Mətbuat-Monitorinq 19.03.15

Rəsmi qəzetlər dövlət başçısı İlham Əliyevin Novruz bayramı ilə bağlı xalqa təbrikinin mətnini, Bakı Olimpiya Stadionunun açılışında iştirakı ilə bağlı xəbərləri ilk səhifədə yerləşdiriblər.

“Azadlıq” qəzeti dövlət başçısı İlham Əliyevin imzaladığı əfv fərmanı ilə siyasi məhbusların azadlığa buraxılmamasını “növbəti əfv imitasiyası” adlandıraraq manjetə çıxarıb.

AXCP Rəyasət Heyətinin üzvü Asif Yusiflinin barəsində həbs müddətinin daha 2 ay uzadılmasını qəzet “hakimiyyətin Qarabağ qazisindən qisas alması” hesab edir.

Hökumətin parlamentə hesabatını formal sayan siyasilər buna səbəb kimi ölkədə parlamentin özünün formal olmasını göstərirlər. 

Müəllimlər İnstitutunun Mingəçevir filialında dekan Həqiqət Qədimova müəllimə Zəmin xanımı döyərək ona bədən xəsarətləri yetirib.

Qəzet Beynəlxalq Bankın sədri Cahangir Hacıyevin səhhətilə bağlı tutduğu vəzifədən istefa verməsini nəzərə çatdırır.

Əslən yəhudi deputat Yevda Abramov Qubada Dövlət Əmlak Komitəsinin sinaqoqu qanunsuz olaraq özəlləşdirdiklərini bəyan edib.

Qəzet yazır ki, “Azəriqaz”da işdə saxlanmaq üçün imtahan verilməsi adı ilə ixtisarların yeni dalğası başlayıb.

“Ekspress” dövlət başçısı İlham Əliyevin imzaladığı əfv fərmanını “prezidentdən Novruz hədiyyəsi” kimi dəyərləndirməsini önə çəkib.

Klassik Xalq Cəbhəsi Partiyasının sədri Mirmahmud Mirəlioğlu partiyaların səsləndirdikləri təklif nəzərə alınmadığı halda iqtidarla müxalifət arasında üçüncü görüşün başa tuta bilməyəcəyi barədə xəbərdarlıq edib.

“Exo”  ölkənin əmlak bazarında qiymətlərin yüksək olması barədə ekspertlərin yalnız sentyabr ayına müəyyən sabitləşmənin ola biləcəyi proqnozunu diqqət mərkəzinə çəkib.

“Novoe Vremya”  martın 17-də Türkiyədə TANAP qaz kəmərinin tətməlqoyma mərasiminin keçirilməsini “Azərbaycanın hamıya qaz vəd etməsi” kimi diqqət mərkəzinə çəkib.

“Bizim yol”  dövlət başçısının 101 nəfəri əfv etdiyini, siyasi məhbuslardan cəmi 3 nəfərin azadlığa buraxılmasını ilk səhifəyə çıxarıb.

“Yeni Müsavat” dövlət başçısı İlham Əliyevin imzaladığı əfv fərmanına “prezident kimləri əfv etdi, kimlər qaldı” münasibətini ilk səhifəyə çıxarıb.

Ölkə iqtisadiyyatının durumuna dair hökumətin parlamentə hesabatını müxalif siyasilər büdcənin neftdən asılılıq dərəcəsinin açıq etirafı, manatın dollar önündə 1 dolların 2-3 manata bərabər olması həcmində azalacağı kimi dəyərləndiriblər.

Ekspertlər ilin sonuna kimi manatın daha 10% ucuzlaşacağını bəyan edərək  neft bahalaşmadığı halda ikinci devalvasiyanın qaçılmaz olacağını bəyan edirlər.