Mətbuat-Monitorinq 08.10.14

“Azadlıq” qəzeti keçmiş hakim Həsən Əliyevin “milyonluq rüşvət” cinayətilə bağlı istintaqda rüşvətlə vəzifəyə gəlmək istəyən Ramazan Səlimovun kimlərə rüşvət verməsi haqda ifadəsini ön planda nəzərə çatdırır.

Milli Şuranın sədri Cəmil Həsənli siyasi həbslərə etiraz olaraq oktyabrın 12-də keçirilməsi nəzərdə tutulan mitinqlə bağlı xalqa “Rejim kameralarında əzab və işgəncələrə məruz qoyulan vətəndaşları müdafiə edək” çağırışı edib.

Rəsmi Bakının siyasi həbslər “dalğası”nı davam etdirməsinə Freedom House təşkilatının rəhbəri Devid Kramer “hökumətin addımları biabırçı olmağa başlayıb, bunun nəticəsiz qalmayacağını göstərmək vaxtıdır” reaksiyasını verib.

Böyük Britaniyanın “Daily Telegraph” qəzeti hüquq müdafiəçisi Leyla Yunusun saxta ittihamlarla həbsi barədə yazıb.  

“Yeni Müsavat”  Azərbaycanın Avrasiya İttifaqına qoşulması üçün Moskvanın Bakıya artan təzyiqlərinin arxasında Azərbaycanın hesabına Ermənistanı xilas etmək planının durduğu iddiasını ortaya qoyub.

Ekspertlərin açıqlamalarına görə, Azərbaycan geoseçimini Kremlin xeyrinə edərək Qərbə arxa döndərdiyi halda  ölkəyə sanksiyaların tətbiqi qaçılmaz olacaq.

Rəsmi Bakının Qurban bayramı ərəfəsində gözlənilən əfv fərmanını verməməsini vətəndaş cəmiyyəti institurlarının təmsilçiləri hökumətin ölkəni yox, öz ambisiyasını düşünməsilə əlaqələndiriblər.

Lerikin Zuvand kənd sakinləri rayon İcra Hakimiyyətini kəndə yol çəkmək üçün ayrılan 17 milyon manat vəsaiti mənimsəməkdə ittiham ediblər.