Mətbuat-Monitorinq 13.11.12

Rəsmi qəzetlər dövlət başçısı İlham Əliyevin MTN-in hərbi hospitalının açılışında iştirakı, Bakıdakı 173 saylı məktəbin təmirdən sonrakı vəziyyətilə tanış olması haqda yazır. 

“Azadlıq” qəzeti Avropa Komissiyasının vitse-prezidenti Neelle Kroesin dünya mətbuatına dövlət başçısı İlham Əliyevin ona siyasi məhbuslarla görüşə imkan yaradacağı vədini yeriən yetirməməsi, kompüterlərinə müdaxilə olması kimi açıqlamalarını “Əliyev rejimini ifşa etməsi” adlandırır. 

Moskvada əsasən azərbaycanlılardan ibarət yaradılan şərti “milyarderlər ittifaqı”nın üzvü, tanınmış ziyalı Rüstəm İbrahimbəyov rəsmi Bakının ittifaqa qarşı antikampaniyası ilə bağlı iqtidara “təşkilatı yaradan adamlar iqtidara sıx bağlıdır, nəyə görə təşvişə düşüblər?” sualı ünvanlayıb bə “bunların hərəkəti səviyyəsizlik, axmaqlıqdır” mövqeyini ifadə edib.

“Azadlıq” qəzetinin hesabı hələ də həbsdədir, həbsin götürülməsi haqda məsələyə Yasamal məhkəməsinin noyabrın 14-də baxacağı gözlənilir.

Zaqatalada zəlzələ bölgəsində qış gəlsə də evlər hələ tikilməyib, adamlar harada yaşayacaqlarını bilmirlər. 

Aksiyalarda iştiraka görə dünya ölkələrində cərimələrə toxunan qəzet bu sahədə ən ağır durumun Azərbaycanda olduğunu yazır. 

“Ekspress”. Paytaxtda küçə adlarını göstərən lövhələrin yeni dizaynı hazırlanır. 

İcazəsiz aksiyalarda iştiraka görə cərimələrin artırılmasının “müəllifi” deputat Rafael Cəbrayılovun qardaşları “Nikoilbank”a 1 milyon dollar borclarını qaytarmadıqlarına görə bank məhkəməyə müraciət edib. 

“Exo” İçərişəhərin dəyərinin 5-6 milyard dollara bərabər olması haqda yazaraq bunun hazırda Eyfel qülləsinin dəyərindən 100 dəfə az olduğunu bildirir. 

“Novoe Vremya”  2013-cü il dövlət büdcəsində xalqın sosial tələblərinə əhəmiyyətli yerin ayrılmamasına “Azərbaycanda xalqın rifahı ali qanun deyil” mövqeyini ifadə edir. 

Qəzet Zaqatala zəlzələ bölgəsinə kifayət qədər maliyyə vəsaitinin ayrılmasına baxmayaraq, problemlərin aradan qaldırılmamasını “məmurların pul silməklə məşğul olmaları” kimi şərh edir.  

“Bizim yol” Moskva merinin Moskvada bazarların çoxunun bağlanacağı haqda açıqlamasını “azərbaycanlılar üçün bəd xəbər” adlandırır. 

Tanınmış ziyalı Rüstəm İbrahimbəyovun “milyarderlər ittifaqı”nın təsisçilərindən Abbas Abbasovun ailəsinə təzyiq olması barədə fikirlərini  A.Abbasovun oğlu deputat Aydın Abbasov təkzib edib.

“Yeni Müsavat”  rəsmi Kremlin Azərbaycana qarşı ərazi iddiaları ilə çıxış edən “Sadval layihəsi”ni yenidən işə salmasını Azərbaycana RF-niun təzyiqi  adlandırır. 

Qəzet Zaqatalada baş vermiş zəlzələnin nəticələrini aradan qaldırmaq üçün ayrılan 300 milyon manat vəsaitin taleyinin qaranlıq olaraq qaldığını, məktəb və evlərin təhvil verilmədiyini yazır. 

Rusiya bu ölkədə fəaliyyət göstərən İslam Dirçəliş Partiyasını (İDP) “terrorçu təşkilat” adlandırıb.