Mətbuat-Monitorinq 13.01.15

Rəsmi qəzetlər dövlət başçısı İlham Əliyevin “Xəyal Adası” layihəsi üzrə görülən işlərin gedişilə tanış olmasını ilk səhifədə yerləşdirib.

“Azərbaycan” qəzeti ABŞ prezidentini birbaşa təhqirə məruz qoyan “Barak Obamanın ikiüzlülüyü” adlı məqaləni də ilk səhifədə dərc edib.

“Azadlıq” qəzeti “Nyu York Times” qəzetinin İlham Əliyevi böyük korrupsioner və diktator, Ramiz Mehdiyevi isə onun “sağ əli” adlandırması haqda məqaləsini, ABŞ Makkeyn İnstitutunun direktoru Devid Kramerin rəsmi Bakının ABŞ-a sayğısız münasibətinə “belə davranış onlara baha başa gələcək” mövqeyini sərgiləməsini önə çəkərək bunu “ABŞ-dan Əliyev hakimiyyətinə son xəbərdarlıq” adlandırır. 

Yanvarın 13-dən ölkədə benzinin daha 2 qəpik bahalaşmasına qəzet neftin ucuzlaşması ilə bağlı bütün dünyada benzinin ucuzlaşmasına diqqət çəkərək rəsmi Bakının onu daha 2 qəpik bahalaşdırdığını qeyd edir.

Ekspertlər neftin ucuzlaşması ilə bağlı ölkədə yaşayış tərzinin kəskin şəkildə pisləşəcəyi, əksinə benzinin daha da bahalaşmasının ölkədəki bütün zəruri və qeyri-zəruri malların bahalaşmasına təsir edəcəyini proqnozaşdırırlar.    

Keçmiş siyasi məhbus Qurban Məmmədov ölkədə əhalisi daxilində iqtidardan narazılıq hissinin artdığını deyərək “xalqın birdən-birə ayağa qalxa biləcəyi” bəyanatını səsləndirib.

Böyük Britaniyanın “The İndependent” qəzeti Naxçıvanda fəaliyyət göstərən hüquq müdafiəçisi İlqar Nəsibovun keçən ilin yayında vəhşicəsinə fiziki zorakılığa məruz qalması haqda yazıb.

“Ekspress”  Avropa İttifaqı və ABŞ-ın Azərbaycanın 31 məmuruna sanksiya tətbiq olunması haqda xəbərləri təkzib etmələrini ön plana çıxarıb.

Bununla yanaşı qəzet Tarif Şurasının qərarı ilə ölkədə benzinin qiymətinin daha 2 qəpik bahalaşmasını nəzərə çatıdırır.

2011-ci ildə qətlə yetirilən və qatili hələ də tapılmayan yazar Rafiq Tağının qardaşı İlqar Tağı ölkə prokurorluğuna dəvət olunmasının mənazıslığına “şablon cavablar, nəzakətli qarşılama, qeyri-müəyyənliklər” şəklində işarə edib.

Qəzet rəsmi mənbələrə isnadən son 26 ildə ölkə yollarında 24 min 537 nəfərin həlak olduğunu, 77 min 457 nəfərin isə bədən xəsarətləri aldığını yazır.

“Novoe Vremya”  Azərbaycanın dövlət idarəetmə orqanlarında yerlibazlığın, qohumbazlığın geniş vüsət almasını ulk səhifəyə çəkərək bunu  “Traybalizmin qalib gəldiyi ölkə” kimi dəyərləndirir. 

Qəzet “İŞİD” terror qruplaşması başçılarının bu qrupun tərkibindəki azərbaycanlılarla toplantı keçirərək onları Azərbaycana qarşı silah qaldırmağa çağırdıqlarını bildirir.

“Bizim yol”  ötən il dövlət büdcəsinin 1.3 milyard manat kəsirlə yerinə yetirilməsini önə çəkərək bunu “neftin ucuzlaşmasının ölkəyə real təsirini göstərən fakt” kimi dəyərləndirir.

“Yeni Müsavat”  Ruisyanın “Geopolitika” jurnalına isnadən “Qərbin Azərbaycanda dövlət çevrilişi hazırlaması” haqda iddianı ilk səhifəyə çıxarıb.

Qəzet İŞİD terrorçu qruplaşmasının Bakının neft yataqlarını vuracağı hədələrinə MTN-in “bütün zəruri qabaqlayıcı tədbirlər görülür” cavabı verdiyini yazır.

Politoloq Ərəstun Orucluya görə, son zamanlar rəsmi Bakı Qərb və Amerikadan imtina edərək Rusiyaya çox yaxınlaşıb.

Keçən ilin sonunda 14 saylı həbsxanada məhkum qətlinə etiraza görə işəncələrə məruz qalan və “tubzon” adlı ərazidə saxlanılan məhkumlara yanvaın 12-də yaxınları ilə görüş verilib, onlar məhbusların bədənlərində işgəncə izləri olduğunu bildirirlər.