Mətbuat-monitorinq 04.04.15

Rəsmi qəzetlər dövlət başçısı İlham Əliyevin AİTF-2015 XIV Azərbaycan Beynəlxalq turizm və səyahətlər sərgisilə tanış olması haqda foto və xəbərləri dərc ediblər.

“Azadlıq” qəzeti Milli Şuranın aprelin 5-də Bakıda keçirəcəyi “Talana son” aksiyası ilə bağlı xatırlatmanı ilk səhifəyə çıxarıb. AXCP sədri Əli Kərimli azadlıq hərəkatı nümayəndələrinə, ictimai-siyasi fəallar isə xalq təbəqələrinə aprelin 5-dəki aksiyada fəal iştirak çağırışı ediblər.

Qəzet “gül bayramı” kimi mənasız tədbirə hökumətin milyonlar xərclədiyi halda şəhid ailələrinin etirazlarına baxmayaraq, bu kateqoriya insanlara sığorta pullarını verməməsinə diqqət çəkir.

Xaricdə müalicə üçün Səhiyyə Nazirliyinə 1433 nəfər müraciət etsə də, cəmi 2 nəfərin göndərilməsini qəzet “rüsvayçı açıqlama” adalandırır.

Mərkəzi Bankın sədri Elman Rüstəmovun vəzifədə saxlanmasını ekspertlər “hökumətin bank sektorunda ciddi addımlar atmaq niyyətində olmaması”nın göstəricisi sayıblar.

Neft gəlirlərinin azalması ilə tikinti sektorunun çökməkdə olduğunu yazan qəzet bu çöküşün minlərlə insanı işsiz qoyacağını nəzərə çatdırır.

ABŞ-ın Azərbaycan səfirliyi vətəndaşlara müraciət edərək, ABŞ-a viza vədi verən fırıldaqçılardan özlərini qorumaları xəbərdarlığı edib.

Xaçmaz şəhərində sünni məzhəbindən olan 100-ə qədər şəxs imza toplayaraq şəhərin mərkəzindəki şiələrə məxsus məscidi almaq istəyir və buna səbəb kimi digər məscidlərin namaz qılınması üçün uzaq məsafədə olması göstərilir.

“Ekspress” qəzeti Azərbaycan Silahlı Qüvvələrinin ilk dəfə gecə vaxtı təlimlərə başlaması haqda xəbəri önə çəkib.

“Sahil-D” tikinti şirkəti mənzil tikintisi adı ilə vətəndaşların 1 milyon 600 min manat pulunu mənimsədiyinə görə işi məhkəməyə göndərilib.

“Novoe Vremya” qəzeti Ukrayna Radasında “erməni soyqırımı” məsələsinin müzakirəyə çıxarılmasını AŞPA-da Azərbaycanın Ukraynanı dəstəkləməməsinə cavabı kimi dəyərləndirərək, ön plana çıxarıb.

Milli Məclisdə bir gündə 24 məsələyə baxılmasına qəzet “daha nə gözləmək olardı?” ironiyası ifadə edir.

“Bizim yol” qəzeti İranla Qərb arasındakı analaşmanı “tarixi razılşama” sayaraq ilk səhifədə yerləşdirib.

Ekspertlərə isnadən dövlət büdcəsinin böyük təhlükə ilə üzləşdiyini yazan qəzet neft kəskin ucuzlaşdığına görə xaricdən borc almaq məsələsinin gündəmə gəldiyini bildirir.

“Yeni Müsavat” qəzeti Gədəbəyin Şınıx bölgəsində əfsanəvi komandirlərdən Cahangir Rüstəmovu keçmiş müdafiə naziri Səfər Əbiyevin öldürtdürməsi haqda oğlu Faiq Rüstəmovun iddiasını manjetə çıxarıb.

Bakı və Tbilisidə aviabiletlərin qiymətləri arasında müqayisə aparan qəzet Bakıda qiymətlərin 2 qat baha olmasını əyani surətdə ortaya qoyur.

Dövlət başçısı İlham Əliyevə müraciət ünvanlayan Rusiyanın Azərbaycan təşkilatlarının iddialarına görə, baş nazirin keçmiş müavini Abbas Abbasov Rusiya azərbaycanlılarını İ.Əliyevə etibarsızlıq ifadə etməyə çağırıb.

Bakının Mehdiabad qəsəbə sakinləri problemləri haqda mətbuata danışdıqları üçün polisə çağrılaraq təzyiqə məruz qoyulurlar.