Mətbuat-Monitorinq 12.11.13

“Azadlıq” qəzeti vəzifəli şəxsləri təftiş edə bilməsi üçün prezident İlham Əliyevin Ali Nəzarət İnspeksiyası qurumu yaratmaqda olduğu xəbərini ilk səhifəyə çıxarıb.

Qəzet PA-nın rəhbəri Ramiz Mehdiyevin oğlu Timur Mustafayevin Dövlət Miqrasiya Xidmətinə, nazir Ramil Usubovun oğlunun isə DİN İnsan Alverinə qarşı Mübarizə İdarəsinə rəis vəzifəsinə təyin olunacağını yazır.

Rəsmi Kremlin Gömrük İttifaqına daxil edə bilmək üçün Azərbaycana göstərdiyi təzyiqləri ekspertlər “xalqın 20 il öncə qanı bahasına əldə etdiyi azadlığı əlindən almaq istəməsi” kimi dəyərləndirirlər. 

Milli Şuranın keçmiş prezidentliyə namizədi Cəmil Həsənli iqtidarı insan oğurluğunda ittiham edərək “İlham Əliyevin hüquqi, mənəvi və siyasi cəhətdən hakimiyyətdə qalmaq haqqı olmaması” bəyanatını səsləndirib. 

Böyük Britaniyanın “The İndependent” qəzeti Azərbaycanla hər cür, o cümlədən universitetlərarası əməkdaşlığın əleyhinə çıxaraq “Azərbaycanla nəyin mübadiləsi aparılacaq: məhbus tələbələrin, sifarişli qətllərə göz yumulmasının, seçki saxtakarlığının, yoxsa müxalifətə qarşı təqibərin?...” mövqeyini ifadə edir. 

“Bizim yol” yazır ki, Milli Şurada Rüstəm İbrahimbəyovun qurum sıralarından çıxarılması mövqeyinə prezidentliyə keçmiş namizəd Cəmil Həsənli “mənə hörmətiniz varsa, İbrahimbəyov qurumda qalmalıdır” bəyanatın verib.

“Azadlıq” qəzetinin rəhbərliyi iqtidara “iqtidar qəzetin bağlanmasını istəmirsə borcları dondursun” çağırışı edib. 

Ekspertlər ölkədə yanacağın qiymətinin maya dəyərindən xeyli yüksək olduğunu bəyan edərək onun qiymətinin yenidən artırılmasını əsaslandırmağın çətin olduğunu bildirirlər. 

“Yeni Müsavat” şərti “milyarderlər ittifaqı”nın maaş verməyə pul “tapa” bilmədiyi üçün fəaliyyətini dayandırdığını ilk səhifəyə çıxarıb.

Qəzetin iddiasına görə, enerji və kommunal xərclər artırıldıqdan sonra bu sektora daxil olan müəssisələr rentabelli olacaqları üçün onların özəlləşdirilməsi nəzərdə tutulur. 

Milli Şuranın prezidentliyə namizədi Cəmil Həsənlinin seçki qərargahı təhqiramiz  yazılara görə “Yeni Azərbaycan” qəzetini məhkəməyə verməyə hazırlaşır. 

Qarabağ münaqişəsinin tənzimlənməsilə bağlı Azərbaycan və Ermənistan dövlət başçılarının gözlənilən görüşünə toxunan ekspertlər “heç nə dəyişməyəcək” mövqeyini ifadə ediblər.