Mətbuat-Monitorinq 09.04.13

Bundan əlavə, bu qəzetlərdə aparıcı müxalifət qüvvələri antimilli addımlarda və xəyanətkarlıqda ittiham olunurlar. 

“Azadlıq” qəzeti Paşayevlərin Milli Elmlər Akademiyası rəhbərliyinə öz adamını gətirmək səylərini “AMEA-nın Ramiz Mehdiyevin nəzarətindən çıxarılması”  hesab edir.

Norveçin bir qrup  hüquq müdafiəçisi Azərbaycanla bağlı hesabat hazırlamaq üçün AXCP sədrinin müavini Fuad Qəhrəmanlı ilə görüşüblər.

“EL” Hərəkatının rəhbəri Eldar Namazov prezidentliyə namizədliyini irəli sürəcəyi barədə qəti qərar verdiyini açıqlayıb.     

Özünü Mərkəzi Bankın rəhbəri Elman Rüstəmovun yaxın adamı kimi qələmə verən Dilarə İmanova 100-ə qədər vətəndaşın 3 milyon 500 min manat pulunu mənimsəyib. Ağır Cinayətlər Məhkəməsi isə cinayəti “anlaqsız” halda törətdiyi üçün onu məsuliyyətdən azad edib. 

Azərbaycanda aqrar sahənin məhv edilməsi ilə bağlı ekspertlər Yaponiyanın Azərbaycanın torpağı qədər torpaqla 65 milyon insanı saxlaması, Nidelandın bundan 2,2 dəfə az torpaqla Azərbaycanın neft gəlirlərindən çox qazanması barədə şərh veriblər. 

Nardaran ağsaqqallarından Natiq Kərimov rəsmi Bakının ayrı-ayrı təbəqələrə təzyiqlərini “iqtidarın xalqı inqilaba aparması” kimi şərh edib.

“Zerkalo”  tanınmış siyasətçi İbrahim İbrahimlinin Naxçıvanda zorakılığa məruz qalmasını “Naxçıvanda planlaşdırılmayan istənilən səfərdən qorxu” kimi şərh edir.

“Ekspress” aprelin əvvəllərindən Masazır qəsəbəsində başlayan sürüşmənin genişlənməkdə olduğunu, bunun qarşısının alınması üçün təsirli tədbirlərin görülmədiyini yazır. 

Ömürlük həbs cəzası almış məhkumlar hər məhkumun işinə yenidən baxılması və uyğun cəzanın təyin edilməsi tələbilə müddətsiz aclıq aksiyasına başalyıblar. 

“Exo” Azərbaycan əhalisinin ildə cadugər və ekstrasenslərə 200 milyon manat sərf etdiyini yazaraq bu rəqəmin artmaqda olduğunu etdiyini bildirir.

“Bizim yol” offşor şirkətlərdə aşkar edilən milyardların müsadirə oluna biləcəyi barədə xəbərdarlıq edib. 

Aprelin 1-dən həbsə alınmasına baxmayaraq, “NİDA”çı Zaur Qurbanlı haqda cinayət işinin materialları yoxdur. Bu, vəkillərin cinayət işini tələb etməsi zamanı məlum olub. 

Politoloqlar seçki ilində ölkədəki ictmai-siyasi duruma “müxalif fəal kəsimə təzyiqlərin düşünə bilinməyəcəyi şəkildə artacağı” şərhini veriblər. 

Rusiyanın “ostkraft.ru” saytı dövlət başçısı İlham Əliyevin RF rəhbərliyinə hərbi yardımla bağlı müraciət etməsi barədə xəbər yayıb.  

“Yeni Müsavat” keçmiş rektor Elşad Abdullayevdən ifadə alınması üçün Fransaya müstəntiq qrupunun göndəriləcəyini manjetə çıxarıb. 

Keçmiş müdafiə naziri Rəhim Qazıyev bir neçə həftə öncə dövlət başçısı İlham Əliyevə ünvanladığı məktubla bağlı Səbayel rayon polisinə çağırılıb. 

Naxçıvanda zoraklığa məruz qalan tanınmış siyasətçi İbrahim İbrahimli Baş Prokurolurq və DİN-ə müraciət edib. 

Vətəndaşları mənzil tikintisi adı ilə aldadan “Mur-Ay” tikinti şirkətinin rəhbərlərindən Qalib Məmmədbəyli günahsız olmasını məhkəmədə “alan da bəlli, yeyən də bəlli, mənsə həbsdəyəm” etirazı ilə ifadə edib.