Mətbuat-Monitorinq 09.06.15

Rəsmi qəzetlər Avropa Oyunları ilə bağlı mövzunu ilk səhifələrdə yerləşdiriblər. Bundan əlavə, bu qəzetlər Türkiyədə “uğursuz seçkilər” münasibətilə rəsmi Ankaranı təbriklərə də ilk səhifələrdə  yer veriblər.

“Azadlıq” qəzeti Avropa Oyunları ərəfəsində Avropa və ABŞ-da Azərbaycanla bağlı dinləmələr, Londonda aksiya keçiriləcəyi gözləntiləri “hakimiyyətin beynəlxalq məngənədə” olması kimi yazıları manjetə çıxarıb.

Qəzet Avropa Oyunlarının Bakıda açılışı günü, yəni, iyunun 12-də Londonda BP ilə rəsmi Bakının münasibətlərinə dair “Parıldayan bütün şeylər-Azərbaycanda İdman,  BP və Repressiya” kitabının çapdan çıxacağını nəzərə çatdırır.

Avropada fəaliyyət göstərən diplomat, Bakıdakı yanğınla bağlı ölkə məmurlarını ciddi tənqidə məruz qoyan Arif Məmmədov rəsmi Bakının təzyiqlərinə “bura, layiqli adamın bir saniyənin içində məhv edilə biləcəyi Bakı deyil” cavabını verib.

Gəncə şəhər əhalsinin natəmiz su ilə təmin edildiyini yazan qəzet təmiz suyun vedrəsinin 20 qəpiyə satıldığını bildirir.

Mərkəzi Banka isnadən ölkə banklarının I rübü 100 milyon manat zərərlə başa vurduğunu yazan qəzet “inflyasiya qorxusu varmı?” sualını gündəmə gətirir.

Dini Komitə Qafqaz Müsəlmanları İdarəsinin azanla bağlı təqvimindən kənara çıxan vaxt göstərdiyi üçün “İnteraz” telekanalına irad bildirməyə hazırlaşır.

“Ekspress”  diplomat Arif Məmmədovun Bakıdakı yanğına görə ölkə məmurlarını tənqid etməsini “ara qarışdırmaq”, “İslam Əməkdaşlığı Təşkilatı ilə Bakını üz-üzə qoymaq cəhdi” kimi iddiasını diqqət mərkəzinə çəkib.

Təkrar mənzil bazarında evlərin dəyəri 1690 dollardan 1630 dollara enib.

“Novoe Vremya”   ölkədə işsizliyin səviyyəsinin yüksək olduğunu önə çəkərək buna “Azərbaycanı işsizlik qarışdıra bilər” mövqeyini ifadə edir. 

“Bizim yol”  Qərbin Rusiyaya sanksiyalarından sonra Rusiyadan Azərbaycana gələn vəsaitlərin həcminin 9 dəfə azalmasını ilk səhifədə yerləşdirib.

“Yeni Müsavat”  diplomat Arif Məmmədovun Bakıdakı yanğınla bağlı məmurları ciddi tənqid etməsini “müəyyən qüvvələr”in onu “müxalifət lideri”nə çevirmək istəmələri iddiasını “siyasi dönük” damğası ilə ilk səhifəyə çıxarıb.

Qəzet Bakı Şəhər İcra Hakimiyyətinin başçısı Hacıbala Abutalıbovun Salyan şossesi 37-dəki villaları “canlı musiqi” sədaları altında sökdürdüyünü bildirir.

Avropa Oyunları ilə bağlı Avropa və Qərb liderlərinin insan haqları və söz azadlğı tələblərinə rəsmi Bakının əməl etməməsi fonunda bəzi media mənsubları “Avropa Oyunlarını Avropaya inteqrasiya”nın “ən gözəl üsulu” sayırlar.