Mətbuat-Monitorinq 08.01.14

Rəsmi qəzetlər Azərbaycanın dövlət başçısı İlham Əliyevin Yeni il təbrikini, Bakı Sağlamlıq Mərkəzinin açılışında xanımı, deputat Mehriban Əliyeva ilə iştirak etməsi, qızı Leyla Əliyevanın Mərdəkan qəsəbəsindəki “Heydər” cümə məscidinin açılışında iştirak etməsi haqda yazırlar. 

“Azadlıq”  Müsavat Partiyasının müxalifət qüvvələrinin bilriyi olan Milli Şuradan çıxmasını önə çəkərək Şura üzvlərinə istinadən bu gedişə “ağrıyan dişin çəkilməsi” mövqeyini ifadə edir. 

Qarabağ qazisi Zaur Həsənlinin faciəvi ölümünə etiraz aksiyası keçirdiklərinə görə həbs olunan gənclərə münasibətdə qazinin atası “haqq söz dediyinə görə də insanı həbs edərlər?” mövqeyini bildirib.

ABŞ-ın Azərbaycandakı keçmiş səfiri Riçard Kozlariç Azərbaycanla bağlı müsahibəsində “ölkə sərvətlərindən mənfəəti ancaq kiçik bir qrupun götürməsinə” diqqəti çəkib.

NZS qəsəbəsinin 500-ə yaxın sakini evlərinin sökülməsinə baxmayaraq hələ də kompensasiya ala bilmədikləri üçün aksiya keçirməyə hazırlaşırlar.

İş adamı Elşad Məmmədov “Avesta” şirkəti mənzillərini əlindən aldığı üçün 2014-cü il fevralın 1-də özünü şirkət önündə yandıracağını bəyan edib.

İran tərəfin Azərbaycanla ticarət dövriyyəsinin 1 milyard dollar, Azərbaycanın isə bundan üç dəfə az olması haqda açıqlamalarına ekspertlər “bu qədər fərq ortada böyük korrupsiyanın olmasını göstərir” şərhini veriblər.

“Zerkalo” keçən ilin dekabrında həbsə alınan QHT rəhbəri Anar Məmmədlinin hələ də həbsdə saxlanmasının əvvəlki kimi Qərbdə böyük rezonans yaratmasını ilk səhifəyə çıxarıb. 

“Ekspress” Güney Azərbaycan ərazisindəki Urmiya gölünün qurumasının  qarşısnı yapon mütəxəssislərin alacağı xəbərini önə çəkib. 

Müsavat Partiyasının Milli Şuradan getməsini qəzet “Milli Şuranın sonunun çatması” kimi dəyərləndirir.  

“Bizim yol” Müsavat Partiyasının Milli Şuranı tərk etməsinə “müxalifətin Milli Şurasının parçalanması” şərhini verib. Qəzetin yazdığına görə, bu addıma görə AXCP və Müsavat tərəfdarları sosial şəbəkələrdə bir-birini təhqir ediblər.

Masazır qəsəbəsində sex icarəyə götürərək “çörəkpulu” qazanan Qarabağ qazisi Namiq Məmmədov Abşeron İcra Hakimiyyətinin işləməyə imkan verməməsinə diqqət çəkərək “mən də qazi Zaur kimi özümü yandırım?” sualını ünvanlayıb.

İqtisadçı Qubad İbadoğlu QHT-lər haqqında qanuna son dəyişikliklər qüvvəyə mindiyi halda hansısa kiçik səhvə görə belə bu qurumları 5-8 min manat cərimənin gözlədiyi barədə xəbərdarlıq edərək bu dəyişikliklərə qarşı birləşməyi vacib sayıb. 

“Yeni Müsavat”  Müsavat Partiyasının Milli Şuranı tərk etməsini “müxalifətdə böyük savaşın başlaması” kimi dəyərləndirir.

Müsavat  Partiyasının funksionerləri partiyanın Milli Şuradan çıxmasını “partiyanın təkbaşına iqtidar olmaq yürüşünə start verməsi” adlandırırlar.