Rəsmi və hökumətyönlü qəzetlər dövlət başçısı İlham Əliyevin Novruz bayramı münasibətilə xalqa təbrikinin mətnini dərc ediblər. Bundan başqa bu qəzetlərdə hökumətin parlamentə hesabatı, bəzi qanunlara dəyişikliklər, deputat Mehriban Əliyevanın Pakistanın ali mükafatına layiq görülməsi haqda yazılar yer alıb.
Bu dövrü nəşrlərdə rəsmi Bakıya müxalif olan qüvvələrin antixalq mövqeyində olması haqda böhtan xarakterli yazılar da əksini tapır.
“Azadlıq” qəzeti PA rəhbəri Ramiz Mehdiyevin bu günlərdə verdiyi müsahibəsində yer alan nazirlərin “vurulacağı” məqamını manjetə çıxarıb. PA rəhbəri R.Mehdiyevin ölkədə fəaliyyət göstərən beynəlxalq qurumları tənqidə məruz qoymasına ekspertlər “iqtidarın xarici QHT-lərə savaş elan etməsi” şərhini veriblər. R.Mehdiyevin səfirləri hədələməsinə isə “səfirlərin təmsil etdikləri dövlətlərlə münasibətlərin gərginləşəcəyi” proqnozunu veriblər.
Bakının Kürdəxanı kənd sakinləri torpaqlarının kənar şəxslər tərəfindən mənimsənilməsinə etiraz olaraq aksiya keçiriblər və kənd icra nümayəndəsi istefa verməyə məcbur olub.
17 saylı cəzaçəkmə müəssisəsində saxlanma şəraitinə etiraz edən dustaqlar aclıq aksiyasına başlayıblar.
Əmlak Komitəsi 2 ilə yaxındır ki, “Azadlıq prospekti” 154-də sökülmüş 16 mərtəbəli binanın birinci mərtəbəsindəki “Gülnarə” restoranının mülkiyyətçilərinə kompensasiya ödəməyib.
Ölkə rəhbərlyinin nazirləri rayonlara göndərməsini şərhçilər “rəsmi Bakının yerlərdə başlayan narazılıqların qarşısını almaq səhdi” sayırlar.
“Zerkalo” yazır ki, ABŞ-da səfərdə olan bir qrup Azərbaycan deputatı Azərbaycanın İran və Rusiya tərəfdən “sendviç kimi sıxılmaya məruz qalması” haqda açıqlama veriblər.
“Ekspress” yazır ki, ölkənin bank sektorundakı duruma açıqlama verən ekspertlər “Fitch” beynəlxalq reytinq agentliyinin Azərbaycanda bankların yarısının, AMB isə hər 4 bankdan birinin bağlanacağını nəzərə çatdırır.
“Exo” mayın 1-dən oğurluq telefonlardan istifadənin mümkün olmayacağı haqda yazaraq əks halda, telefonlari oğurlayan şəxslərin özlərini ifşa edəcəklərini bildirir.
Bakının mərkəzi hissəsinin investorlar üçün maraqlı olduğunu bildirən ekspertlər bura yatırılan hər manatın investora 20-25 qəpik xeyir verdiyini nəzərə çatdırır.
“Novoe Vremya” hökumətin parlamentdə hesabatına “quş” qoymaq xatirinə daha bir hesabat” mövqeyini ifadə edir.
“Bizim yol” PA rəhbəri Ramiz Mehdiyevin mediaya açıqlamasını “xarici donorlara ultimatum”, “beynəlxalq QHT-lərin Azərbaycandan qovulacağı anonsu” kimi dəyərləndirir.
9 il azadlıqdan məhrum edilən jurnalist Əvəz Zeynallı Bakı İstintaq Təcridxanasında müttəhimlə vəkillərin görüşlərinin gizli kameraya çəkilməsi haqda bəyanat səsləndirib.
AXCP üzvü Tural Həsənzadə saxlandığı 14 saylı həbsxanadan həbsxana əməkdaşı Vüsal Qarayev adlı şəxs tərəfindən fiziki zorakılığa məruz qalması haqda müraciət yayıb.
“Yeni Müsavat” Azərbaycanın Rumıniyadakı səfiri Eldar Həsənovun bu postdan imtina etməsi ilə bağlı dövlət başçısının müraciətini “Eldar Həsənovun Bakıya vəzifəyə qayıtması” kimi şərh edir.
Bir neçə gün öncə fiziki zorakılığa məruz qalan Müsavat Partiyası Naxçıvan təşkilatının sədri Sabir Vəliyev siyasi sifariş əsasında zorakılığa məruz qalması haqda açıqlama verib.
Rəy yaz