Mətbuat-Monitorinq 05.06.14

Rəsmi qəzetlər dövlət başçısı İlham Əliyevin Türkiyə səfəri, buradakı görüşləri barədə xəbərləri ilk səhifələrə yerləşdiriblər. Bununla yanaşı bu qəzetlərdə ölkənin su təsərrüfatında çalışan bir qrup şəxsin dövlət mükafatları ilə təltif olunmaları, kombayn alınması üçün “Aqrolizinq” ASC-yə 15 milyon manatın ayrılması haqda sərəncamların mətnləri dərc edilib.

“Azadlıq” qəzeti bu yaxınlardakı müsahibəsində rəsmi Bakını tənqid etdiyinə görə rəsmilərin “hücumlarına məruz qalan ABŞ-ın Azərbaycandakı səfiri R.Morninqstarın “dediyim sözlərin arxasında dayanıram” mövqeyini ilk səhifəyə çıxarıb.

Ekspertlərə görə, rəsmi Bakı Avrasiya İqtisadi İttifaqı layihəsi çərçivəsində Kremlin birgə Fond yaratmaq təklifinə dəstək verməklə Qərbdən ünvanına gələn gələn tənqidləri səngitmək istəyir ki, bu da baş tutan məsələ deyil.

Ekspertlər Neft Fondundakı vəsaitlərin talandığını iddia edərək gələcək nəsillərə saxlanmalı olan 101 milyard dollar vəsaitin 65 milyard dollarının artıq xərcləndiyini bəyan ediblər.

Paytaxtda havanın ekoloji durumu haqda açıqlama verən ekspertlər hazırda paytaxt  havasında tozun miqdarının normadan ən azı 2 dəfə çox olduğunu bildirirlər.

“Ekspress”. Bakıdakı mülkünü AXCP-yə icarəyə verdiyinə görə partladılaraq sökülən mülkün sahibi Azər Əsgərov Nərimanov Rayon İcra Hakimiyyətinin məhkəməyə verərək 3 milyon 500 min manat təzminat tələb edib.

“Exo” ekspertlərə istinadən bu ilin aprel ayı ilə müqayisədə may ayında daşınmaz əmlak bazarında son 2 ildə qiymətlərin ilk dəfə 4%-ə qədər endiyini, amma keçən ilin analoji dövrü ilə müqayisədə 6% artdığını nəzərə çatdırır.

“Novoe Vremya”  Ukraynada yaşayan azərbaycanlıların Ukraynanın müdafiəsilə bağlı batalyonlar yaradaraq Rusiya ilə döyüşmək istəyini aşağılayaraq bunu “Ukrayna xuntası”na kömək adlandırır.

“Bizim yol”  dövlətə olan vergilərdən yayınmaq üçün səhmdar cəmiyyətlərinin inanılmaz maliyyə fırıldaqlarına əl atmalarını manjetə çıxarıb.

İnkişaf etmiş ölkələrdə yoxsulluğun 15-20%, Azərbaycanda isə 5% olması haqda rəsmi mövqeyə ekspertlər “Qərb standartları tətbiq olunsa, ölkə əhalisinin 60%-nin yoxsulluq həddində olması üzə çıxar” bəyanatını səsləndiriblər.

“Yeni Müsavat”  bir vaxtlar ölkə mediasında məhkəmə çəkişmələrinə səbəb olan nazir Ziya Məmmədovun oğlu Anar Məmmədovun “ayı əti” yeməsilə bağlı məsələnin Britaniya mediasında əksini  tapmasını önə çəkib.

Neçə illər boyu sürücülərə fiziki zor etsələr də nazir Ziya Məmmədov Nəqliyyat Departamentinin bir “qoçu-müfəttiş”ini belə işdən çıxarmamışdı, dünən isə nazir üç müfəttişi birdən işdən azad edib.

Azərbaycan Kikboksinq Federasiyasının rəhbəri, deputat Adil Əliyev qurumun razılığı olmadan Bakıda “K-1” yarışlarını təşkil etməyə hazırlaşan deputat Elton Məmmədovun oğlu Elnur Məmmədovu məhkəməyə verəcəyilə hədələyib.