Mətbuat-Monitorinq 18.01.14

Rəsmi qəzetlər dövlət başçısı İlham Əliyevin “İlin adamı” seçilməsi mərasimində iştirakını ilk səhifələrə çıxarıblar. 

Bundan əlavə, bu qəzetlər 2014-2016-cı illərdə Bakı şəhəri və qəsəbələrinin sosial-iqtisadi inkişafına dair Dövlət Proqramı”nın icrası ilə bağlı tədbirlər planını səhifələrində dərc ediblər.  

“Azadlıq” qəzeti həbsdə olan keçmiş səhiyyə naziri Əli İnsanovun İlham Əliyevə xitabən “məni sındırmağa nə savadın, nə cəsarətin, nə də gücün çatar” bəyanatını manjetə çəkərək bunu “Əli İnsanovun Əliyevə meydan oxuması” adlandırır.

İnsan hüquqlarının pozulmasına görə ABŞ Senatında qlobal məsuliyyət haqqında qanun layihəsinin hazırlanmasına qəzet “ABŞ-dan diktatorları silkələyəcək təklif” şərhini verir. 

Türkiyənin “Kudüs” telekanalı “Bizim Kafkaziya” proqramında Azərbaycanla bağlı verilişlər hazırlayır, proqramın müəllifi tanınmış türk yazarlarından biri Cahid Kılıcdır, proqram hər cümə günü Bakı vaxtilə saat 18:30-dan 19:30-a qədər efirdə olacaq. 

 “Oxfam” təşkilatının ərzaq bolluğu və  yararlılığı, keyfiyyəti, əhalinin ərzaq almaq imkanları indeksində Azərbaycan yararlılığa görə 125 ölkə arasında 91-ci, ərzağın keyfiyyətinə görə 73-cü yeri tutur. 

Milli Şuranın sədri Cəmil Həsənli “Yeni Müsavat” qəzetini quruma qarşı “dağıdıcılıq”da ittiham edib. 

“Ekspress” Korrupsiyaya qarşı Mübarizə İdarəsinin 2013-cü ildə rüşvət faktına görə 201 cinayət işi qaldırması xəbərini önə çəkib.

“Novoe Vremya” AŞPA-nın Azərbaycan üzrə həmməruzəçilərinin Azərbaycana gözlənilən səfərinin nəticəsiz olacağına “onların gəlişinin mənası nədir?” sualı ilə qarşılıq verir. 

Qəzet ölkədə mövcud oaln əsaslı korrupsiyanın üstünü aça bilməyən Korrupsiyaya qarşı Mübarizə İdarəsinin korrupsiya əleyhinə mübarizə aparması haqda hesabatını “blef “ adlandırır. 

“Bizim yol”  həbsdə olan keçmiş səhiyyə naziri Əli İnsanovun məhkəmə prosesində ona verilən işgəncələrin başında ədliyyə naziri Fikrət Məmmədovun durması haqda bəyanatını ilk səhifəyə çıxarıb. 

Vaxtilə Müdafiə Nazilriyi sistemində korrupsiya cinayətlərini araşdırmış polkovnik-leytenant Rasim Muradov həmin işdə hazırda nazirlikdə yüksək vəzifədə olan çoxsaylı adamların adlarının keçdiyini açıqlayıb.   

Qəzet supermarket, hipermarketlərin kiçik mağazaları sıradan çıxarmasını “xırda sahubkarlıq sistemi”ni çökdürməsi adlandırır.

Qiymətlərin qaldırılması ilə bağlı “Azərsu” və “Azərenerji”nin Tarif Şurasına müraciət etdiyi və fevralın 1-dən qiymətlərin qaldırılacağı bildirilir.   

“Yeni Müsavat”  Korrupsiyaya qarşı Mübarizə İdarəsinin hesabatında təhsil, səhiyyə və sosial təminat sahəsində ən çox korrupsiyaya rast gəlinməsi bəyanatını “prokurorluğun üç nazirliyi hədəf alması” adlandıraraq ilk səhifəyə çıxarıb. 

Həbsdə olan keçmiş səhiyyə naziri Əli İnsanovun məhkəmə prosesində rəsmi Bakının ünvanına kəskin suçlamalarını qəzet “iqtidara sərt ittihamlar” kimi dəyərləndirir. 

Qəzetin yazdığına görə, hərbi xidmətə çağırılan çənc çağırışçıların Müdafiə Nazirliyi Baş Kliniki Hospitalında təkrar müayinəsi zamanı 106 çağırışçının 17-də vərəm, 71-də nevrotik reaksiya, 18 nəfərində digər xəstəliklər aşkar edilib.