Mətbuat-Monitorinq 16.01.15

Rəsmi qəzetlər dövlət başçısı İlham Əliyevin Türkiyə səfəri, görüşləri haqda xəbərləri ilk səhifələrdə yerləşdiriblər.

“Azərbaycan” qəzeti ABŞ-ı Azərbaycana qərəzli münasibətdə, Azərbaycan-ABŞ münasibətlərində yaranan problemlərin səbəbkarı kimi ABŞ-ı ittiham edən iki məqalə dərc edib.   

“Azadlıq” AŞPA-nın qarşıdakı qış sessiyasında Azərbaycanla bağlı qəti qərarların verilə biləcəyini önə çəkərək bunu “rəsmi Bakını çətin müzakirələrin gözləməsi” kimi dəyərləndirir.

25 yaşının tamam olması ilə bağlı şəxsiyyət vəsiqəsini dəyişdirmək istəyən AXCP fəalı Dəyanət Babayevə yeni vəsiqə verilmir, fəal nazir Ramil Usubova şikayətə hazırlaşır.

Mühakimə edilən jurnalist Seymur Həzi təcridxanada “kars”a salınıb,  qarşı tərəf səbəbi açıqlamır, amma S.Həzinin həbsindən öncə dövlət qurumları tərəfindən izlənməsi haqda məhkəmədəki açıqlamasının buna səbəb olması ehtimal edilir.

Ötən həftə narkotik maddə ilə şərlənərək saxlanılan gənc AXCP fəalı Elvin Abdullayev saxlanılarkən işgəncəyə məruz qaldığını bildirib və ekspertiza tələb edir.

Rəsmi Bakının ölkədə yeganə uğurlu layihə olan “ASAN xidmət”lə fəxr etməsinə toxunan qəzet iqtidara niyə bu xidmət kimi çalışmadığı sualını ünvanlayır.

QHT-lərə Dövlət Dsətəyi Şurasının təşkil etdiyi Amerika əleyhinə dinləmələr “Bakıda isterik ABŞ dinləmələri” kimi dəyərləndirilir.

Politoloq Vəfa Quluzadə Dağıstanda Azərbaycan abidələrinə qarşı vandalizm aktlarını “Rusiyanın Azərbaycana növbəti təzyiqləri” kimi şərh edib.

“Ekspress”  Türkiyə prezidenti Ərdoğanın 24 aprel “erməni genosidi” günü türk dövlətlərinin Türkiyədə tarixi “Çanaqqala zəfəri”ni qeyd etməsi təşəbbüsünü ilk plana çəkərək bunu “erməni yasında türk bayramı” adlandırır.

“Exo”  “Gəlir bəyannaməsi”nin qəbulundan 9 il keçsə də Nazirlər Kabinetinin dövlət məmurlarının gəlirləri haqda bəyannamə mexanizmlərini hazırlamamasına “Gəlirlər haqda bəyannamə kimə sərfəli deyil?” şərhini verir.

“Novoe Vremya”  ABŞ-da Azərbaycanla bağlı dinləmələrə cavab olaraq Bakıda QHT-lərə Dəstək Şurasının Amerika eleyhinə dinləmələri keçirməsini “Bakının Vaşinqtonla “pinq-ponq” (stolüstü tennis) oynaması” kimi dəyərləndirir.

“Bizim yol”  Ermənistanda 6 nəfərlik erməni ailəsini qıran rus hərbçisinin Ermənistana təhvil verilməsi tələbilə bağlı İrəvandakı aksiyada polislə toqquşmalar və yaralılar olması haqda xəbəri ilk səhifəyə çıxarıb.

Qəzet QHT-lərə Dəstək  Şurasının ABŞ əleyhinə dinləmələr keçirməsini “Bakıdan Vaşinqtona adekvat cavab” adlandırır.

“Yeni Müsavat”  benzinin qiymətinin bahalaşdırılması ilə bağlı Tarif Şurasının (TŞ) qərarının ləğv olunmasının TŞ sədri və iqtisadi inkişaf naziri Şahin Mustafayevi bitirə biləcəyi iddiasını ön plana çıxarıb.

Müxalifət partiyaları benzinin bahalaşdırılması ilə bağlı Tarif Şurasının qərarını dövlət başçısının ləğv etməsini “hakimiyyət üçün çox ucuz piar kampaniyası” kimi dəyərləndiriblər.

ABŞ-İran əlaqələrinin müsbətə doğru inlkişafını ekspertlər qəzetə “İran kartı”nın Azərbaycanın əlindən çıxması, Azərbaycanın Vaşinqton üçün rolunun azalması” kimi şərh ediblər.