Mətbuat-Monitorinq 18.04.13

Rəsmi və hökumətyönlü qəzetlər dövlət başçısı Ilham Əliyevin Mingəçevir səfəri, bu səfər zamanı bəzi obyektləri açmasını ilk səhifəyə çıxarıblar. 

Bundan əlavə, bu qəzetlərdə aparıcı müxalifət qüvvələrinə qarşı böhtan və iftira olan yazılar yer alıb. 

“Azadlıq” ABŞ dövlət katibinin demokratiya və insan haqları üzrə müavini Tomas Melianın İlham Əliyevin prezidentliyə namizədliyinə “bu, qırmızı, ya ağ xətdir bilmirəm, amma növbəti səfərimdə onu müzakirə edəcəyik” bəyanatı səsləndirməsini manjetə çıxarıb. Rəsmi Bakı T.Melianın həbsdə olan “REAL” hərəkatının rəhbəri İlqar Məmmədovla görüşü ilə  bağlı səfərdən əvvəlki sorğusuna cavab verməyib və bu səbəbdən görüş baş tutmayıb.  

Ölkə başçısının Hacıqabulda tikintisi başa çatmayan su kəmərinin açılışını etməsini qəzet “Hacıqabul səfərinin yalanı” adlandırır. 

“Turan”ın direktoru Mehman Əliyev iqtidarın son vaxtlar azad mətbuat üzərinə hücumlarını “iqtidarın azad mətbuata müharibə elan etməsu” kimi dəyərləndirib. 

Ölkənin ictimai-siyasi institutlarının təmsilçiləri müxalifətin prezidentliyə vahid namizədinin müəyyənləşməsi üçün ilkin seçki keçirilməsini əsas sayıblar. 

Dövlət başçısı İlham Əliyevin ölkədə sosial ədalətin tam tətbiq olunması ilə bağlı bəyanatına bir sıra tanınmış hüquqşünaslar “Azərbaycanda ədalətdən danışmaq xalqı ələ salmaqdır” şərhini veriblər. 

Qəzet PA-nın rəhbəri Ramiz Mehdiyevə “Şərəf” ordeni verilməsini “Kreml vasitəçisi”nin mükafatlandırılması kimi dəyərləndirib. 

“Zerkalo” Bakıda keçirilməsi nəzərdə tutulan Avropa və Amerika gənc liderlərinin beynəlxalq konfransına rəsmi Bakının razılıq vermədiyinə görə Antalyada keçirilməsinə “Bakı “eniş”dən imtina etdi” mövqeyini ifadə edir. 

“Exo”  Bakıda mənzillərin 60%-nin bərbad halda, 15-17%-nin qəzalı durumda olduğunu yazaraq, “tez-gec söküləcək bu evlərin sakinlərinin mənzil problemləri həll olunacaq?” sualını gündəmə gətririr. 

“Novoe Vremya”  ABŞ dövlət katibinin müavini Tomas Melianın Azərbaycana səfərini “ABŞ-ın Azərbaycan üzərinə “demokratiya hücumu” kimi dəyərləndirir.

“Bizim yol” qəzeti ekspertlərə istinadən avrozonada böhran dalğasının genişlənməkdə olduğunu, bunun nəticəsində Neft Fondunun aktivlərini böyük təhlükə gözlədiyini yazaraq bu məqamı “Azərbaycanın bank sektorunun çökə bilməsi” kimi dəyərləndirir. 

“Yeni Müsavat” xarici kəşfiyyata bağlı “Anonimous” qrupunun Rabitə Nazirliyinin məlumat bankına girərək 1,7 GB-lıq sənədləri əldə edib yaymasını ilk səhifəyə çıxarıb. 

Qəzet “NİDA” gənclər hərəkatının həbsdə olan üzvlərinə müstəqil qəzetlərin verilməməsini  nəzərə çatdırır.  

Dağıstan “prezidenti” Ramazan Abdullatipov Azərbaycana səfəri zamanı “ləzgi və avarların hüquqlarının pozulmasını” rəsmi Bakı ilə müzakirə edəcəyini bildirib. 

Deputat Hüseynbala Mirələmova aid “1001 gecə” restoranında qətlə yetirilən Ramal Bayramovun anası bu qətldə təkcə H.Mirələmovun qardaşı oğlu Rəşad Mirələmovun yox, onun qardaşlarının, deputatın özünün və oğullarının iştirakçı olduqlarını deyərək həbsə alınmalarını istəyib.