Mətbuat-Monitorinq 02.10.14

Rəsmi qəzetlər dövlət başçısı İlham Əliyevin Qurban bayramı ilə bağlı xalqa təbrikini, bəzi ölkələrin keçmiş yüksək səlahiyyətli şəxslərini qəbul etməsi haqda xəbərləri ilk səhifələrdə veriblər.

“Azadlıq” qəzeti “milyonluq rüşvət”lə mühakimə edilən hakim Həsən Əliyevin bu rüşvətlə bağlı Nərimanov rayon polis rəisi, prokuroru tərəfindən “tələ”yə salınması haqda verdiyi açıqlamanı ilk səhifəyə çıxarıb.

Moskvanın Helsinki Qrupu bu il üçün Saxrov mükafatına Leyla Yunusun namizədliyinə dəstək nümayiş etdiriblər.

12 saylı həbsxanada daxili nizam-intizam qaydalarını “pozduğuna görə 7 sutka karser”ə salınan İslam Partiyasının sədri Mövsum Səmədov “karser”dən çıxarılıb.

Milli Şuranın ölkədəki repressiyalara etiraz olaraq mitinq qərarı verməsinə iqtidar tərəfdən gələn mənfi reaksiyaları ekspertlər “iqtidarın təşvişi” sayıblar.

Kənd təsərrüfatı naziri Heydər Əsədovun ölkədə məhsul bolluğu olması barədə bəyanatına ekspertlər “anbarların 80%-i boşdursa bol məhsuldan danışmaq olmaz” qarşılığını veriblər.

“Ekspress”  Rusiyaya məxsus iki hərbi gəminin “tanışlıq” məqsədilə Qazaxıstan və İran limanlarında olacaqlarını önə verib.

Qəzet Tələbə Qəbulu Komissiyasına istinadən son 9 ildə orta məktəblərdə məzunların sayının 27%  yəni, 34411 nəfər azaldığını və bu meylin bir neçə ildir müşahidə edildiyini bildirir.

“Exo”  ölkənin oyuncaq bazarında uşaq oyuncaqların ancaq 20%-nin təhlükəsiz olması iddiasını ilk səhifədə yerləşdirib.

Qəzet hər gün 25-30 sərnişin avtobusu sürücülərinin avtobusların salonunda siqaret çəkmələri, digər avtobuslarla ötüşməyə çıxmaları, telefonla danışmaları, avtobusu dayanacaqdan kənar saxlamaları haqda şikayətlərin daxil olduğunu yazır.

“Novoe Vremya”  AŞPA-nın insan haqları komitəsinin Azərbaycanla bağlı tənqidi bəyanat verməsini önə çəkərək bunu “Strasburqun Bakını ağıllandırmaq cəhdi” adlandırır.

“Bizim yol”  Maliyyə Monitorinq Xidmətinin keçən il ölkədə həyata keçirilən 344 milyon manatlıq əməliyyatları riskli və şübhəli saydığını, bununla bağlı qurumun MTN-ə müraciət etdiyini manjetə çəkib.

“Yeni Müsavat”  məişət mübahisəsi zəminində baş verən cinayətdə 7 nəfərin öldürülməsi, 2 nəfərin yaralanması faktını ilk plana çıxarıb.

Qəzet “AAAF”-İnşaat”ın rəhbəri Tofiq Heydərovun 2011-ci ildə dindarların aksiyasına maliyyə yardımı etməsi iddiasının üzə çıxmasına diqqət çəkir. 

Tanınmış hüquqşünas Ənnağı Hacıbəyli ölkədəki son çoxsaylı həbsləri hakimiyyətin “etirazsız” cəmiyyət formalaşdırmaq səyi kimi dəyərləndirir.