Mətbuat-Monitorinq 19.01.13

Rəsmi qəzetlər dövlət başçısı İlham Əliyevin Bakıda Pirallahı rayonun yaranması haqda qanunun tətbiqi, Şamaxı rayonunun sosial inkişafı üçün 6 milyon manat pul ayrılması haqda sərəncamlar imzalaması, bəzi sazişləri təsdiq etməsi haqda yazırlar.

Bu qəzetlər aparıcı müxalifət, fəal vətəndaş mövqeyinə malik ziyalılar haqda böhtan xarakterli yazılar dərc ediblər.  

“Azadlıq” qəzeti keçmiş rektor Elşad Abdullayevin əlində 400-dən çox video-sənəd olması, onların doğru zamanda və proseslərin gedişinə uyğun yayımlanması haqda bəyanatını manjetə çıxarıb. 

Qəzet ölkənin 11 müxalif partiyasının, 20-yə yaxın vətəndaş cəmiyyəti institutunun müstəqil hüquqşünasların hazırladığı “Seçki İslahatları Memorandumu” ətrafında birləşərək seçkiyə getməyi mümkün saydığını bildirir. 

Tanınmış ziyalı və ictimai xadim Rüstəm İbrahimbəyovun sədri olduğu Kinematoqrafçılar İttifaqına qarşı başlanan cinayət işindən sonra ittifaqın katibi Rasim Balayevin vəzifədən getməsini qəzet “təzyiqlərə davam gətirməməsi” kimi dəyərləndirir. 

Rəsmi statistika ölkədə gizli iqtisadiyyatın payının 9% olduğunu bəyan etsə də, müstəqil ekspertlər bu göstəricinin 60% olduğunu bildirirlər.

“Zerkalo” qəzeti AŞPA-nın qış sessiyasında Azərbaycanda siyasi azadlıqların durumunun dəyərləndiriləcəyi məsələsinə toxunaraq, bunu “haqq-hesab saatının yaxınlaşması” adlandırır. 

“Novoe Vremya” qəzeti rəsmi Bakının Qərb ölkələrilə qaz layihələri imzalamasına “iqtidar əvvəlki kimi neftə, qaza və Qərbin dəstəyinə güvənir” mövqeyi ifadə edir.  

Qəzet ermənilərin Qarabağda istifadəyə verdikləri aeroportdan uçuşlara başlamaq istəyindən sonra rəsmi Bakının təyyarləri vurması qaydasını təsdiqləməsini “Azərbaycan HHQ-nin erməni təyyarələrini vurması razılığı” kimi ifadə edir. 

“Bizim yol” qəzeti Rüstəm İbrahimbəyovun sədri olduğu kino ittifaqının katibi Rasim Balayevin bəyanalta ittifaqdan getməsinə “xalq artistindən heyrətamiz addım” mövqeyi ifadə edir.

Qəzet AŞPA-nın qış sessiyasında Azərbaycanda siyasi azadlıqların durumunun müzakirə ediləcəyini “AŞPA-da iqtidarı “məşhər ayağı gözləməsi”” adlandırır.

YAP-ın qurucularından olan Sirus Təbrizli Rüstəm İbrahimbəyova qarşı aparılan kampaniyanı biabırçılıq adlandırıb. 

“Yeni Müsavat” qəzeti keçmiş deputat Gülər Əhmədovanın istintaqda gizli dindirildiyini yazaraq, ölkə prokurorluğunun bu istintaqla bağlı suallardan yayındığını iddia edir. 

Azərbaycan DTK-nın polkovniki Eldəniz Əliyev eks-prezident Əbülfəz Elçibəyin 70-ci illərdə yaratdığı gizli milli dərnək haqda deputat Fəzail Ağamalının o zaman DTK zabiti İlhüseyn Hüseynovun oğluna danışdığını və bundan sonra Əbülfəz bəyin həbsə alındığını  bildirir.

Qəzet 12 yanvar aksiyasında cərimə cəzaslına məruz qalan gənclərin cərimələrini ödəmək üçün keçirilən “5 qəpik” kampaniyasına gizli şəkildə polis nəfərlərinin də qoşulduqlarını bildirir.

Ekspertlər qəzetə şərhlərində statistika komitəsinin ölkənin inkişafı ilə bağlı mətbuata açdığı rəqəmləri yalan sayaraq, “komitəni rəsmi təbliğatın girovuna dönməkdə” ittiham ediblər.