Mətbuat-Monitorinq 15.12.15

Rəsmi qəzetlər dövlət başçısı İlham Əliyevin MTN-in bazasında iki dövlət qurumunun yaradılması haqda fərmanını və bu qurumlara rəhbərlərin təyin olunması haqda sərəncamlarının mətnlərini ilk səhifələrdə yerləşdiriblər.

“Azadlıq” qəzeti  ölkə həyatının ən aktual problemlərinə toxunub.

MTN-in struktur olaraq ləğv edilməsi, onun bazasında dövlət təhlükəsizliyi ilə bağlı iki dövlət xidmətinin yaradılması manjetə çıxarılıb.

İnsan haqlarının pozulması ilə bağlı ABŞ Dövlət Departamentinin AXCP sədrinin müavini Fuad Qəhrəmanlının həbsinə “ifadə azadlığından yararlanması ilə əlaqəlidir” mövqeyi ifadə etməsi nəzərə çatdırılır.   

Ədliyyə generalı Vidadi Mirkamalın kütləvi insan itkisinə səbəb olan “Günəşli” yatağındakı faciəyə görə SOCAR rəhbərliyinin birbaşa məsuliyyət daşıması bar’d’ bəyanatı qeyd edilir.

Gürcüstanda erməni kilsəsinə pulsuz qaz verən rəsmi Bakının Nardarana qaz verməsini “humanizm” sayması “rüsvayçı Nardaran təbliğatı” adlandırılır.

Gələn ildən ixtisarlara başlaya bilmək üçün büdcə qurumlarına ixtisara salınacaq şəxslərin və “ölü canlar”ın siyahılarını bu ayın sonuna kimi hazırlamaq tapşırığı verilməsi önə çəkilir.

Fövqəladə Hallar Nazilriyinin Biləcəridəki hərbi hissəsində 50 əsgər işgəncəyə məruz qaldığına görə zərərçəkmiş kimi məhkəmə prosesinə cəlb edilib.

Məmur özabaşınalığı kimi sahibkar Əli Adıgözəlovun obyektini uçurduğuna görə Gədəbəy Rayon Məhkəməsi sahibkarın xeyrinə qərar versə də obyekti uçuran rayon Icra Hakimiyyətinin kompensasiya ödəməkdən imtina etməsi vurğulanır.

Ölkənin iqtisadi həyatı da diqqətdən kənarda deyil. Belə ki, ekspertlər ölkəyə daxil olan gəlirlərin kəskin azalması ilə 2016-cı ilin vergi ödəmələrində kəskin problemlərin olacağı barədə xəbərdarlıq edirlər.

Rəsmi Bakıya Mərkəzi Bankın son 4 günə 255 milyon dollar itirdiyini deyən ekspertlər səmərəli addımlar olmadığı halda həm dövlət ehtiyatlarının xərclənəcəyini, həm də manatın “üzməyi öyrənmədən batacağı”nı xatırladırlar.

“Ekspress” MTN-in struktur olaraq ləğv olunmasını və onun bazasında iki dövlət xidməti yaradılmasını önə çəkib.

“Exo”   soyuqların düşməsilə qaz sobalarının istifadəsi nəticəsində dəm qazından həlak olanların artmasına səbəb kimi havalandırma şaxtalarının işlək durumda olmamasını göstərir.

“Novoe Vremya” Türkiyə ilə Azərbaycan arasında hərbi dialoqun 8-ci sessiyasının işə düşməsinə “Türkiyənin Cənubi Qafqazda fəal oyuna başlaması” münasibətini diqqət mərkəzinə çəkib.

2016-cı ildə iqtisadi durumun daha da pisləşəcəyinə qəzet “yoxsulluq gəlir” qənaətini nəzərə çatdırır.

“Bizim yol”  MTN-in sturktur olaraq ləğv edilməsini ilk səhifəyə yerləşdirib.

Yeni İnzibati Xətalar Məcəlləsində müxtəlif adlar altında amma nəticə etibarilə vətəndaşlara qarşı nəzərdə tutulan cərimə cəzalarının çoxunun gerçək olması üçün hüquqi mexanizm olmadığını deyən ekspertlər bunun rüşvətə yol açacağını bəyan edirlər.    

“Yeni Müsavat”   struktur olaraq MTN-in ləğvini “MTN tarix oldu”mövqeyilə ilk səhifəyə çıxarıb.

Qəzetin iddiasına görə, İranın “Nardaran olayları”na “təmkinli” münasibəti rəsmi Bakının bu məsələ ilə bağlı Tehranı öncədən məlumatlandırması olub.

Vəkil Elçin Sadıqov L.Yunus və A.Yunusun barəsində 5 il sınaq müddəti cəzası seçilməsini ədalətsiz sayaraq kassasiya şikayəti veriləcəyini nəzərə çatdırıb.

Politoloq Ərəstun Oruclu MTN-in ləğvi və yeni qurumların yaranması ilə siyasi qətllərin üstünün açılacağını gözləməyin lazım olmadığını bəyan edib.