Mətbuat-Monitorinq 20.01.15

Rəsmi qəzetlər dövlət başçısı İlham Əliyevin Yaponiya xarici işlər nazirinin müavinini qəbil etməsi haqda xəbəri, “Azərbaycanda təhsilin inkişafı üzrə Dövlət Strategiyası”nın həyata keçirilməsi ilə bağlı Fəaliyyət Planı”nın təsdiq edilməsi haqda sərəncamın, Neft Fondunun 2015-ci il üçün büdcəsi haqda fərmanın mətnini ilk səhifələrdə yerləşdiriblər.

“Azadlıq” qəzeti DİN daxilində fəaliyyət göstərən “Qala” mühafizə xidməti mühafizəçilərinin 4 aylıq maaşlarını ala bilmədikləri üçün PA-ya yürüşünü ilk səhifəyə çıxarıb.

Qəzet Azərbaycanın jurnalist və yazarları Elmar Hüseynovla Rafiq Tağının qətlinin AŞPA-nın qış sessiyasında müzakirə ediləcəyini bildirir.

Ekspertlər Azərbaycanın Avropada demokratiyadan uzaq dövlət kimi tanınmasını “rəsmi Bakının rüsvayçı imicinin yaranması” kimi dəyərləndirirlər.

Ekspertlərə görə, rəsmi Bakının Qərb ilə qarşıdurma siyasəti “milli maraqlara zidd və beynəlxalq təcridə aparan” yoldur.

Qəzet Quantanamo həbsxanasında işgəncələrə görə ABŞ-ı tənqid edən rəsmi Bakını ölkədəki 14 saylı həbsxanadakı işgəncələrə nəzər salmağa çağırır.

ABŞ Dövlət Departamentinin maliyyə şəffaflığı üzrə hesabatına toxunan qəzet bu sənəddə diqqəti Azərbaycanın adının Afrika ölkələri ilə yanaşı olmasına çəkir.

“Ekspress”  25 il keçməsinə baxmayaraq, 1990-cı il 20 yanvar hadisələrilə bağlı istintaqın hələ də bitməməsini önə çəkib.

Deputat Səməd Seyidov hazırda Avropada baş verən hadisələrin “Avropadan qaçmaq meyllərini artırması” kimi “ideya” səsləndirib.    

“Exo”  Azərbaycan xalqının 20 Yanvar hadisələrinin 25 illiyini qeyd etməsini ilk səhifəyə çıxarıb.

Qəzet ekspertlərə isnadən yeni il öncəsi endirimlərə ölkə vətəndaşlarının 2 milyard sərf etdiklərini yazır və ekspertlərin bu endirim aksiyalarının mahiyyətinin  istehlakçını aldatmaq olduğunu bəyan etmələrinə diqqət çəkir.  

“Novoe Vremya” neftin qiymətinin ucuzlaşması ilə bağlı ölkədə bir çox layihələrin icrasının dayanmasını diqqət mərkəzinə çəkərək “inhisarçılar iştahalarını azaltmalı olacaqlar” tövsiyəsini nəzərə çatdırır.

“Bizim yol” Neft Fondunun nəhəng layihələrin maliyyələşdirilməsini dayandırmasını ön plana çıxarıb.

Ekspertlət orta məktəblərdə dərs yükünün 18 saata qaldırılması haqda sərəncamı  “müəllimlərin bir qisminin işini itirə biləcəyi” kimi dəyərləndiriblər.

Ekspertlərə görə, neftin qiyməti yüksəlmədiyi halda Mərkəzi Bank ilin ortasında manatı ucuzlaşdıra bilər.

Neftin ucuzlaşması ilə bağlı “Qarasu” Əməliyyat Şirkətində ixtisarlara toxunan qəzet işçilərin öz hesabına məzuniyyətə göndərildiklərini qeyd edir.

“Yeni Müsavat”  Hövsan qəsəbəsində polislə qarşıdurmada 21 yaşlı gəncin həyatını itirməsi haqda xəbəri ilk plana çıxarıb.

Müəllimlərin maaşlarının 2 dəfə və dərs yüklərinin 1,5 dəfə artırılması haqda sərəncamla bağlı ekspertlər gerçəkdə bu maaşların 2 dəfə yox, cəmi 33%  artdığını, dərs yükünü isə 18 saata qaldırmağın mümkünsüz olduğunu şərh ediblər.