Mətbuat-Monitorinq 04.10.14

Rəsmi qəzetlər dövlət başçısı İlham Əliyevin Xırdalan şəhəri və Masazır qəsəbəsinə səfəri, səfər çərçivəsində bəzi obyektlərin açılışında iştirakı haqda xəbərləri, Abşeron rayonunun sosial-iqtisadi inkişafı üçün 2 milyon manat ayrılmasına dair sərəncamının mətnini ilk səhifələrdə yerləşdiriblər.

“Azadlıq” qəzeti  “Freedom House” təşkilatının Azərbaycana sanksiyalar tətbiqi haqda təklifini ABŞ-ın rəsmi Bakıya sanksiya xəbərdarlığı” kimi dəyərləndirərək manjetə çıxarıb.

“Azərbaycan saatı” verilişinin əməkdaşı Seymur Həziyə təxribat törədən şəxsin ev dustaqlığına buraxılmasını, jurnalistin həbsdə saxlanılmasını qəzet “həbsin siyasi motivli olmasının göstəricisi” adlandırır.

Ölkədəki siyasi həbslərə etiraz olaraq Milli Şuranın oktyabrın 12-nə təyin etdiyi mitinqə cəmiyyətin müxtəlif təbəqələrinin qoşulduğunu göstərən qəzet tanınmış vəkillərin də aksiyaya dəstək verdiklərini nəzərə çatdırır.

Qəzet həbsdə olan İslam Partiyasının sədri Mövsüm Səmədovun ombudsman və Qızıl Xaç Komitəsi təsmilçisi ilə görüş üçün aclıq aksiyasını davam etdirdiyini yazır.

Qərb-Rusiya qarşıdurması nəticəsində neftin düya bazarında dəyərinin 60 dollara enəcəyini real sayan ekspertlər bu halda Azərbaycanın büdcə gəlirlərinin azı 3 milyard manatadək azalacağı şərhi verirlər.

“Novoe Vremya” qəzeti “Freedom House” beynəlxalq hüquq təşkilatının rəsmi Bakıya sanksiya tələbini “ABŞ xəbərdarlıq edir?” şəklində önə çəkib.

Layihəsi hələ 10 il öncə hazır olan “Rəqabət məcəlləsi”nin indiyə kimi qəbul edilməməsinə qəzet “əlverişli olmayan məcəllə” şərhi verir.

“Bizim yol” qəzeti neft şirkətində kütləvi ixtisar məsələsini ilk səhifəyə çəkərək, 46 nəfərin işdən azad edildiyini bildirir.

Qəzet Məkrəzi Bankın 1 milyard manat həcmində kreditin qaytarılmamasını nəzərə çatdırır.

“Yeni Müsavat” qəzeti rəsmi Bakı ilə Qərbin münasibətlərinin qırılma ərəfəsinə gəldiyinə görə Azərbaycanın Kreml üçün asan “yem”ə dönəcəyi iddiasını ilk səhifəyə çıxarıb.

Vəkil Anar Qasımlı 12 saylı həbsxanada cəza çəkən İslam Partiyasının sədri Mövsüm Səmədovun Qobustan qapalı həbsxanasına köçürülməsinə hazırlıq görüldüyünü bildirir.

Milli Şura sədri Cəmil Həsənlinin qızının yol qəzası törətməsi adı ilə istintaqa cəlb olunmasını ekspertlər tanınmış müxalif şəxslərə “qeyri-mənəvi” yollarla təzyiq sayırlar.

Azərbaycan tibb universitetinin verdiyi diplomları rəsmi Tehranın tanımaqdan imtina etməyə hazırlaşmasına etiraz olaraq universitetin İrandan olan məzun və tələbələri Azərbaycanın İran səfirliyi önündə aksiya keçiriblər.