Mətbuat-Monitorinq 15.04.15

Rəsmi qəzetlər dövlət başçısı İlham ƏLiyevin rəsmi qəbulları, Lənkəran şəhərinin daxili avtomobil yollarının əsaslı təmiri üçün 4 milyon, Aşağı Nüvədi-Kənarmeşə-Şürük avtomobil yolunun tikintisi üçün  3,2 milyon manatın ayrılması haqda sərəncamlarının mətnlərini ilk səhifələrdə yerləşdiriblər.

“Azadlıq” qəzeti ABŞ dövlət katibi Con Kerriyə Azərbaycana qarşı sanksiya tətbiq olunması çağırışlarının rəsmi Bakını təşvişə salması və iqtidarın müraciət müəlliflərinə hücuma keçməsini manjetə çıxarıb.

Müsavat Partiyasının yürüş keçirmək haqda müraciətinə Bakı meriyası mənfi cavab verib. “Mitinq üçün yer verdik istəmədilər”-deyə partiyanın yerinə qərar qəbul edən meriya hələ siyasi qurumu borclu da çıxarmaq istəyir.

Cümhuriyyət tarixinin tədqiqatçısı Şirməmməd Hüseynov cümhuriyyət qurucusu Məhəmməd Əmin Rəsulzadənin büstünün dağıdılmasını alçaqlıq adlandırıb.

Vətəndaş cəmiyyəti fəalları ilə bağlı cinayət işlərini, məhkəmə qərarlarını ekspetlər “iqtidarın cəmiyyəti susdurmaq, qorxu altında saxlamaq cəhdi” kimi dəyərləndiriblər.

Ölkədəki iqtisadi sistemin inhisar və korrupsiya üzərində qurulduğunu deyən ekspertlər rəsmi Bakıya “bu sistemi kökündən dəyişmək” çağırışını ediblər.

“Ekspress”  Suriyada döyüşən azərbaycanlılar və “erməni soyqırımı”nı tanıdğına görə Milli Məclisin Roma papasını tənqid etməsini önə çəkib.

“Novoe Vremya”  Avropa İttifaqı- Azərbaycan əlaqələrində iqtisadi amillərin önə çıxaraq demokratikləşmə məsələsini arxa plana keçiməsinə ironik “demokratiya gözləyər” münasibətini ifadə edir.

“Bizim yol”  paytaxtda bina üzlüklərinin yanar materiallardan olmasının əhalini “yanğın ola bilməsi” təşvişində saxlamasını diqqət mərkəzinə çəkib.

“Yeni Müsavat”  ad çəkmədən nazirlərdən birinin bağ evində düzəltdiyi bir bunker-otaqda milyardlar saxladığı iddiasını ilk səhifəyə çıxarıb.

Qəzetin iddiasına görə, Avropa Oyunlarından sonra Gömrük, Qiymətli Kağızlar,  Standartlaşdırma komitələrinin, Kənd Təsərrüfatı Nazirliyinin ləğvi və səlahiyyətlərinin Vergilər, İqtisadiyyat və Sənaye, Ekologiya nazirliklərinə veriləcəyi, Səhiyyə və Əmək nazirliklrinin birləşdiriləcəyi gözlənilir.

Ölkədə zorlanma hallarının artmasına diqqət çəkən qəzet ekspertlərə isnadən bu halların “cəmiyyətdəki kütləvi psixopatlaşma prosesi”lə bağlı olduğunu bildirir.