Mətbuat-Monitorinq 05.11.14

Rəsmi qəzetlər ilk səhifələrində dövlət başçısı İlham Əliyevin Asiya İnkişaf Bankının prezidentinin, Dünya Bankının vitse-prezidentinin başçılıq etdikləri nümayəndə heyətlərini qəbul etməsi haqda xəbərləri dərc ediblər. Bundan əlavə, 2014-2020-ci illərdə ölkədə pensiya təminatı sisteminin islahatı Konsepsiyasının mətni bu qəzetlərdə yer alıb.  

“Azadlıq” qəzeti ölkənin polis sistemindəki son kadr dəyişikliklərini “nazir Ramil Usubovun rəqiblərini DİN-dən uzaqlaşdırması” kimi ilk səhifəyə çıxarıb.

Vəkil Nemət Kərimli müdafiə etdiyi “vicdan məhbusu” Sirac Kərmilinin səhhətində ciddi problemlərin yarandığı barədə açıqlama verib.

Qəzet yazır ki, Qarabağ müharibəsi qaziləri və şəhid ailələri xalqa Milli Şuranın insan haqları problemilə bağlı noyabrın 10-na təyin etdiyi mitinqdə xalqa aksiyada kütləvi iştirak müraciəti ediblər. 

Kilsə ehtiyacları təşkilatı 81 ölkədə dini azadlıqların durumunu araşdıraraq ən ağır durumun Azərbaycan da daxil olmaqla 5 ölkədə qeydə alındığını bildirir.

Avropa Şurasının baş katibi Yanqland “Azərbaycanda insan haqlarının bərbad durumda olması haqda rəsmi Bakıya dəfələrlə xəbərdarlıq etmələri, bıçağın sümüyə dirənməsi” bəyanatını səsləndirib.

“Ekspress”  Avropa Şurası baş katibinin Azərbaycanda insan haqları sahəsində durumun ağır olması bəyanatına PA-nın şöbə müdiri Əli Həsənovun “əsası olmayan subyektiv mülahizələr” cavabını diqqət mərkəzinə çəkib.

Ölkədə keçirilən aşura mərasiminə toxunan qəzet mərasim çərçivəsində keçirilən qanvermə kampaniyasında 1060 litr qan toplandığını yazır.

Azərbaycan və Ermənistanın keçmiş məmurları Eldar Namazovla David Şahnazaryanın sülh sazişinə başlamaq çağırışlarını Azərbaycanın bəzi QHT-ləri “Ermənistana sərf edən çağırış” kimi dəyərləndiriblər.

“Exo” qəzeti “Azəristilik təchizat” ASC-nin apardığı təmir-bərpa işləri nəticəsində qızdırılan binaların sayının 3500-ə çatmasını önə verib.

Qəzet ölkə təbiətində bəbirlərin qorunması üçün Ekologiya Nazirlyi və təbitəin qorunması üzrə Dünya Fondunun yeni Milli strategiya və Fəaliyyət planı hazırladığını yazır.

Aşura mərasimilə bağlı qəzet 2354 şəxsin qanvermə kampaniyasında işritak etdiyini nəzərə çatdırır.      

“Novoe Vremya” qəzeti Avropa Şurasının baş katibi Yanqlandın insan haqlarının ağır durumuna görə rəsmi Bakını kəskin tənqid etməsini ilk plana çıxararaq rəsmi Bakıya “xaricdən olan tənqidlərlə nə edək?” sualını ünvanlayır.

“Bizim yol”  ekspertlərə istinadən neftin uculaşmasından Azərbaycanın gündə 10 milyon dollar itirdiyini nəzərə çatdırır.

İnzibati cəza alaraq Binəqədi təcridxanasında saxlanılan jurnalist Xalid Qarayevə  vəkili Bəhruz Bayramovla görüşə imkan verilməyib.

“Yeni Müsavat”  yol tikintisi adı ilə Binəqədi rayonun ayrılan pulları icra başçısının təyinatı üzrə istifadə etmədiyini və korrupsiya hallarının üzə çıxdığını ilk səhifədə yerləşdirib.

Keçmiş əmək naziri Əli Nağıyev Təhsil Nazirliyinin ünvanına “nazirdən tələbəyə kimi hamı saxtakarlıqla məşğuldur” ittihamını səsləndirib.

Ukrayna hadisələri fonunda rəsmi Kremlin ekspansiya yolunu tutduğunu deyən ekspertlər bunu “Azərbaycana şimaldan sürünən işğal təhlükəsi” adlandırırlar.