Mətbuat-Monitorinq

Rəsmi qəzetlər dövlət başçısı İlham Əliyevin Xalça Muzeyinin yeni binasının maddi-texniki təminatı ilə bağlı 2 milyon manatın ayrılması haqda sərəncamının,  bəzi fərmanlarının mətnlərini dərc ediblər.

“Azadlıq” qəzeti Qarabağ qazisi Zaur Həsənovun faciəvi ölümünə səbəb olan məmur özbaşınalığına etiraz aksiyasını manjetə çıxarıb.

Qəzet ARDNŞ-nin prezidenti Rövnəq Abdullayev və nazir Kəmaləddin Heydərovun başçıları olduqları qurumların əməkdaşlarına yeni il bayramını onlara aid iaşə və əyləncə obyektlərində keçirməyə məcbur etdiklərinin bildirir.  

İctimai sərnişindaşımada gediş haqlarının qaldırılması üçün sürücülərin kütləvi şəkildə Nazirlər Kabineti və digər qurumlara müraciətlər göndərməsini qəzet “nəqliyyat nazirinin başlatdığı kampaniya” kimi dəyərləndirir. 

Səfir Polad Bülbüloğlunun “nə Qərb, nə Rusiya” bəyanatını ekspertlər rəsmi Bakının Avrointeqrasiya ilə bağlı açıqlamalarının yalan olması kimi şərh edirlər.

Hüquq müdafiəçisi Mirvari Qəhrəmanlı ölkədə 1656 məktəbin istiliklə təmin edildiyini, 1680 məktəbin odunla qızdırılmasına toxunaraq bu fakta “analoqsuz inkişaf” ironiyası ifadə edib.

“Yeni Müsavat”  məmur özbaşınalığına etiraz olaraq özünü yandıraraq vəfat edən Qarabağ qazisi Zuar Həsənovun dəfn mərasiminin “izdihamlı” keçməsini ilk səhifəyə çıxarıb. Qəzet həmçinin bu faciəvi ölümə etiraz olaraq ölkə gənclərinin aksiya keçirdiyini də bildirir. 

Partiya Ali Məclisində çıxış edən Müsavat Partiyasının başqanı İsa Qəmbər ölkədəki ictimai-siyasi duruma “vəziyyət həddən artıq gərgindir, son həddədir” mövqeyini ifadə edib.

Qarabağ qazisi Zaur Həsənovun işlədiyi kafeni Həmkarlar Konfederasiyası əlindən almasına etiraz olaraq özünü yandırmasına baxmayaraq Konfederasiya sədri, deputat Səttar Möhbalıyev “mən nə üçün günahkar olmalıyam” deyə bu ölümdə peşimanlıq çəkmədiyini bildirib.

Qəzet sosial yardım ala bilməyən Şəki sakinlərinin Qarabağ qazisi Zaur Həsənov kimi özlərini yandırmaqda gördüklərini bəyan edirlər.