Mətbuat-monitorinq 08.04.15

Rəsmi qəzetlər dövlət başçısı İlham Əliyevin Məkkədə Ümrə ziyarətini yerinə yetirməsi haqda xəbərləri ilk səhifələrə yerləşdiriblər.

“Azadlıq” qəzeti baş prokuror Zakir Qaralovun və Ali Məhkəmənin sədri Ramiz Rzayevin növbəti dəfə vəzifələrinə təyin edilmələrinin sual altında olmasını manjetə çıxarıb.

Qəzet jurnalist Xədicə İsmayılın həbsinə vasitəçi olan Tural Mustafayevin baş prokurora müraciət edərək jurnalistdən şikayətçi olmadığını bildirdiyini yazır.

Aprelin 6-da AXCP fəalları Türkel Əlisoyun və Saqif Qurbanovun həbs edildiyini yazan qəzet aprelin 7-də digər fəal Ruslan Nəsirlinin həbs edildiyini nəzərə çatdırır.

Qəzet yazır ki, narkotik ilə şərlənərək həbs edilən AXCP fəalı Murad Ədilovun məhkəməsində şahid ifadələri cinayət materiallarında yazılanların yalan olduğunu sübut edib.

İcitmai fəaliyyətinə görə hazırda mühakimə edilən hüquqşünas İntiqam Əliyev Azərbaycanda həbsxanaların artıq ləyaqətli adamların evinə döndüyü bəyanatı səsləndirib.

Ekspertlər İlham Əliyevin Səudiyyə Ərəbistanına səfərini “Azərbaycana növbəti vəhhabi təhlükəsi” kimi dəyərləndirirlər.

Ekspetlərə görə, keçən ilin eyni dövrülə müqayisədə bu il neft gəlirlərinin 2 milyard dollar azalması ölkədə ciddi problemlərin yaşanacağını deməyə əsas verir.

“Ekspress” qəzeti Hesablama Palatasının əksər nazirlik və komitələrdə, icra hakimiyyətlərində pozuntular aşkarlamasını ön plana çıxarıb.

Qəzet vergidən yayınma ilə bağlı Vergilər Nazirliyinin 23 nəfəri həbs etdirdiyini yazır.

Qəzet qeyd edir ki, ekspertlər manatın getdikcə ucuzlaşmasını “kəskin devalvasiyadan sonrakı yumşaq ucuzlaşma” kimi dəyərləndirirlər.

“Exo” qəzeti ekspertlərə isnadən qanunvericilikdəki boşluqlar üzündən dövlət büdcəsinin 85 milyon manat itirməsini diqqət mərkəzinə çəkib.

Qəzetin yazdığına görə, vergidən yayınma və sahibkarlıqla qanunsuz məşğul olma ilə bağlı 346 cinayət işi qaldırılıb.

“Novoe Vremya” qəzeti Qarabağ münaqişəsinin tənzimlənməsi üzrə uzun müdət davam edən danışıqların nəticə verməməsinə “20 illik danışıq “dalanı” mövqeyini  ilk səhifəyə çəkib.

“Bizim yol” qəzeti dünən Bakıda manatın ucuzlaşacağı xəbəri yayılmasını, valyutadəyişmə məntəqələrinin bağlanmasını “Bakıda növbəti dollar ajiotajı” adlandıraraq ilk səhifədə yerləşdirib.

“Yeni Müsavat” qəzeti Bakıda Avropa Birliyilə kritik müzakirələr başlamasını önə çəkərək, Rusiya təhlükəsinin “Şərq Tərəfdaşlığı” planlarını dəyişdirdiyini iddia edir.

Beynəlxalq İdman Alyansı rəsmi Bakıya Avropa Oyunları başlayana qədər siyasi məhbusları azad etmək çağırışı edib.

Ekspertlərə görə, azərbaycanlıları dini müdafiə adı altında döyüş gedən islam ölkələrinə aparan 3 əsas səbəb maddi ehtiyac, dini savadsızlıq və yanlış təbliğatdır.