Mətbuat-Monitorinq 15.09.15

Rəsmi qəzetlər Avroparlamentin Azərbaycanla bağlı qətnaməsi ilə əlaqədar Milli Məclisin iclasını “Milli Məclis Avroparlamentin bədnam və qərəzli qətnaməsinə etiraz etdi” sərlövhəsilə ilk səhifədə yerləşdirib.

Bundan əlavə, dövlət başçısı İlham Əliyevin ölkənin bir qrup mədəniyyət xadimlərinə fəxri adlar, yüksək bal toplamış bir qrup təlınəbəyə prezident təqaüdü, bəstəkar Faiq Sücəddinova fərdi təqaüd, Xaçmaz rayonunun ictimai-siyasi və sosial-iqtisadi həyatında fəal olan bir qrup şəxsə fəxri adlar verilməsi haqda sərəncamlarının mətnlərini ilk səhifələrdə dərc ediblər.

Bu reportajla yanaşı “Azərbaycan” qəzetində Avroparlamentin qətnaməsinə cavab olaraq bu qurumu “ikiüzlülük”, “qərəz” təhqirlərinə məruz qoyan 4 məqalə dərc edilib.  Bununla yanaşı adı çəkilən mövzu ilə bağlı “Xalq qəzeti”ndə 4 yazı dərc olunub.

“Azadlıq” qəzeti neftin kəskin ucuzlaşması ilə 2016-cı il dövlət büdcəsinin 5 milyard manat azaldılmasına “analoqu olmayan inkişaf nağılı”nın bitməsi, böhranın ölkəyə ciddi zərbə vurmasını rəsmi Bakının etirafı kimi manjetə çıxarıb.

Ölkə siyasiləri Avroparlamentin Azərbaycanla bağlı qətnaməsinə görə rəsmi Bakının Qərbə nümayişkaranə “əzələ nümayiş etdirməsini” “Rusiya və Ermənistanın maraqlarına xidmət etməsi” kimi dəyərləndirirlər.  

Avroparlamentin qətnaməsilə bağlı Milli Məclisin növbədənkənar iclası ilə barədə Milli Şura hakimiyyətə “isterikanı dayandırın, islahatlara başlayın” təklifi verib.

Qəzet 13 saylı həbsxanada cəza çəkən vicdan məhbusları Pərviz Həşimliyə,  İlkin Rüstəmzadəyə və Əbdül Əbilova vəkillə görüşə icazə verilmədiyini yazır.

Türkiyə yazarı Elif Şəfəq yeni çapdan çıxan kitabının oxucular üçün imza mərasimində jurnalist Xədicə İsmayıla “Sevimli Xədicə xanım və digər  “düşüncə məhbusları”na azadlıq arzuları ilə sizi düşünürük” diləyilə kitab imzalayıb.

“Əl-Cəzirə” telekanalı jurnalist Xədicə İsmayılın həbsinin gerçək səbəbinin kimi “yüksək vəzifəli şəxsləri, o cümlədən dövlət başçısı Əliyevi tənqid edən yazılarının qarşısının alınması” olması haqda material yayımlayıb.  

“Ekspress”  baş nazirin müavini Əli Həsənovun ölkə diplomatlarına “bəzisi biznes qurur, bəzisi xəyanət edir” kimi iddia və təhqirlərini önə çəkib.

Təhsil naziri Mikayıl Cabbarov sinifdən sinifə keçmək üçün imthanların 5-ci sinifdən başlanması haqda təkliflə çıxış edib.

Qəzet bu gündən etibarən ölkə apteklərində 1057 adda preparatın yeni qiymətlərlə satılacağını xatırladır.

2016-cı il üçün dövlət büdcəsində neftin dəyərinin 50 dollardan hesablanmasını qəzet “ucuz neft və ya ayağı yorğana görə uzatmaq dövrü” adlandırır.

“Exo” maaşların indeksasiyasının zəruri olması sualını gündəmə gətirərək manatın devalvasiyasından sonra Azərbaycandakı şirkətlərin ancaq 10%-nin öz əməkdaşlarının maaşlarını artırmasını diqqət mərkəzinə çəkib.

“Novoe Vremya”  Azərbaycan parlamentinin Avropa Parlamentində fəaliyyətini dayandırması qərarını, baş nazirin müavini Əli Həsənovun diplomatları xəyanətdə ittiham etmələrini önə çəkib.

Qəzet ölkədə intihar hallarının artmasına toxunaraq intiharların qorxulu həddə çatdığını yazır.

“Bizim yol”  Avroparlamentin Azərbaycanla bağlı qətnaməsinə cavab olaraq Milli Məclisin avroparlı deputatlara sanksiya tətbiq etmək edəcəyi mövqeyini ilk səhifəyə yerləşdirib.

2016-cü il üçün dövlət büdcəsinə toxunan qəzet gəlirlərdə 3,9 milyard, xərclərdə isə 6 milyard manat azalma olduğunu nəzərə çatdırır.

Ölkədə məktəbli xərclərinin minimum əməkhaqqını üstələməsini yada salan qəzet bu gün dərs ili başlamasını “şagirdin dərs, valideynin dərd ilinin başlaması” kimi təqdim edir.

“Yeni Müsavat”  Avroparlamentin Azərbaycanla bağlı qətnaməsinə cavab olaraq Milli Məclisin bu günlərdəki iclasını “Avropaya savaş elanı” kimi ilk səhifəyə çıxarıb.

Keçmiş baş nazir Pənah Hüseyn Avroparlamentin Azərbaycanla bağlı qətnaməsi fonunda Avropa ilə münasibətləri normallaşdırmaq üçün rəsmi Bakıya “Qurban bayramında əfv vermək və azad seçki keçirmək” kimi “yol xəritəsi” təqdim edir.

Müsavat Partiyasının başqanı Arif Hacılı Avroparlamentin Azərbaycanla bağlı qətnaməsini “beynəlxalq bilriyin Azərbaycanda demokratiyaya yumşaq keçidə olan ümidlərinin tükənməsinin” nəticəsi adlandırır.    

Ölkənin ərzaq bazarında bahalaşma meyllərini ciddi təhlükə sayan ekspertlər neftin dəyərinin daha da ucuzlaşacağı və təkrar devalvasiya olduğu halda ərzaq məhsullarının daha kəskin bahalaşacağı barədə xəbərdarlıq ediblər.