Mətbuat-Monitorinq 20-25.03.13

“Azadlıq” qəzeti kənd təsərrüfatı naziri İsmət Abbasovun oğlunun adına Londonda 2 milyon dollarlıq mülkün aşkarlanmasını manjetə çıxarıb.

BMT iqamətgahı önündə rəsmi Bakının əleyhinə aksiya keçirən Emil İsmayıl Azərbaycanın BMT-dəki nümayəndəliyinin əməkdaşı Fərid Cəbrayılov tərəfindən zorakılığa məruz qalıb. 

Xüsusi Xidmət Dövlət Baş Mühafizə İdarəsinin əsgəri Məmmədağa Məmmədov özünü asaraq intihar edib. 

Cəlilabadda Nahidə Quliyeva iki azyaşlı övladı ilə birgə qətlə yetirilib, qatil həbsə alınıb. 

Qondarma ittihamla istintaq altında saxlanılan REAL Hərəkatının lideri İlqar Məmmədov ona müxalifət qəzetlərinin verilməməsindən şikayət edib. 

Amnesty İnternational beynəlxalq müdafiə təşkilatı həbs edilən 4 nəfər “NİDA”çını “vicdan məhbusları” elan edib. 

Keçmiş deputat Gülər Əhmədovanın oğlu, hazırda hərbi xidmətdə olan Toğrul Əhmədov qolunu sındırması adı ilə hospitala yerləşdirilsə də atası ilə görüşünə icazə verilmir. 

Dövlət başçısı İlham Əliyevə məktubla müraciət edən keçmiş müdafiə naziri Rəhim Qazıyev “bandotdel”ə aparılıb və bir neçə saatlıq dindirmədən sonra sərbəst buraxılıb. 

Hüquq müdafiəçisi Mirvari Qəhrəmanlı bu günlərdə “Bos Şelf”də fəhlələrinin tətilllərinə “ARDNŞ neft sektorundakı situasiyanı dəyişməsə tətillər bütün müəssisələri bürüyə bilər” şərhini verib.

“Zerkalo”. Yevlaxda xidmət edən əsgər Elvin Niftizadənin baş nahiyəsindən güllə yarası alaraq ölməsi xəbərini qohumu Ülvi Quliyev təkzib edərək əsgəri komandirinin başına kətil vurmaqla qətlə yetirdiyini bildirib.   

“Ekspress” yanacaq doldurma məntəqələrində “A-93” markalı benzinin standartlara uyğun olmadığını iddia edərək “A-93”lər saxta çıxır mövqeyini ifadə edir. 

Tanınmış ziyalı Rüstəm İbrahimbəyov ölkə müxalifətinə “demokratik qüvvələr birləşib vahid namizəd irəli sürməlidir” çağırışını edib.

“Exo”  Novruz bayramı ərəfəsində istehlak bazarında qiymətlərin 5% artdığını yazır.  

“Bizim yol” Korrupsiyaya Qarşı Mübarizə İdarəsinin Baş Prokurorluqdan ayrılaraq müstəqil qurum kimi fəaliyyət göstərəcəyini ilk plana çıxarıb. 

“Yeni Müsavat” hazırda həbsdə olan keçmiş deputat Gülər Əhmədovanın oğlu Toğrul Əhmədovun hərbi xidmətdə qolunu sındırması xəbərini ilk səhifəyə çıxarıb. Amma qəzet onun döyüldüyünü də istisna etmir.

RF prezidenti V.Putinlə daimi ziddiyyətdə olan, Londonda yaşayan  rusiyalı milyarder Berezovskinin ölümündə Böyük Britaniya polisi qətl izi axtarır. 

Politoloq Eldar Namazov rəsmi Bakının vətəndaş cəmiyyəti institutlarına hücumlarını “cəmiyyəti xofda saxlamaq istəyən rejimin özünün xofda olması” kimi dəyərləndirib. 

Tanınmış ziyalı Rüstəm İbrahimbəyov rəsmi Bakının Rusiya, ABŞ və Avropanı düşmən elan etməsini təsadüfi saymayaraq “ölkədə repressiyaların güclənəcəyi” barədə xəbərdarlıq edib.