Mətbuat-Monitorinq 16.07.15

Rəsmi qəzetlər Ramazan bayramı münasibətilə dövlət başçısı İlham Əliyevin xalqa təbrikini, Beynəlxalq Bankın dövlətə məsxus səhmlərinin özəlləşdirilməyə hazırlanması haqda fərmanın mətnini ilk səhifələrdə yerləşdiriblər.

“Azadlıq” qəzeti rəsmi Bakını tənqidə məruz qoyduğuna görə diplomat Arif Məmmədovun prokurorluğa verilməsini, maliyyə maxinasiyalarında və dövlət sirrini yaymaqda ittiham edilməsini ilk səhifəyə çıxarıb. A.Məmmədov isə prokurorluğa verilməsini “Prezident Administrasiyasının şifarişi” adlandırıb.

Qarabağ qazisi Asif Yusifova prokurorun ağır cəza istəməsi haqda çıxışını vəkil “qanundan və ədalətdən uzaq çıxış” kimi dəyərləndirib.

Hüquq müdafiəçisi Leyla Yunus məhkəmə prosesində rəsmi Bakının “Yunuslar ailəsi”nu fiziki baxımdan məhv etmək planının olduğunu bildirir.

Qəzet dövlət başçısı İlham Əliyevin 12 ildir ki, məmurları tənqid etdiyini, amma verdiyi vədləri yerinə yetirmədiyini diqqət mərkəzinə çəkir.

“Ekspress”  Abşerona çəyirtkə basqını və Kənd Təsərrüfatı Nazirliyinin buna qarşı mübarizəyə başlamasını önə çəkib.

Qəzet Yunanıstana məxsus DESFA şirkətinin özələşdirilməsində Avropa İttifaqı, Azərbaycan  və Yunanıstanın anlaşa bilməməsinə diqqəti çəkir.

“Exo” İran qazının ən yaxşı halda 3-4 ildən sonra dünya bazarına çıxacağını yazaraq qarşıdakı qışda neftin qiymətinin 70 dollara qalxacağını bildirir.

Qəzet bu ilin birinci yarısında ölkə yollarındakı qəzalarda 400- dən çox insanın həlak olduğunu nəzərə çatdırır.

“Novoe Vremya”  hüquq müdafiəçisi Leyla Yunusun məhkəmə prosesində rəsmi Bakının “Yunuslar ailəsi”nu fiziki baxımdan məhv etmək planının olması haqda bəyanatını ön plana çıxarıb.

“Bizim yol”  AZAL-ın sərnişin daşıma qiymətlərinin baha olmasını “AZAL-ın vətəndaşlara və büdcəyə ağır zərbə vurması” sayaraq manjetə çıxarıb.

“Yeni Müsavat” ABŞ-ın “Qafqazda müharibə hər an alovlana bilər” mövqeyinə isnadən “Azərbaycan müharibəyə başlayır” iddiasını önə çəkib.

Qəzet dövlət başçısı İlham Əliyevin Vergilər Nazirliyini tənqid etməsini “Fazil Məmmədovun yaxınlarının həbs təlaşında olması” adlandırır.

Qəzetin iddiasına görə, 13 saylı həbsxanada dustaq Rövşən Əsgərova işgəncə verilərək lüt şəkilləri çəkilib və şəkillərin yayılmaması üçün dustaqdan pul tələb edilir.

Dövlət başçısı İlham Əliyev Beynəlxalq Bankın aktivlərinin mərhələli olaraq “Aqrarkredit”ə verilməsi, kreditlərin verilməsində nöqsana yol verən şəxslərin cəzalandırılması haqda tapşırıqlar verib.