobil yollarının tikintisi üçün 6,7 milyon manatın ayrılması haqda sərəncamının mətnini ilk səhifələrə yerləşdiriblər.

“Azadlıq” qəzeti nazir Kəmaləddin Heydərovun ardınca ARDNŞ prezidenti Rövnəq Abdullayevin də informasiya resursları yaratmasını “iki oliqarxın media müharibəsi” kimi dəyərləndirərək ilk səhifəyə çıxarıb.

“The Telegraph” qəzetinə istinad edən “Azadlıq”  bəzi ölkələrlə yanaşı Azərbaycandan olan zənginlərin son iki ildə Böyük Britaniyada 3 milyard dollarlıq mənzillər almasını nəzərə çatdırır.

Gəncədə fəaliyyət göstərən “Kamil Vətəndaş” Maarifləndirmə Mərkəzinin rəhbəri Həsən Hüseynli polis tərəfindən saxlanılıb, amma Gəncə polisi QHT rəhbərinin harada saxlanması haqda informasiya vermir.

KİV-lərə Dəstək Fondu “Azadlıq” qəzetini növbəti dəfə “KİV layihələrinin maliyyələşdirilməsi” müsabiqəsindən kənarda saxlayıb. Media ekspertləri məmurların media holdinqləri yaratmalarına məqsəd kimi  “müstəqil və müxalifət mətbuatını sıradan çıxarmaq” istəklərini göstərirlər.

“Zerkalo” yazır ki, hərbi prokuror Xanlar Vəliyev Qarabağ döyüşlərində hərbi cinayətlərə yol verən Ermənistanın 296 hərbçisi barədə cinayət axtarışı elan edib.          

“Ekspress”  kiçik mağazalarda unun qiymətinin 25% artması haqda xəbəri önə çəkib.

1918-ci ilin martında Azərbaycanda qətliam törədilməsinə bolşeviklərin rəhbərlik etdiyini əsas gətirən Demokrat Partiyası Kommunist Partiyasının fəaliyyətinin dayandırılmasını tələb edir.       

“Exo” ekspertlərə istinadən ölkədəki tütün məmulatlarının 20%-nin qaçaqmalçılıq yolu ilə gətirilməsi məsələsini önə çəkib.

“Novoe Vremya”  ölkənin dərman bazarının 97%-nin idxaldan asılı və  qonşu ölkələrlə müqayisədə pərakəndə satış qiymətlərinin baha olduğuna diqqət çəkir.  

“Bizim yol”  Böyük Britaniya mətbuatının yazdığı Azərbaycan zənginlərinin Londonda dəbdəbəli mənzillər alması mövzusunu ilk səhifəyə çıxarıb.

“Yeni Müsavat” Türkiyədəki yerli seçkilərdə qalib gələn AKP iqtidarının Fətullah Gülənin “Xidmət Hərəkatı”nın Azərbaycandakı nümayəndəsi hesab etdiyi ARDNŞ prezidentinin işdən çıxarılmasına nail olmaq istədiyini nəzərə çatdırır.

Rusiyanın qaz asılılından xilas olmaq üçün Qərbin Azərbaycanla Türkmənistan arasında  narazılığı aradan qaldırmaqda olduğunu yazan qəzet bunu “Rusiyaya qarşı qaz alyansının yaranması” kimi dəyərləndirir.