Mətbuat-Monitorinq 19.12.12

Rəsmi qəzetlər dövlət başçısı İlham Əliyevin Milli Olimpiya Komitəsində keçirdiyi iclas, BP prezidentini qəbul etməsi haqda yazırlar.  

“Azadlıq” yazır ki, keçmiş rektor Elşad Abdullayev PA-nın rəhbəri Ramiz Mehdiyevin qızının birinci ledi Mehriban Əliyeva haqqında  danışıqları ilə bağlı videonu yayacağı barədə xəbərdarlığını “R.Mehdiyevə kompromat hədəsi” adlandırır.

“Qasid” mətbuat yayım firması “Azadlıq” qəzetinə olan borclarını ödəmədiyi üçün qəzet kollektivi qurumun önündə növbəti aksiyaya hazırlaşır.

Eks-spiker Rəsul Quliyevin rəsmi Kremllə əlaqələrini qaydaya salmasında vasitəçi olması haqda “Azadinform”un yaydığı xəbərə tanınmış ziyalı R.İbrahimbəyov “indi hər axmaq xəbərə cavab verməliyəm?” mövqeyini ifadə edib. 

Vəkil Aslan İsmayılov mövcud iqtidarın fəaliyyətinə “nə dövlətçiliyə, nə xalqa fayda vermək qabiliyyətində olmaması” bəyanatını səsləndirib.   

Vəkil Adil İsmayılov yol qəzasına görə gənc müsavatçı Nigar Yaqubluya ağır cəza istənilməsini “iqtidarın bu məsələdə “qırmızı xətti” keçməsi” adlandırıb. 

“Zerkalo”  AŞPA-nın yanvar sessiyasında Azərbaycanda siyasi məhbus məsələsinin müzakirə ediləcəyini və iqtidarın deputatlara Azərbaycanda siyasi məhbus məsələsi üzrə Ştrasserin məruzəsinə “hücum etmək” tapşırığı verəcəyini yazır.  

“Ekspress”. Siyasi məhbus məsələsi üzrə məruzəçi Ştrasserin məruzəsində Azərbaycan kəskin tənqid edilib. 

Qəzet elmi institutlara istinadən Azərbaycan ərazisinin 30%-ə qədərinin sürüşmə zonasında yerləşdiyini bildirir.  

“Exo” yeni il öncəsi qiymət artımından qaçmağın mümkün olmamasını ironik olaraq “ənənəvi xarakter” adlandırır. 

“Novoe Vremya” bir-iki ay öncə BP ilə rəsmi Bakı arasında münasibətlərin kəskinləşməsi fonunda bu günlərdə BP prezidentinin Bakı səfərinə “”rəsmi Bakı BP-dən nə əldə etmək istəyir? mövqeyini ifadə edir.

“Bizim yol” İsrail saytlarının Bakıda İranın 6 casusunun həbs olunması, amma rəsmi Bakının buna münasibət bildirmədiyini yazır.  

Yeni Müsavat” iqtidardakı “köhnə qvardiya”nın 2013-cü il seçkilərilə bağlı Qəbələdə fövqəladə toplantıya hazırlaşmasını oxuculara “hakim düşərgədəki olaylarla bağlı sensasion məlumatlar” kimi şərh edir.

“Deputatlıq rüşvəti” olayının əsas fiquru, keçmiş deputat Gülər Əhmədova həbsdən yayınmaq üçün əlindəki kompromatları 4 ölkəyə göndərib. 

Xaçmaz rayon icra başçısının müavini Azər Haqverdiyevin döydüyü rayon sakini Eldar Şıxəliyev xəstəxanada ölüb.