Mətbuat-Monitorinq 08.07.15

Rəsmi qəzetlər ölkədə insan amilinə “üstünlük” verilməsi, dövlət başçısının reytinqinin 90%-ə yaxınlaşması haqda yazıları ilk səhifələrdə dərc ediblər. Bundan əlavə, Neftçala rayonunun Şorkənd-Beştalı-Bankı-Şirvanlı avtomobil yolunun tikintisi üçün dövlət başçısının 3 milyon manat vəsait ayırması haqda sərəncamının mətni də bu qəzetlərdə yer alıb.

“Azadlıq” qəzeti dövlət başçısının qızı Leyla Əliyevanın deputatlığa namizədliyinin YAP tərəfindən dəstəklənməsinə Heydər Əliyev Fondunun etirazını “Paşayevlərin Naxçıvan qruplaşmasının jestini qəbul etməməsi” sayaraq manjetə çıxarıb.

Qəzet yazır ki, Müdafiə Sənayesi Nazirliyinin Telemexanika zavodundakı partlayışla bağlı cinayət işi başlanıb, 4 qadının vəziyyəti ağır olaraq qalır.

“Azərsu” bilriyinin 5 gündür ki, Sabirabada su verməməsini qəzet ironik olaraq “Azərsu”dan sabirabadlılara “orucluq hədiyyəsi” kimi dəyərləndirir.

Kral Opera Teatrına müraciət edən Böyük Britaniyanın 75 musiqiçisi BP-ni avtoritar rejimlərə, o cümlədən Azərbaycana dəstək verməkdə ittiham edərək bu quruma mədəni tədbirlərdə yer verilməməsini tələb ediblər.

Milli Şura rəsmi Bakının Avropa ölkləri və qurumlarına münasibətdə yürütdüyü siyasəti “ölkənin ərazi bütövlüyünə və milli maraqlara təhdid” adlandırırlar.     

Qəzetin yazdığına görə, Fransanın məşhur telekanallarından birindəki xüsusi araşdırma verilişində İspaniyadakı “Villa Del Mar” adlı malikanədə dincələn və 10 gün qalmağa 360 min avro ödəyən azərbaycanlılar haqqında danışılıb.

Min nəfərə qədər iş adamına cinayət işi açıldığını yazan qəzet onlara vergidən yayınma və sahibkarlılqa qanunsuz məşğul olmaq ittihamları irəli sürüldüyünü bildirir.

“Ekspress”  rayon avtomobillərinin Bakıya nə zaman buraxılması haqda bir qərara gəlinə bilməməsini diqqət mərkəzinə çəkib.  

Dini Komitə dini təlimatlara uyğun fəaliyyət göstərməyən 8 dini icmanın qeydiyyatını ləğv edib.

Əhalinin banklarda 7,6 milyard manat əmanəti olduğunu yazan qəzet həm də bank aktivlərinin azalmaqda olduğunu nəzərə çatdırır. 

“Exo”  “Bakı Tikiş Evi” məktəbli formalarının bahalaşacağı haqda xəbərləri təkzib etməsini önə çəkərək, bahalaşmanın gələn ildən tez baş verməyəcəyini bəyan edib.

“Novoe Vremya”  neft gəlirlərinin azalmasına “neft nağılı” sona çatır, bizi nə gözləyir?” narahatlığını önə çəkir.   

“Bizim yol” “Azərkabel” şirkətinin kreditlərini qaytara bilməməsi üzündən “Nikoil bank”ın girovuna çevrildiyini ön plana çıxarır.

Qəzet Tərtər rayon Azad Qaraqoyunlu kəndinin məktəb binasında qoyun saxlanmasına diqqət çəkir.

“Yeni Müsavat”  azərbaycanlı oliqarxların Ukrayna millətçiliyinin ürəyi olan Lvov şəhərini “almasını” ilk səhifəyə çıxarıb və bunu Ukraynaya “qara piar axını” kimi qiymətləndirir.

İŞİD-ə qarşı mübarizənin hələ 20-30 vaxt aparacağı haqda Barak Obamanın bəyanatına toxunan qəzet bu mənada “Azərbaycan xaricində İŞİD-ə qarşı mübarizə aparılmasını elə Azərbaycan üçün mübarizə” kimi dəyərləndirir.

Bu ilin mayından əhalinin banklardan 116 milyon manat əmanət çıxarmasını yazan qəzet ekspertlərə isnadən bunun davamlı olacağını vurğulayır.

Azərbaycanlı ilahiyyatçı Əkrəm Həsənova görə, dünyada kataklizmlərin artmasının əsas səbəbi cins şalvar geyən qadınların sayının artmasıdır.